កំពង់ចាមៈ លោក ឈា ប៊ុនរិទ្ធ អគ្គនាយកកិច្ចការបច្ចេកទេស ដែលជាប្រធានមុខព្រួញខេត្តកំពង់ចាមនៃក្រសួងធនធានទឹក និងឧតុនិយមបានណែនាំឱ្យមន្ទីរធនធានទឹក និងឧតុនិយមខេត្តធ្វើការផ្សព្វផ្សាយប្រាប់ដល់ប្រជាពលរដ្ឋ ដែលរស់នៅតាមដងព្រែក និងដងទន្លេមេគង្គឱ្យបង្កើនការប្រុងប្រយ័ត្នខ្ពស់ជាមួយនឹងស្ថានភាពការហក់ឡើងនៃទឹកទន្លេមេគង្គ និងទឹកភ្លៀងនាពេលបច្ចុប្បន្ន និងពេលខាងមុខនេះផងដែរ។ នេះបើយោងតាមក្រសួងធនធានទឹកនៅថ្ងៃទី ២២ កក្កដានេះ។
ការណែនាំនេះត្រូវបានធ្វើឡើងនៅពេលដែលលោកឈា ប៊ុនរិទ្ធ ដឹកនាំមន្ត្រីជំនាញនាយកដ្ឋានពាក់ព័ន្ធនៃក្រសួងធនធានទឹក និងឧតុនិយម សហការជាមួយលោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តចុះពិនិត្យស្ថានភាពទឹក និងប្រព័ន្ធធារាសាស្ត្រមួយចំនួនព្រមទាំងការងារបង្កបង្កើនផលស្រូវរដូវវស្សានៅក្នុងខេត្តកំពង់ចាម។
ចំពោះការងារគ្រប់គ្រងទឹក ប្រធានមន្ទីរធនធានទឹក និងឧតុនិយមខេត្តកំពង់ចាមក៏បានបង្កើនការយកចិត្តទុកដាក់លើការគ្រប់គ្រងបរិមាណទឹកតាមទំនប់អាងទឹកនីមួយៗ។ ក្នុងនោះលោកបានចាត់ឱ្យមានឆ្មាំប្រចាំការជាប់ជាប្រចាំ សម្រាប់បញ្ជាការបិទ-បើកទ្វារទឹក ក្នុងបរិបទដែលកម្ពុជាកំពុងទទួលរងនូវឥទ្ធិពលពីជ្រលងនៃប្រព័ន្ធសម្ពាធទាប ក៏ដូចជាការត្រៀមបង្ការ និងទប់ស្កាត់នូវគ្រោះមហន្តរាយនានាដែលអាចកើតមានឡើងជាយថាហេតុនាចុងរដូវវស្សានេះ។
លោកអ៊ុម វិបុល ក៏បានបញ្ជាក់ផងដែរថា ដោយមានភ្លៀងដើមរដូវជាហូរហែមក គិតរហូតមកដល់ពេលនេះ ខេត្តកំពង់ចាម ល្បឿននៃការបង្កបង្កើនផលស្រូវរដូវវស្សាអនុវត្តបានចំនួន៨៦១៣៨ហិកតា ស្មើ៩៩,៥៨% លើផែនការសរុបចំនួន ៨៦៥០០ហិកតា។
លោកឈា ប៊ុនរិទ្ធ និងក្រុមការងារក៏បានចុះពិនិត្យជាក់ស្តែងនូវស្ថានភាពប្រព័ន្ធធារាសាស្ត្រមួយចំនួនដែលទើបតែបញ្ចប់ការសាងសង់រួច និងជួសជុលព្រមទាំងបណ្តាប្រព័ន្ធធារាសាស្ត្រមួយចំនួនទៀតនៅក្នុងខេត្តកំពង់ចាម៕
