ភ្នំពេញៈ ក្រសួងប្រៃសណីយ៍ និងទូរគមនាគមន៍ (ក.ប.ទ.) ពន្យល់អំពីបញ្ហាសេវាទូរសព្ទចល័ត និងសេវាអ៊ីនធឺណិតនៅតាមបុរី ដែលក្នុងនោះបណ្ដាលមកពីការកើនឡើងយ៉ាងគំហុកនៃការអភិវឌ្ឍបុរី ដោយគ្មានមាត្រដ្ឋានបច្ចេកទេសច្បាស់លាស់ មិនបានលៃទុកទីតាំងសម្រាប់ដំឡើងស្ថានីយអង់តែន និងពុំបានរៀបចំប្រព័ន្ធហេដ្ឋារចនាសម្ព័ន្ធទូរគមនាគមន៍ក្រោមដីទុកជាមុនជាដើម។
យោងតាមសេចក្ដីជូនដំណឹងរបស់ ក.ប.ទ. នៅថ្ងៃទី ៨ ខែកក្កដានេះ បានឱ្យដឹងថា ចាប់តាំងពីខែមេសា ឆ្នាំ ២០២០ មក ក.ប.ទ. បានដាក់ចេញនូវយន្តការកែទម្រង់ស៊ីជម្រៅផ្ទៃក្នុងនៅគ្រប់អង្គភាពចំណុះ និងនៅនិយ័តករទូរគមនាគមន៍កម្ពុជា (ន.ទ.ក.)។ ក្នុងការកែទម្រង់នោះ មានការរៀបចំពង្រឹងសមត្ថភាពមន្ត្រីរាជការ ការពង្រឹងការគ្រប់គ្រងហិរញ្ញវត្ថុផ្ទៃក្នុង ការពង្រឹងប្រសិទ្ធភាព និងតម្លាភាពលើការប្រមូលចំណូលនិងទារបំណុល ការអភិវឌ្ឍប្រព័ន្ធបច្ចេកវិទ្យាឌីជីថល ការរៀបចំលិខិតបទដ្ឋានគតិយុត្តពាក់ព័ន្ធ និងការពង្រឹងកិច្ចសហប្រតិបត្តិការជាមួយដៃគូអភិវឌ្ឍន៍ ព្រមទាំងបានចូលរួមជាមួយរាជរដ្ឋាភិបាលក្នុងកិច្ចខិតខំប្រឹងប្រែងទប់ស្កាត់ការរីករាលដាលជំងឺកូវីដ១៩។
ក.ប.ទ. បានចាត់ទុកការការពារផលប្រយោជន៍ និងសិទ្ធិរបស់អ្នកប្រើប្រាស់ និងការពង្រឹង គុណភាពសេវាទូរគមនាគមន៍ ជាការងារអាទិភាពបំផុត ដើម្បីធានាថា អ្នកប្រើប្រាស់ទទួលបានសេវាប្រកបដោយ គុណភាព និងតម្លៃសមរម្យ។ បើទោះបីជាកិច្ចខិតខំប្រឹងប្រែងទាំងនេះទទួលបានជោគជ័យលើផ្នែកជាច្រើនក្នុងវិស័យ ទូរគមនាគមន៍ក៏ដោយ ក៏ប៉ុន្តែកិច្ចការមួយចំនួននៅមិនទាន់កែលម្អឱ្យបានល្អប្រសើរនៅឡើយ ដូចជា បញ្ហាគុណភាព សេវាទូរសព្ទចល័តនិងសេវាអ៊ីនធឺណិត។
ដើម្បីដោះស្រាយបញ្ហានេះ ក.ប.ទ. បានសិក្សា ស្រាវជ្រាវ និងពិភាក្សាជាមួយ ភាគីពាក់ព័ន្ធ ដោយកំណត់មូលហេតុមួយចំនួន ដែលបណ្តាលឱ្យគុណភាពសេវាទូរសព្ទចល័ត និងសេវាអ៊ីនធឺណិត រអាក់រអួល ឬដំណើរការមិនបានល្អ ឬគ្មានសេវា។
ក.ប.ទ. បានឱ្យដឹងថា បញ្ហាសេវាទូរសព្ទចល័ត និងសេវាអ៊ីនធឺណិតនៅតាមបុរី រួមមាន ទី១. ការកើនឡើងយ៉ាងគំហុកនៃការអភិវឌ្ឍបុរី ដោយគ្មានមាត្រដ្ឋានបច្ចេកទេសច្បាស់លាស់និងត្រឹមត្រូវ ឬមិនបានលៃទុកទីតាំងសម្រាប់ដំឡើងស្ថានីយអង់តែនក្នុងបុរី។ បុរីខ្លះទៀត មានការប្តឹងតវ៉ាមិនឱ្យសាងសង់ស្ថានីយអង់តែន ដោយលើកយកហេតុផលពុំសមស្រប ដូចជាខ្លាចប៉ះពាល់ដល់សុខភាព ឬប៉ះពាល់ដល់តម្លៃអចលនទ្រព្យ។
ទី២ បុរីមួយចំនួនត្រូវបានសាងសង់ ដោយពុំបានរៀបចំប្រព័ន្ធហេដ្ឋារចនាសម្ព័ន្ធទូរគមនាគមន៍ក្រោមដី ទុកជាមុន ឬពុំបានរៀបចំឱ្យបានត្រឹមត្រូវតាមបទដ្ឋានបច្ចេកទេស ឬបានរៀបចំដែរ ប៉ុន្តែមិនបានល្អ។
