រូបអេម៉ូជី (emoji) ដែលត្រូវបានគេប្រើនៅលើបណ្តាញសង្គមហ្វេសប៊ុក។ រូបថត សហការី
ភ្នំពេញ : ប្រជាជនកម្ពុជាអាយុចន្លោះពី ១៨ ទៅដល់ ៦៥ ឆ្នាំ មានទំនោរចូលចិត្ដប្រើប្រាស់អេម៉ូជី (emoji) សញ្ញាបេះដូងក្រហមច្រើនជាងគេនៅលើបណ្ដាញសង្គមហ្វេសប៊ុក។ នេះបើយោងតាមរបាយការណ៍ទិន្នន័យផ្ដល់ឱ្យដោយក្រុមហ៊ុន Meta នៅក្នុងឱកាសទិវាទិវា emoji និង Reaction ពិភពលោកនៅលើ WhatsApp នាថ្ងៃទី ១៧ ខែកក្កដា ឆ្នាំ ២០២២។
ចំណែកឯ អេម៉ូជី ដែលទាក់ទងនឹងសកម្មភាពកម្សាន្ដដ៏ពេញនិយម ត្រូវបាន Meta បង្ហាញឱ្យដឹងពីការពេញនិយមរបស់ប្រជាជនកម្ពុជាថា វាជារូបសញ្ញាបាល់ទាត់។
អេម៉ូជីបេះដូងក្រហម មានប្រជាប្រិយភាពខ្លាំងពីសំណាក់អ្នកប្រើប្រាស់ហ្វេសប៊ុកនៅកម្ពុជាហើយរូបសញ្ញាឈរនៅលំដាប់ទី២ វាជារូបមុខសើចចេញទឹកភ្នែកទៅវិញ។
យោងតាមរបាយការណ៍ បានឱ្យដឹងថា៖ «អ្នកប្រើប្រាស់ហ្វេសប៊ុកនៅកម្ពុជា ដែលមានអាយុចាប់ពី ៤៥ ទៅ ៦៥ ឆ្នាំ បែរជាចូលចិត្តប្រើរូបផ្គុំដៃ ឬរូបសំពះជាជម្រើសបន្ទាប់ទី ២ របស់ពួកគេទៅវិញ ជាជាងរូបមុខសើចចេញទឹកភ្នែក»។
បន្ទាប់ពីរូបបាល់ទាត់ ដែលជាសកម្មភាពទាក់ទងនឹងកីឡា រូបសញ្ញាទី២គឺជារូបអង្គុយសមាធិ ហើយរូបឈរលំដាប់ទី ៣ គឺស្រោមដៃប្រដាល់។
របាយការណ៍ បានបន្ដថា នៅលើបណ្តាញសង្គម Instagram វិញ emojis រូបបាល់ទាត់និងរូបអង្គុយសមាធិត្រូវបានជាប់ចំណាត់ថ្នាក់លេខ១ និងលេខ២រៀងគ្នាខណៈអេម៉ូជី ដែលពេញនិយមបំផុតទី៣គឺរូបមនុស្សហែលទឹក។
Meta បានបង្ហាញថា៖ «ចំណុចគួរជាទីចាប់អារម្មណ៍បំផុតនោះ គឺថា បើទោះបីជាប្រជាប្រិយភាពនៃការប្រើប្រាស់ Emoji វាហាក់លម្អៀងទៅតាមភេទ នៃអ្នកប្រើប្រាស់ក៏ដោយ យើងសង្កេតឃើញថា រូបសញ្ញាបេះដូងក្រហម នៅតែត្រូវបានប្រើយ៉ាងពេញនិយមពីសំណាក់អ្នកប្រើប្រាស់ទាំងប្រុស និងស្រី»។
ក្នុងចំណោម emojis ថ្មីបំផុត ដែលនឹងត្រូវដាក់ឱ្យប្រើប្រាស់ដោយក្រុមហ៊ុន Meta នៅលើ Facebook នោះរូបព្យាយាមទប់ទឹកភ្នែក រូបដៃរាងបេះដូង និងរូបលួចបើកភ្នែកមើល ហាក់ដូចជាទទួលបានការគាំទ្រខ្លាំងជាងគេបំផុត។
