មន្ត្រីក្រសួងការងារ ពេលចុះផ្សព្វផ្សាយនិងពន្យល់ដល់កម្មករ ពីរបបសន្ដិសុខសង្គមផ្នែកប្រាក់សោធន ។ រូបថត ក្រសួងការងារ
ភ្នំពេញៈ បេឡាជាតិរបបសន្តិសុខសង្គម (ប.ស.ស) បានឱ្យដឹងថា គិតត្រឹមថ្ងៃទី ២០ ខែសីហា មានកម្មករនិយោជិតសរុបជាង ៧៨ ម៉ឺននាក់ ឬស្មើនឹង ១ ៦០០ លើក បានចូលរួមឈ្វេងយល់ស្តីពីរបបសន្ដិសុខសង្គមផ្នែកប្រាក់សោធន តាមរយៈយុទ្ធនាការ ៩០ ថ្ងៃ ចុះផ្សព្វផ្សាយរបបសន្តិសុខសង្គមផ្នែកប្រាក់សោធនទូទាំងប្រទេស។
លោក ហេង សុផាន់ណារិទ្ធ អគ្គនាយករង បសស បានប្រាប់ភ្នំពេញប៉ុស្តិ៍នៅថ្ងៃទី ២១ សីហាថា មានកម្មករនិយោជិតសរុបប្រមាណជាង ៧៨ ម៉ឺននាក់ បានចូលរួមឈ្វេងយល់ស្តីពីរបបសន្ដិសុខសង្គមផ្នែកប្រាក់សោធនចំនួន ១ ៦០០ លើក គិតត្រឹមថ្ងៃទី ២០ ខែ សីហា ឆ្នាំ ២០២២ ។
តួលេខនេះ គឺយោងតាមរបាយការណ៍ស្ដីពីយុទ្ធនាការ ៩០ថ្ងៃ នៃការចុះផ្សព្វផ្សាយរបបសន្តិសុខសង្គមផ្នែកប្រាក់សោធន របស់ក្រុមការងារត្រីភាគីសម្រាប់ការចុះយុទ្ធនាការផ្សព្វផ្សាយរបបសន្តិសុខសង្គមផ្នែកប្រាក់សោធននៅទូទាំង ២៥ រាជធានី-ខេត្ត។
លោកបញ្ជាក់ថា៖«តាមរយៈយុទ្ធនាការផ្សព្វផ្សាយរបបសន្តិសុខសង្គមផ្នែកប្រាក់សោធនខាងលើនេះ គឺទទួលបានលទ្ធផលល្អប្រសើរ ដោយមានកិច្ចសហការយ៉ាងល្អពីសំណាក់ភាគីនិយោជក ដែលជាម្ចាស់សហគ្រាស គ្រឹះស្ថាន»។
ជាមួយគ្នានេះ លោកហេង សុផាន់ណារិទ្ធ បានឱ្យដឹងបន្តថា បសស បាននិងកំពុងបន្តបង្កើនការផ្សព្វផ្សាយឱ្យកាន់តែទូលំទូលាយបន្ថែមទៀតទៅកាន់ កម្មករនិយោជិតទូទាំងប្រទេស ដោយធ្វើយ៉ាងណាឱ្យពួកគាត់ទាំងអស់បានយល់ដឹងកាន់តែច្បាស់ អំពីការអនុវត្តរបបសន្តិសុខសង្គមផ្នែកប្រាក់សោធនថ្មីមួយនេះ។
លោកបញ្ជាក់ថា៖«ចំពោះរោងចក្រ សហគ្រាស គ្រឹះស្ថានដែលបានចុះបញ្ជិកាជាមួយ បសស ផ្នែកហានិភ័យការងារ និងផ្នែកថែទាំសុខភាពរួច នៅពេលដល់ខែតុលា ខាងមុខ និងត្រូវបានចុះបញ្ជិការបបសន្តិសុខសង្គមផ្នែកប្រាក់សោធន ដោយស្វ័យប្រវត្តិ ចំនួនប្រហាក់ប្រហែលជាង ១លាន៣សែននាក់»។
កាលពីថ្ងៃទី៥ ខែកក្កដា ឆ្នាំ២០២២ កម្ពុជាបានចេញបទប្បញ្ញត្តិអនុវត្តប្រព័ន្ធសោធននិវត្តន៍របស់បេឡាជាតិរបបសន្តិសុខសង្គម (បសស) ខណៈក្រសួងការងារ ប្រកាសថា ការបង់ភាគទានប្រាក់សោធននិវត្តន៍នឹងចាប់ផ្តើមកាត់ដោយស្វ័យប្រវត្តិចាប់ពីថ្ងៃទី១ ខែតុលា ឆ្នាំ២០២២តទៅ។
