លោក សុន ឆ័យ ពេលចេញពីបំភ្លឺនៅសាលាដំបូងរាជធានីភ្នំពេញនៅថ្ងៃទី ១២ ខែកក្កដា។ ហេង ជីវ័ន
ភ្នំពេញៈ តំណាងអយ្យការអមសាលាដំបូងរាជធានីភ្នំពេញ មិនទាន់ធ្វើសេចក្តីសម្រេចណាមួយ ទាក់ទងទៅនឹងចម្លើយព្រមទាំងឯកសាររបស់លោក សុន ឆ័យ អនុប្រធានគណបក្សភ្លើងទៀន ដែលបានចូលទៅភ្លឺនៅថ្ងៃទី ១២ ខែកក្កដា នៅឡើយទេ ដោយត្រូវការពេលវេលាសមស្រប ដើម្បីពិនិត្យទៅលើចម្លើយ និងឯកសារដែលបានដាក់ទាំងនោះ។
លោក សុន ឆ័យ នៅថ្ងៃទី ១២ ខែ កក្កដា ឆ្នាំ ២០២២ បានចូលខ្លួនទៅបំភ្លឺនៅមុខតំណាងអាយ្យការអមសាលាដំបូងរាជធានីភ្នំពេញ តាមការកោះហៅ ពាក់ព័ន្ធនឹងបណ្តឹងរបស់គណៈកម្មាធិការជាតិរៀបចំការបោះឆ្នោត (គជប ) ដែលបានប្តឹងរូបលោកពីបទបរិហាកេរ្តិ៍ និងទាមទារឱ្យលោក សុំទោសជាសាធារណៈ កាលពីថ្ងៃទី ១៧ ខែ មិថុនា ឆ្នាំ ២០២២ ចំពោះការថ្លែងរបស់លោកដែលថា មានភាពមិនប្រក្រតីនៅក្នុងការបោះឆ្នោតក្រុមប្រឹក្សាឃុំសង្កាត់អាណត្តិទី៥។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ ប្រាប់ ភ្នំពេញ ប៉ុស្តិ៍ នៅថ្ងៃទី ១២ កក្កដាថា តំណាងអយ្យការបានស្តាប់ចម្លើយ និងពិនិត្យលើភ័ស្តុតាង ដែលមេធាវីរបស់លោក សុន ឆ័យ បានដាក់ជូនតុលាការ ។
ការសម្រេចបែបណានោះ នៅមិនទាន់ដឹងទេ ព្រោះតំណាងអយ្យការត្រូវការពេលវេលាសមស្របដើម្បីពិនិត្យ និងវាយតម្លៃលើឯកសារទាំងអស់របស់ដើមបណ្តឹង និងរបស់ជនសង្ស័យ ដើម្បីឈានដល់ការសម្រេចតាមច្បាប់។
ក្រោយពីតំណាងអយ្យការសាកសួរ និងស្តាប់ចម្លើយ រយៈពេលជិត ២ ម៉ោង លោក សុន ឆ័យ ប្រាប់ក្រុមអ្នកសារព័ត៌មាន នៅខាងមុខសាលាដំបូងរាជធានីភ្នំពេញថា ក្នុងនាមលោកជាអ្នកនយោបាយ នៅពេលដែលឃើញមានភាពមិនប្រក្រតីណាមួយ នៅក្នុងដំណើការបោះឆ្នោត លោកចេញមុខតវ៉ា ព្រោះនេះជាសិទ្ធិសេរីភាពរបស់លោក។ ប៉ុន្តែ អ្វីដែលស្ថាប័ន គជប មិនពេញចិត្តហើយបានប្តឹងលោក លោកព្រមចូលបំភ្លឺទៅតាមកោះហៅរបស់តុលាការ។
លោកយល់ថា ការប្តឹងផ្តល់របស់ គជប នេះ បានធ្វើឱ្យលោកខាតពេល ក្នុងការចុះទៅណែនាំ មេឃុំ និងក្រុមប្រឹក្សាឃុំសង្កាត់ដែលជាប់ឆ្នោតរបស់គណបក្សភ្លើងទៀន ជាង ២ ០០០ នាក់ ឱ្យបម្រើប្រជាពលរដ្ឋ ស្របតាមគោលនយោបាយរបស់គណបក្សដែលបានដាក់ចេញ ។
