លោកស្រី ឱ វណ្ណឌីន (ឆ្វេង) និងស្ត្រីសង្ស័យកើតជំងឺអុតស្វា។ រូបថត ហ្វេសប៊ុក
សៀមរាបៈ ប្រធានមន្ទីរពេទ្យខេត្តសៀមរាប លោកវេជ្ជបណ្ឌិត ប៉ែន ផលគុណ បញ្ជាក់ឱ្យដឹងថា ស្ត្រីមានផ្ទៃពោះ ៨ ខែ ដែលមានរោគសញ្ញាចេញពងទឹកនៅលើដើមទ្រូង និងដៃនោះ មិនមែនជាជំងឺអុតស្វាទេ ប៉ុន្តែវាជាជំងឺអុតស្វាយ ហើយមកដល់ពេលនេះ អ្នកជំងឺរូបនេះ មានស្ថានភាពល្អប្រសើរច្រើនហើយ។
លោក ប៉ែន ផលគុណ បានប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែកក្កដាថា៖ «ស្ថានភាពរបស់ស្រី្តមានផ្ទៃពោះរូបនេះបានធូរស្រាលច្រើនហើយ ហើយគាត់មានជំងឺអុតស្វាយដែលមានពងទឹកថ្លាៗ ខុសពីជំងឺអុតស្វា»។
ទាក់ទងនឹងករណីស្ត្រីរូបនេះ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានធ្វើការច្រានចោលទាំងស្រុងនូវការផ្សព្វផ្សាយព័ត៌មានមិនពិតដែលបានលើកឡើងថា ស្ត្រីមានផ្ទៃពោះ ៨ ខែ ១ រូបនៅខេត្តសៀមរាបមានកើតជំងឺអុតស្វា បន្ទាប់ពីស្ត្រីរូបនេះមានរោគសញ្ញាចេញពងទឹកនៅលើដើមទ្រូង និងដៃ ដែលស្រដៀងទៅនឹងជំងឺអុតស្វា។
លោក ម៉ម ប៊ុនហេង បញ្ជាក់ដូចនេះ តាមរយៈសេចក្តីជូនព័ត៌មានកាលពីថ្ងៃទី ២៧ កក្កដា ដោយលោកបានលើកឡើងថា មន្ទីរពេទ្យខេត្តសៀមរាបបានទទួលអ្នកជំងឺម្នាក់ដែលជាស្ត្រីមានផ្ទៃពោះ ៨ ខែ អាយុ ២៣ ឆ្នាំ មានអាសយដ្ឋាននៅភូមិទ្រាំង សង្កាត់ស្លក្រាម ក្រុងសៀមរាប ដែលស្ត្រីរូបនេះមានរោគសញ្ញាចេញពងទឹកនៅលើដើមទ្រូង និងដៃ ដែលត្រូវស្វាមីនាំមកពិនិត្យព្យាបាលជំងឺកាលពីថ្ងៃទី ២៥ ខែកក្កដា។
លោកបន្តថា៖ «ក្រុមគ្រូពេទ្យឆ្លើយតបបន្ទាន់នៃមន្ទីរសុខាភិបាលខេត្តសៀមរាបសហការជាមួយក្រុមគ្រូពេទ្យឆ្លើយតបបន្ទាន់របស់នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានចុះទៅសាកសួរពិនិត្យស្ថានភាពអ្នកជំងឺផ្ទាល់ និងបានយកវត្ថុសំណាករបស់អ្នកជំងឺកាលពីថ្ងៃទី ២៦ កក្កដា ពិនិត្យវិភាគនៅមន្ទីរពិសោធន៍ប៉ាស្ទ័រកម្ពុជា និងទទួលបានលទ្ធផលអវិជ្ជមានវីរុសអុតស្វា»។
តាមការបញ្ជាក់ពីលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានឱ្យដឹងថា គិតត្រឹមថ្ងៃទី ២៦ ខែកក្កដា កម្ពុជាមិនទាន់មានករណីជំងឺអុតស្វានៅក្នុងសហគមន៍នៅឡើយទេ គឺមានតែករណីនាំចូលដែលជាបុរសជនជាតិនីហ្សេរីយ៉ាដែលកំពុងសម្រាកព្យាបាលនៅមន្ទីរពេទ្យមិត្ដភាពខ្មែរ-សូវៀត។
ទាក់ទងនឹងស្ថានភាពរបស់អ្នកជំងឺជនជាតិនីហ្សេរីយ៉ា លោក ម៉ម ប៊ុនហេង បានឱ្យដឹងដែរថា អ្នកជំងឺនេះមានសុខភាពល្អធម្មតា ហើយអាចនឹងជាសះស្បើយក្នុងពេលឆាប់ៗ ដោយសារក្រុមគ្រូពេទ្យបានយកចិត្តទុកដាក់ ពិនិត្យព្យាបាលយ៉ាងល្អ។ លោកក៏បានបន្តធ្វើការអំពាវនាវទៅដល់ប្រជាពលរដ្ឋទាំងអស់ត្រូវតែប្រុងប្រយ័ត្នខ្ពស់ ចំពោះជំងឺអុតស្វានេះ ទោះមាន ១ ករណីដែលជាករណីនាំចូលក៏ដោយ ប៉ុន្ដែបើមិនមានការពិនិត្យតាមដានឱ្យបានហ្មត់ចត់ វានឹងអាចឆ្លងចូលសហគមន៍បាន។
រោគសញ្ញានៃជំងឺអុតស្វាមានដូចជា ចេញកន្ទួលរមាស់បែបពងទឹកនៅលើដងខ្លួន បាតដៃ បាតជើង និងផ្ទៃមុខ អមដោយរោគសញ្ញាក្តៅខ្លួនលើសពី ៣៨,៥ អង្សាសេ និងមានឈឺក្បាល ហើមកូនកណ្តុរ ឈឺសាច់ដុំ និងខ្លួនប្រាណ ឈឺចង្កេះ អស់កម្លាំងខ្លាំង និងរួមជាមួយនឹងប្រវត្តិធ្វើដំណើរទៅកន្លែង ដែលមានកើតជំងឺអុតស្វា។
ចំណែកវិធានការការពារការឆ្លងជំងឺនេះ គឺត្រូវអនុវត្តអនាម័យខ្លួនប្រាណ និងរស់នៅស្អាត ដោយធ្វើអនាម័យដៃស្អាតដោយសម្អាតជាមួយសាប៊ូ ឬជែលអាល់កុល ដោយត្រូវចៀសវាងការប៉ះពាល់ដោយផ្ទាល់ជាមួយអ្នកដែលមានជំងឺនេះ ឬបុគ្គលដែលសង្ស័យ រួមទាំងការរួមភេទ ជាពិសេសការប៉ះពាល់ស្បែក ឬកន្លែងដែលមានចេញពងទឹកបែក និងត្រូវចៀសវាងប៉ះពាល់សម្ភារប្រើប្រាស់របស់អ្នកជំងឺ ឬបុគ្គលដែលសង្ស័យ ដូចជាសម្លៀកបំពាក់ ពូក ខ្នើយ ចាន ស្លាបព្រា កែវទឹក ជាដើម ហើយត្រូវបោកគក់ ឬលាងសម្អាតឱ្យបានត្រឹមត្រូវនូវសម្ភារប្រើប្រាស់របស់បុគ្គលនេះដោយឡែក៕
