លោក កើត រិទ្ធ រដ្ឋមន្ត្រីក្រសួងយុត្តិធម៌ ថ្លែងនៅក្នុងសន្និសីទកាសែត កាលពីថ្ងៃម្សិលមិញ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ រដ្ឋមន្រ្ដីក្រសួងយុត្ដិធម៌ លោក កើត រិទ្ធ បានគូសបញ្ជាក់ពីគោលបំណងនៃការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម លើកទី១០ ថា គឺដើម្បីបំពេញនូវចំណុចខ្វះខាតរបស់រដ្ឋធម្មនុញ្ញឆ្នាំ ១៩៩៣ និងដើម្បីការពារនូវឧត្ដមប្រយោជន៍របស់ជាតិ និងមាតុភូមិកម្ពុជា។
លោក កើត រិទ្ធ បានបញ្ជាក់បែបនេះនៅក្នុងសន្និសីទសារព័ត៌មានស្តីពីការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមដោយធ្វើវិសោធនកម្មមាត្រា ១៩ ថ្មី (១) មាត្រា ៨៩ មាត្រា ៩៨ ថ្មី មាត្រា ១០២ ថ្មី មាត្រា ១១៩ ថ្មី (១) និងមាត្រា ១២៥ ថ្មី នៃរដ្ឋធម្មនុញ្ញនិងមាត្រា ៣ ថ្មី មាត្រា ៤ ថ្មី នៃច្បាប់ធម្មនុញ្ញបន្ថែម ដើម្បីសំដៅធានានូវដំណើរការជាប្រក្រតីនៃស្ថាប័នជាតិ នាថ្ងៃទី ១៤ ខែកក្កដា នៅក្រសួងយុត្តិធម៌។
លោកបានថ្លែងថា៖ «គោលបំណងនៃការធ្វើវិសោធនកម្មធម្មនុញ្ញនេះ ដូចខ្ញុំបានបញ្ជាក់ជូនពីខាងដើមថា វិសោធនកម្មរបស់យើងចំនួន ៩ លើកកន្លងមកនេះ គឺដើម្បីបំពេញឱ្យគោលបំណងសំខាន់តែ ២ ទេ ទី១ បំពេញបន្ថែមនូវចំណុចខ្វះខាតរបស់រដ្ឋធម្មនុញ្ញ ឆ្នាំ ១៩៩៣ ទី២ ដើម្បីការពារនូវឧត្ដមប្រយោជន៍របស់ជាតិ និងមាតុភូមិកម្ពុជា»។
លោករដ្ឋមន្ត្រីបានចោទសួរថា តើការពារយ៉ាងម៉េច? ក្នុងនោះ គឺការពារទី១ គឺដើម្បីធានាឱ្យស្ថាប័នកំពូលរបស់ជាតិ ជាពិសេសគឺអំណាចនីតិប្រតិបត្ដិ ដែលមានបេសកកម្មចម្បងក្នុងការដឹកនាំកិច្ចការងារទូទៅរបស់រដ្ឋ មានដំណើរការប្រព្រឹត្ដទៅដោយរលូន និងប្រកបដោយនិរន្តរភាពនៅគ្រប់កាលៈទេសៈទាំងអស់។ ទី២ ការធានាការពារ និងថែរក្សាឱ្យបាននូវសន្តិភាព សន្ដិសុខសង្គម សណ្ដាប់ធ្នាប់សាធារណៈ និងស្ថិរភាពនយោបាយរបស់ប្រទេសជាតិនៅគ្រប់កាលៈទេសៈ ដើម្បីបន្តជាគ្រឹះដ៏រឹងមាំ សម្រាប់ការអភិវឌ្ឍប្រទេសជាតិ លើគ្រប់វិស័យ និងបម្រើឱ្យសេចក្ដីសុខសាន្តរបស់ប្រជាជនកម្ពុជា។
លោកបញ្ជាក់ថា៖ «មើលពីបំណងដ៏ពិសិដ្ឋ ២ នេះ តើយើងគួរធ្វើ ឬមិនធ្វើ ហើយយើងយកខ្លឹមសារមកមើលថា តើយ៉ាងម៉េច?»។
សេចក្តីព្រាងវិសោធនកម្មច្បាប់ធម្មនុញ្ញ និងសេចក្តីព្រាងច្បាប់ធម្មនុញ្ញបន្ថែមនេះ ត្រូវបានដាក់ឆ្លងក្នុងកិច្ចប្រជុំគណៈរដ្ឋមន្រ្ដី កាលពីថ្ងៃទី ៨ ខែ កក្កដា ឆ្នាំ ២០២២ កន្លងទៅដោយគណៈរដ្ឋមន្រ្ដីបានសម្រេចអនុម័តយល់ព្រមទាំងស្រុង។