លោក មឿន តុលា នាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្សថ្លែងថា ការផ្តល់កម្មវិធីប្រាក់សោធនដល់វិស័យឯកជន គឺជារឿងមួយដែលល្អសម្រាប់កម្មករ ដែលអាចទទួលបានផលប្រយោជន៍ពីកម្មវិធីរបបសន្តិសុខសង្គមនេះ។
យ៉ាងណាក្តី លោក រំពឹងថា អត្ថប្រយោជន៍ដែលកម្មករក្នុងវិស័យឯកជនទទួលបានក្នុងពេលចូលនិវត្តន៍ ក៏សមរម្យផងដែរ ខណៈលោក ចង់ឃើញការចូលរួមចំណែកផ្តល់ឱ្យដោយរដ្ឋបន្ថែមទៀត ចំពោះការផ្តល់ជូននេះ ព្រោះតែការបង់ភាគទាន គឺមានតែក្រុមហ៊ុន និងកម្មករខ្លួនឯងសុទ្ធសាធ។
លោក បានរៀបរាប់ថា៖«អ្វីដែលខ្ញុំតាមដានកន្លងមក គឺឃើញការបង់ភាគទាននេះ គឺមិនឃើញខាងរដ្ឋចេញសោះ គឺឃើញមានតែខាងក្រុមហ៊ុន និងកម្មករនិយោជិត។ ខ្ញុំ គិតថា កន្លែងនេះ គួរតែមានចំណែកពីខាងរដ្ឋ ព្រោះរដ្ឋជាអ្នកយកលុយនេះមកគ្រប់គ្រង ហើយបន្ទាប់មកបានផ្តល់ជូនទៅកម្មករ ពេលចូលនិវត្តន៍។ កម្មករទាំងអស់ សុទ្ធតែបានបង់ពន្ធប្រាក់ខែចូលរដ្ឋហើយ ដូច្នេះ រដ្ឋនៅតែមានចំណែកក្នុងការដាក់បញ្ចូលក្នុងប្រាក់សោធននេះ»។
ក្រៅលើកឡើងបែបនេះ លោក មឿន តុលា ក៏ចង់ឃើញការទុកដាក់ចំណែកសន្សំរបស់កម្មករនូវប្រាក់សោធននេះ ឱ្យមានតម្លាភាពផងដែរ ហើយត្រូបង្ហាញតម្លាភាព និងគណនេយ្យភាព ពេលរដ្ឋយកថវិកាទាំងនោះ ទៅធ្វើការវិនិយោគលើកិច្ចការអ្វីមួយ។
សូមជម្រាបថា ច្បាប់ស្តីពីរបបសន្តិសុខសង្គមបានកំណត់ការគ្រប់គ្រងរបបសន្តិសុខសង្គមចំនួន ៤ ដែលរួមមាន ផ្នែកហានិភ័យការងារ ផ្នែកថែទាំសុខភាព ផ្នែកប្រាក់សោធន និងផ្នែកនិកម្មភាពការងារ។
មកដល់ពេលនេះ កម្ពុជា បានអនុវត្តរបបសន្តិសុខសង្គមចំនួន៣រួចមកហើយ គឺទី១. ផ្នែកហានិភ័យការងារអនុវត្តនៅឆ្នាំ ២០០៨ ទី២. ផ្នែកថែទាំសុខភាពអនុវត្តនៅឆ្នាំ ២០១៦ និងទី៣. ផ្នែកប្រាក់សោធន ដែលនឹងត្រូវចាប់ផ្តើមអនុវត្តចាប់ពីខែតុលា ឆ្នាំ ២០២២តទៅ។ នេះបើតាមក្រសួងការងារ។
គិតត្រឹមខែមិថុនា បសស បានទទួលចុះបញ្ជីសហគ្រាស គ្រឹះស្ថានក្នុងវិស័យឯកជនប្រមាណ ១ ម៉ឺនស្ថាប័ន ដោយក្នុងនោះ មានបុគ្គលិកប្រមាណ ២ លាននាក់ បាននិងកំពុងស្ថិតក្នុងបញ្ជីរបស់ បសស ដើម្បីទទួលអត្ថប្រយោជន៍ផ្នែកហានិភ័យការងារ និងផ្នែកថែទាំសុខភាព៕
វីដេអូ៖