ទោះជាយ៉ាងណា លោកបានប្រាប់ទៅតំណាងអយ្យការថា អ្វីដែលលោកលើកឡើង ដោយយោងទៅលើហេតុការណ៍ដែលបានកើតឡើង និងផ្អែកលើសេចក្តីថ្លែងការណ៍របស់គណបក្សភ្លើងទៀន និងគណបក្សនយោបាយចំនួន ៤ ទៀត ក៏ដូជាអង្គការក្រៅរដ្ឋាភិបាល ដែលយល់ឃើញថា មានភាពមិនប្រក្រតីនៅក្នុងការបោះឆ្នោតផងដែរ។
លោក សុន ឆ័យ ដែលនៅជាប់បណ្តឹងរបស់គណបក្សប្រជាជន និងត្រៀមចូលបំភ្លឺតុលាការនៅថ្ងៃទី ១៥ ខែកក្កដា ទៀតនោះក៏បានសម្តែងការសោកស្តាយចំពោះ គជប ដែលបានប្តឹងលោក ពាក់ព័ន្ធនឹងករណីខាងលើនេះ ប៉ុន្តែ វាគួរតែមានការពន្យល់ ពីស្ថាប័ន គជប ចំពោះការលើកឡើងរបស់លោក ជុំវិញភាពមិនប្រក្រតីក្នុងការបោះឆ្នោត ព្រោះកន្លងមក រូបលោក និង គជប ក៏ធ្លាប់បានជួបជជែកគ្នា ពីបញ្ហាមួយចំនួន ពាក់ព័ន្ធនឹងភាពមិនប្រក្រតីពាក់ព័ន្ធនឹងការបោះឆ្នោតកន្លងមកនេះដែរ។
លោកបញ្ជាក់ថា៖ «ខ្ញុំប្រាប់ទៅតុលាការថា អ្វីដែលយើងលើកឡើង មិនមែនមិនមានហេតុផលទេ។ ខ្ញុំធ្វើដំណាងរាស្ត្រ តាំងពី ៩៣ ហើយអ្វីដែលខ្ញុំនិយាយស្តី គឺជាសិទ្ធិសេរីភាព។ មិនមែនតែថា តំណាងរាស្ត្រទេ ពលរដ្ឋទាំងអស់ មានសិទ្ធិសេរីភាពក្នុងការនិយាយ ស្របតាមរដ្ឋធម្មនុញ្ញ» ។
លោក សោម សូរីដា អ្នកនាំពាក្យ គជប ប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែកក្កដាថា ទោះជាលោក សុន ឆ័យ ជា អ្នកនយោបាយ ប៉ុន្តែមិនអាចនិយាយប្រមាថស្ថាប័នជាតិថា ជាចោរនោះទេ ហើយការប្រមាថរបស់លោក សុន ឆ័យ នេះ មិនអាចគិតថា វាជារឿងធម្មតា និងហៅមកចចារ ឬជជែកគ្នា ដើម្បីរកខុស ឬរកត្រូវនោះទេ។
លោកបន្ត ករណីលោក សុន ឆ័យ ប្រមាថ និងបរិហាកេរ្តិ៍ជាសាធារណៈនេះ មិនមែនជាការបញ្ចេញមតិ ដែល គជប ត្រូវអញ្ជើញលោក សុន ឆ័យ មករកខុស រកត្រូវជាមួយ គជប នោះទេ។ ករណីនេះ ជាករណីត្រូវដោះស្រាយគ្នាតាមយន្តការតុលាការ។
លោក សោម សូរីដា ថ្លែងថា៖ «លោក សុន ឆ័យថា ការប្រមាថ គជប ជារឿងធម្មតា លោកគិតខុស និងស្មានខុសហើយ លោកគួរចេះថ្លឹងថ្លែងពាក្យពេចន៍ យើងប្រើប្រាស់ខេមរភាសា ដែលជាភាសាខ្មែរក្នុងន័យ មួយដែលត្រូវគោរពគ្នាទៅវិញទៅមក រវាងបុគ្គល ដែលជាថ្នាក់ដឹកនាគណបក្សនយោបាយ ជាមួយស្ថាប័នជាតិមួយដែលមានចែងនៅក្នុងរដ្ឋធម្មនុញ្ញ»។
លោកបន្តថា មួយវិញទៀត ការលើកឡើងថា វាជាការខាតពេលវេលារបស់លោក សុន ឆ័យ គឺជាការបន្ថយនូវទោសកំហុសរបស់គាត់ ប្រាប់ទៅសាធារណជន ប៉ុន្តែកិច្ចការនេះ មិនមែនជារឿងសាមញ្ញដូចលោក សុន ឆ័យ គិតនោះទេ ដូច្នេះលោក សុន ឆ័យ ត្រូវគិតឡើងវិញ នូវពាក្យសម្តីដែលលោកប្រើទាំងនោះ៕
វីដេអូ៖