លោក កើត រិទ្ធ បញ្ជាក់ទៀតថា ការធ្វើវិសោធនកម្មនេះ គ្មានកន្លែងណាមួយជាការលាក់បាំងឡើយ។ កន្លងទៅមានសំណួរថា ហេតុអ្វីបានជាអត់ឃើញសេចក្ដីព្រាងនេះ? លោកថា បើក្រុមប្រឹក្សាធម្មនុញ្ញមិនទាន់សម្រេចផង តើមានសេក្ដីព្រាងមកពីណា។
លោក កើត រិទ្ធ ក្នុងសន្និសីទកាសែតនៅថ្ងៃទី ១៤ កក្កដា។ រូប យូសុះ អាប់ឌុលរ៉ាស់ហ៊ីម
លោកបញ្ជាក់ថា៖ «គ្រាន់តែក្រុមប្រឹក្សាធម្មនុញ្ញសម្រេចហើយភ្លាម គឺយើងរៀបចំដើម្បីនិយាយគ្នាភ្លាម ហើយចែកនូវសេចក្ដីព្រាងនេះ ដើម្បីអាចទុកជាមូលដ្ឋាន»។ លោកបន្តថា រាល់ដំណើរការនៃការធ្វើវិសោធនកម្មរដ្ឋធម្មនុញ្ញលើកទី១០ នេះ ក៏មិនខុសពីលើកទី៩ ក៏មិនខុសពីលើទី៨ ក៏មិនខុសពីការធ្វើវិសោធនកម្មតាំងពីលើកទី១ មកដែរ គឺអនុវត្ដស្របទៅតាមនីតិវិធីដែលមានចែងនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា។
លោករដ្ឋមន្ត្រីបញ្ជាក់ថា៖ «ឥឡូវបើកន្លែងណាខុស សូមលើកមាត្រាមកបង្ហាញមកថា អនុវត្ដនេះខុស ជាមួយរដ្ឋធម្មនុញ្ញកន្លែងណា ក្នុងដំណើរការនីតិវិធីពីដើមដល់ចប់ សូមយករដ្ឋធម្មនុញ្ញទៅមើល ហើយបើយើងចាត់ទុករដ្ឋធម្មនុញ្ញជាគ្រឹះ សូមអានរដ្ឋធម្មនុញ្ញនេះដោយយកចិត្ដទុកដាក់ អានឱ្យចប់ហើយព្យាយាមយល់ឱ្យច្បាស់»។
ក្រុមប្រឹក្សាធម្មនុញ្ញនៅថ្ងៃទី ១៣ ខែ កក្កដា ឆ្នាំ ២០២២ ដឹកនាំដោយលោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានបើកកិច្ចប្រជុំពេញអង្គ ដើម្បីពិនិត្យ និងរៀបចំសេចក្តីក្រាបបង្គំទូលថ្វាយមតិរបស់ក្រុមប្រឹក្សាធម្មនុញ្ញ ថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
តាមរយៈលទ្ធផលនៃកិច្ចប្រជុំពេញអង្គ ក្រុមប្រឹក្សាធម្មនុញ្ញបានក្រាបបង្គំទូលថ្វាយ ព្រះមហាក្សត្រដោយផ្អែកលើមាត្រា ១៥៣ ថ្មី (២ មាត្រា១៥១ ថ្មី) មាត្រា ១៥៤ ថ្មី (២ មាត្រា ១៥២ ថ្មី) និងមាត្រា ១៥៥ ថ្មី (២ មាត្រា ១៥៣ ថ្មី) នៃរដ្ឋធម្មនុញ្ញ ការស្នើសុំធ្វើវិសោធនកម្មមាត្រា ១៩ ថ្មី (១) មាត្រា ៨៩ មាត្រា ៩៨ ថ្មី មាត្រា ១០២ ថ្មីមាត្រា ១១៩ ថ្មី (១) និងមាត្រា ១២៥ ថ្មីនៃរដ្ឋធម្មនុញ្ញ និងមាត្រា ៣ ថ្មី មាត្រា ៤ ថ្មី នៃច្បាប់ធម្មនុញ្ញបន្ថែម សំដៅធានានូវដំណើរការជាប្រក្រតីនៃស្ថាប័នជាតិអាចធ្វើទៅបាន គឺស្របតាមបរិបទនៃសភាពការណ៍ជាក់ស្ដែង និងពុំមានអ្វីប៉ះពាល់ដល់ប្រព័ន្ធប្រជាធិបតេយ្យ សេរីពហុបក្ស និងរបបរាជានិយមអាស្រ័យរដ្ឋធម្មនុញ្ញ ព្រមទាំងធ្វើឡើងនៅពេលប្រទេសជាតិមិនស្ថិតក្នុងភាពអាសន្ន៕
