សកម្មភាពចុះបង្ក្រាបបទល្មើសនេសាទរបស់សមត្ថកិច្ចខេត្តបាត់ដំបង នៅតំបន់រ៉ាមសារព្រែកទាល់នៅថ្ងៃទី ២៥ សីហា។ រូបថត នគរបាល
បាត់ដំបងៈ សមត្ថកិច្ចខេត្តបាត់ដំបង នៅថ្ងៃទី ២៥ សីហា បានចុះបង្ក្រាបបទល្មើសនេសាទចំនួន ០៤ ទីតាំង នៅតំបន់រ៉ាមសារព្រែកទាល់ ក្នុងភូមិសាស្ត្រស្រុកឯកភ្នំ ដោយបង្ក្រាបបានសាច់មងជិត ១ ៨០០ ម៉ែត្រនិងបង្គោលជាង ៥០០ ដើម។ នេះបើយោងតាមអគ្គស្នងការដ្ឋាននគរបាលជាតិចុះផ្សាយនៅថ្ងៃទី ២៦ សីហា។
ប្រតិបត្តិការចុះបង្ក្រាបនេះ ដឹកនាំដោយលោកវរសេនីយ៍ទោ យ៉ន រិទ្ធី នាយរងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបាត់ដំបង សហការជាមួយលោកវរសេនីយ៍ឯក ឡុង យោធាវីរ: អធិការនគរបាលស្រុកឯកភ្នំ រួមសហការជាមួយកម្លាំងចម្រុះ សរុបចំនួន ២៦ នាក់ ប្រើប្រាស់កាណូតស្មាច់ចំនួន ៥ គ្រឿង។
ទីតាំងទាំង ៤ កន្លែងដែលត្រូវបានបង្ក្រាបនៅតំបន់រ៉ាមសារព្រែកទាល់នោះមានទីតាំងទី ១ ត្រង់ចំណុចស្រោងកណ្តៀរវិច បង្ក្រាបសាច់មងចំនួន ៤០០ ម៉ែត្រ បង្គោលចំនួន ១៥០ ដើម និងក្បាលឡុកចាប់ត្រីចំនួន ០១ គ្រឿង។
ទីតាំងទី ២ ត្រង់ចំណុចចុងចែងពាក់កន្ទេល បង្ក្រាបសាច់មងបានចំនួន ៥០០ ម៉ែត្រ បង្គោលចំនួន ១០០ ដើម និងក្បាលឡុកចាប់ត្រីចំនួន ០១ គ្រឿង។
ទីតាំងទី៣ ត្រង់ចំណុចអាតាំងបៀវ បង្ក្រាបសាច់មងបានចំនួន ៤០០ ម៉ែត្រ បង្គោលចំនួន ៩០ ដើម និងក្បាលឡុកចាប់ត្រីចំនួន ០១ គ្រឿងនិងទីតាំងទី៤ ត្រង់ចំណុចអាកាប់ បង្ក្រាបសាច់មងចំនួន ៥៥០ ម៉ែត្រ បង្គោលចំនួន ១៧០ ដើម និងក្បាលឡុកចាប់ត្រីចំនួន ០២ គ្រឿង។
រាល់វត្ថុតាងដែលសមត្ថកិច្ចបង្ក្រាបបានត្រូវបានរៀបចំកាប់បំផ្លាញ និងដុតចោលនៅនឹងកន្លែង ចំណែកជនល្មើសបានរត់គេចខ្លួនមុនពេលសមត្ថកិច្ចចុះអន្តរាគមន៍។
ក្នុងប្រតិបត្តិការនេះ សមត្ថកិច្ច ក៏បានលែងកូនត្រីចម្រុះចំនួន ៧០ គីឡូក្រាមចូលក្នុងបឹងធម្មជាតិវិញផងដែរ៕