ទី៣ បុរីមួយចំនួនបានផ្តល់សិទ្ធិផ្តាច់មុខសម្រាប់តែប្រតិបត្តិករមួយ ដែលពុំទទួលខុសត្រូវក្នុងការផ្តល់សេវា ឱ្យបានល្អ ដោយសមត្ថភាពនៃការផ្គត់ផ្គង់សេវាមិនសមាមាត្រនឹងចំនួនប្រជាជននៅក្នុងបុរី ឧទាហរណ៍ បណ្តាញខ្សែកាបអុបទិកដែលមានចំណុះសមត្ថភាពផ្គត់ផ្គង់ ១០០ គ្រួសារ ប៉ុន្តែបែរជាត្រូវផ្គត់ផ្គង់ រហូតដល់ ៣០០-៥០០ គ្រួសារ។
ទី៤ ជាទូទៅ សេវាទូរសព្ទចល័តមានគ្របដណ្តប់នៅលម្ហខាងក្រៅ ប៉ុន្តែក្នុងអគារឬលំនៅឋាន ដែលមាន បន្ទប់ឬជញ្ជាំងច្រើន សេវាមិនអាចចូលទៅដល់។ នៅក្នុងបុរី មានការប្រើប្រាស់ឧបករណ៍បង្កើនកម្លាំង សេវា និង/ឬឧបករណ៍ពង្រីកសេវា (Signal Booster/Repeater) យ៉ាងច្រើន។
ក.ប.ទ. បញ្ជាក់ថា ដើម្បីដោះស្រាយបញ្ហាទាំងនេះ ក.ប.ទ. បានដាក់ចេញវិធានការ ដូចជា ទី១ ចាត់តាំងក្រុមការងារចំនួន ៥ តំបន់នៅទូទាំងប្រទេស ដោយតំបន់នីមួយៗទទួលបន្ទុក ៤-៥ ខេត្ត ដើម្បីចុះពិនិត្យ ស្រង់ទិន្នន័យ និងរាប់ចំនួនស្ថានីយអង់តែន ដែលប្រតិបត្តិករពុំដែលផ្តល់ជូន ទោះបីជា ក.ប.ទ. បានស្នើសុំយ៉ាងណាក៏ដោយ។
ជាលទ្ធផល ក.ប.ទ. កំណត់បានទីតាំងនៃគ្រប់ស្ថានីយអង់តែន ការបំពាក់ គ្រឿងសម្ភារបរិក្ខារ និងបច្ចេកវិទ្យាដែលបានប្រើប្រាស់។ ជំហានបន្ទាប់ ក.ប.ទ. នឹងជំរុញការផ្លាស់ប្ដូរគ្រឿង សម្ភារបរិក្ខារនិងបច្ចេកវិទ្យា ព្រមទាំងការសាងសង់ស្ថានីយអង់តែនបន្ថែម ដើម្បីបង្កើនគុណភាពសេវា។
ទី២ ចាត់តាំងក្រុមការងារចំនួន ៨ សម្រាប់ចុះពង្រឹងគុណភាពសេវានៅតាមបុរីក្នុងរាជធានីភ្នំពេញ ដោយបញ្ចប់កិច្ចសន្យាផ្ដល់សិទ្ធិផ្តាច់មុខដល់ប្រតិបត្តិករណាមួយក្នុងការផ្គត់ផ្គង់សេវាអ៊ីនធឺណិត និងស្នើសុំ កិច្ចសហការពីម្ចាស់បុរីក្នុងការជំរុញគុណភាពសេវា។ ទី៣ បានទិញឧបករណ៍វាស់ស្ទង់សេវាដែលបំពាក់លើរថយន្ត (Drive Test) ចំនួន ៥ គ្រឿង សម្រាប់ធ្វើការវាស់ស្ទង់គុណភាពសេវា ដើម្បីជំរុញឱ្យប្រតិបត្តិករកលម្អសេវា ឬវិនិយោគបន្ថែម។
ទី៤ ដាក់ឱ្យដំណើរការកម្មវិធីទូរសព្ទ MPTC Speed Test សម្រាប់អ្នកប្រើប្រាស់អាចវាស់ល្បឿនសេវាទូរសព្ទ និងសេវាអ៊ីនធឺណិតដោយខ្លួនឯង និងមានសិទ្ធិប្តឹងមក ក.ប.ទ. ដើម្បីដោះស្រាយ។ ទី៥ «ប្រកាសស្តីពីគុណភាពសេវាទូរគមនាគមន៍» នឹងត្រូវដាក់ឱ្យអនុវត្តនាពេលឆាប់ៗខាងមុខ ដើម្បីដាក់ កាតព្វកិច្ចលើប្រតិបត្តិករឱ្យពង្រឹងគុណភាពសេវា និងបណ្ដាញទូរគមនាគមន៍របស់ខ្លួន ក្នុងគោលដៅ ការពារផលប្រយោជន៍របស់អ្នកប្រើប្រាស់។
ក.ប.ទ. បានអំពាវនាវដល់ប្រជាពលរដ្ឋទាំងអស់ បញ្ឈប់ការប្រើប្រាស់ឧបករណ៍បង្កើនកម្លាំង សេវា និង/ឬឧបករណ៍ពង្រីកសេវា (Signal Booster/Repeater) ពីព្រោះឧបករណ៍ទាំងនេះកំពុងឆ្លងរំខាន និងប៉ះពាល់ គុណភាពសេវា។ បន្ថែមលើនេះទៀត ក.ប.ទ. ក៏សំណូមពរដល់អ្នកពាក់ព័ន្ធទាំងអស់ ឱ្យបញ្ឈប់ការនាំចូលឧបករណ៍ បង្កើនកម្លាំងសេវា និង/ឬឧបករណ៍ពង្រីកសេវាគ្រប់ប្រភេទ ដែលពុំមានការទទួលស្គាល់យថាប្រភេទពី ក.ប.ទ. ចៀសវាងការប្រឈមនឹងវិធានការច្បាប់៕
