ក្រសួងប្រៃសណីយ៍ ណែនាំឱ្យប្រតិបត្តិករទូរស័ព្ទត្រូវបញ្ឈប់សេវាខ្ចីលុយជូនអតិថិជន បន្ទាប់ពីកម្មវិធីទាំងនេះត្រូវបានមហាជនប្រតិកម្ម និងមានការខឹងសម្បា។ ហេង ជីវ័ន
ភ្នំពេញៈ ក្រសួងប្រៃសណីយ៍ និងទូរគមនាគមន៍ណែនាំឱ្យប្រតិបត្តិករទូរស័ព្ទទាំងអស់ត្រូវបញ្ឈប់ការប្រើប្រាស់សេវាខ្ចីលុយជូនអតិថិជនបន្តទៀត បន្ទាប់ពីកម្មវិធីទាំងនេះត្រូវបានមហាជនប្រតិកម្ម និងមានការខឹងសម្បា នៅពេលទឹកប្រាក់ក្នុងទូរស័ព្ទរបស់ពួកគេត្រូវបានកាត់ចេញដោយមិនដឹងមូលហេតុ។
ថ្មីៗនេះ មានវីដេអូមួយដែលបង្ហោះដោយម្ចាស់គណនីហ្វេសប៊ុកឈ្មោះ “យាយគុំ ទឹកឆា” និងត្រូវបានចែកចាយពេញបណ្តាញសង្គមអំពីស្ត្រីម្នាក់បានសម្តែងការខឹងសម្បាយ៉ាងខ្លាំងនឹងក្រុមហ៊ុនស្មាតអាស្សាតា ដែលបានកាត់លុយដោយមិនដឹងមូលហេតុ នៅពេលគាត់បញ្ចូលទឹកប្រាក់ក្នុងទូរស័ព្ទរបស់គាត់។ សេចក្តីប្រកាសព័ត៌មានរបស់ក្រសួងបញ្ជាក់ថា បន្ទាប់ពីឃើញករណីនេះ អគ្គាធិការដ្ឋាននៃក្រសួងប្រៃសណីយ៍ និងទូរគមនាគមន៍ (កបទ) សហការជាមួយនិយតករទូរគមនាគមន៍កម្ពុជា (នទក) បានចុះទៅសិក្សាស្វែងយល់ ដើម្បីពិនិត្យ និងដោះស្រាយករណីនេះភ្លាម។
ក្រសួងបានបន្តថា ក្រោយពីបានពិនិត្យ និងសាកសួរអ្នកស្រី កុល សុខគុំ ដែលជាអ្នកជួបបញ្ហានេះផ្ទាល់បានរកឃើញថា ការកាត់ទឹកប្រាក់របស់គាត់ គឺបណ្តាលមកពីលេខទូរស័ព្ទនេះនៅជំពាក់លុយដែលបានខ្ចី នៅពេលដែលទូរស័ព្ទមិនអាចហៅចេញ ហើយនៅពេលដែលបញ្ចូលទឹកប្រាក់ឡើងវិញ ក្រុមហ៊ុនក៏បានកាត់លុយនោះសងត្រឡប់វិញភ្លាមៗ ខណៈអ្នកស្រីក៏បានបញ្ជាក់ថាពុំបានដឹងអំពីការខ្ចីនោះឡើយ ដែលជាមូលហេតុធ្វើឱ្យរូបគាត់ខឹងសម្បាពីការកាត់លុយនោះ។
ក្រសួងសង្កត់ធ្ងន់ថា៖ «ក្នុងន័យនេះ ដើម្បីការពារកុំឱ្យមានករណីខ្ចីលុយដោយសាមីខ្លួនមិនបានដឹង នទក បានណែនាំឱ្យប្រតិបត្តិករទូរស័ព្ទទាំងអស់ត្រូវបញ្ឈប់ការប្រើប្រាស់សេវាខ្ចីលុយជូនអតិថិជនបន្តទៀត ដើម្បីចៀសវាងកុំឱ្យមានការភាន់ច្រឡំផ្សេងៗក្នុងគោលដៅការពារផលប្រយោជន៍របស់អ្នកប្រើប្រាស់»។ ក្រៅពីណែនាំបែបនេះក្រសួងប្រៃសណីយ៍ និងទូរគមនាគមន៍ ក៏បានណែនាំឱ្យសាធារណជនអាចទស្សនាវីដេអូពន្យល់ពីវិធីផ្តាច់គម្រោងនេះតាមរយៈទំព័រហ្វេសប៊ុក ក្រសួងប្រៃសណីយ៍ និងទូរគមនាគមន៍ ឬស្គែន QR Code ឬតាមរយៈតំណភ្ជាប់ https://fb.watch/eq5gO55sjc/ ដោយអំពាវនាវដល់អ្នកប្រើប្រាស់ដែលជួបបញ្ហាផ្សេងៗពាក់ព័ន្ធនឹងសេវាទូរគមនាគមន៍ក៏អាចប្តឹងតវ៉ាមកនាយកដ្ឋានកិច្ចការពារអ្នកប្រើប្រាស់នៃ នទក តាមរយៈទូរស័ព្ទ 6789 ដើម្បីដោះស្រាយជូន។
ក្រសួងបញ្ជាក់ថា៖ «កន្លងមក កបទ បានយកចិត្តទុកដាក់យ៉ាងខ្លាំងលើកិច្ចការពារសិទ្ធិអ្នកប្រើប្រាស់ ជាពិសេសបញ្ហាកាត់ទឹកប្រាក់ទូរស័ព្ទពីប្រតិបត្តិករដោយពុំដឹងមូលហេតុ ឬការតភ្ជាប់សេវាផ្សេងៗដោយមិនបានដឹងជាដើម ដោយបានដាក់ឱ្យអនុវត្តលេខកូដរួម *1200# ដើម្បីអនុញ្ញាតឱ្យអ្នកប្រើប្រាស់អាចផ្តាច់គម្រោងដែលមិនចាំបាច់...»។
អ្នកលេងបណ្តាញសង្គមម្នាក់ក្នុងចំណោមគណនីជាច្រើនទៀតដែលប្រើគណនីឈ្មោះ ណា កូមី បានបញ្ចេញមតិនៅលើទំព័រហ្វេសប៊ុករបស់ក្រសួងប្រៃសណីយ៍ ដោយបង្ហាញការគាំទ្រចំណាត់ការនេះ។ ម្ចាស់គណនីនេះក៏បានស្នើក្រសួង ត្រួតពិនិត្យសេវាកម្មរបស់ប្រតិបត្តិករមួយចំនួន ដែលមិនអាចផ្តាច់សេវានានាតាមការអនុវត្តលេខកូដរួម *1200# ខណៈការតេទាក់ទងទៅលេខ customer services (call center) របស់ក្រុមហ៊ុនទាំងនោះត្រូវចំណាយពេលតេ ហើយចុចច្រើនដងទើបអាចជួបជាមួយភ្នាក់ងារបាន។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាថ្លែងថា នេះមិនមែនជាករណីថ្មីនោះទេ។ ពលរដ្ឋខាតបង់ផលប្រយោជន៍ជាច្រើនទាំងការកាត់លុយដោយមិនដឹងមូលហេតុ ថែមទាំងការផ្តល់សេវាមិនល្អទៀតផង។ «កន្លងមកយើងឃើញមាននីតិវិធីច្រើនទៅលើបញ្ហានេះ ក៏ប៉ុន្តែវានៅតែមានបញ្ហា...»៕
វីដេអូ៖