យោងតាមទិន្នន័យដែលដកស្រង់សម្ដីស្ថាបនិកក្រុមហ៊ុន Meta លោក Mark Zuckerberg បានប្រកាសថា Reactions នៅលើ WhatsApp កំពុងតែត្រូវបានបន្តអភិវឌ្ឍដើម្បីបញ្ចូលបន្ថែមនៅក្នុងក្តារចុចអេម៉ូជីពេញលេញនិងមានបំពាក់នូវមុខងារជ្រើសរើសពណ៌សម្បុរផងដែរ។
លោក បានឱ្យដឹងថា៖ «អ្នកប្រើប្រាស់នឹងអាចប្រើ emoji មួយណាក៏បាន នៅពេលចង់ផ្ដល់ Reaction ផ្សេងៗទៅនឹងសាររបស់ពួកគេដែលនឹងធ្វើឱ្យការសន្ទនាកាន់តែរីករាយទ្វេដង»។
អេម៉ូជីរបស់ប្លេតហ្វម WhatsApp មានកិច្ចសហការជាមួយក្រុមហ៊ុនបង្កើតអេម៉ូជី Emojipedia ដើម្បីស្វែងរករូបភាពអេម៉ូជីល្បីៗ និងជជែកពិភាក្សាអំពី emojis ថ្មីៗបំផុតមួយចំនួន ដែលអ្នកអាចរំពឹងថា នឹងឃើញមាននៅក្នុងការសន្ទនាស្រាប់ៗរបស់អ្នកដោយអ្នកពុំចាំបាច់ខាតពេលស្វែងរកព័ត៌មានដើម្បីស្វែងយល់ពីអត្ថន័យរបស់វា។
រូបមួកពណ៌ខៀវ៖ឃ្លា ''cap'' ឬ ''capping'' ជាមួយនឹងបណ្ដាញ Emoji ដែលភ្ជាប់មកជាមួយវានោះពេលខ្លះគឺត្រូវបានប្រើប្រាស់ពេលនរណាម្នាក់និយាយកុហកឬនិយាយមិនពិត។ ប្រសិនបើនរណាម្នាក់ប្រើអេម៉ូជីនេះដើម្បី React លើសាររបស់អ្នកនោះ បានសេចក្ដីថា ពួកគេមិនជឿលើសម្ដីរបស់អ្នកនោះទេ។
Meta បានបន្ដថា រូបមុខកំពុងរលាយគឺជាអេម៉ូជីថ្មីនិងពេញនិយមបំផុតដែលជាញឹកញាប់សំដៅទៅលើការនិយាយលេងសើចបែបចំអក។ វាអាចត្រូវបានគេប្រើនៅពេលដែលអ្នកកំពុងតែរលាយដោយសារកម្ដៅក្នុងរដូវក្តៅនេះដូចជារូបមុខដែលក្តៅខ្លាំង ឬពេលដែលបង្ហាញសញ្ញានៃការខ្មាសអៀន ឬភាពឆ្កួតលីលាដូចជារូបមុខផ្កាប់ចុះក្រោមជាដើម។
រូបដៃកត់ត្រាជាញឹកញាប់ត្រូវបានគេប្រើបែបលេងសើចដើម្បីបង្ហាញថា លោកអ្នកកំពុងតាំងចិត្តស្តាប់យ៉ាងយកចិត្តទុកដាក់ទៅនឹងសាររបស់នរណាម្នាក់ឬ«កត់ត្រា»លើដំបូន្មានរបស់នរណាម្នាក់។
យោងតាមក្រុមហ៊ុន Meta បានបង្ហាញថា៖ «ប្រវត្តិសាស្ត្ររបស់មនុស្ស បានបង្ហាញថា រូបភាពមានតម្លៃជាងពាក្យសម្តី។ ការកើនឡើងនៃការប្រាស្រ័យទាក់ទងតាមរូបភាពបាននាំឱ្យមានវាក្យស័ព្ទថ្មីៗនៃ emojis, GIFs និងការផ្ញើសារជារូបភាពដែលធ្វើឱ្យយើងបញ្ចេញមតិបានក្បោះក្បាយជាងពេលមុនៗ»៕
