ថ្នាក់ដឹកនាំរដ្ឋបាលរាជធានីភ្នំពេញ ចុះទស្សនកិច្ចទិដ្ឋភាពទូទៅនៃសម្ពន្ធ័ក្រុមហ៊ុនកែច្នៃសំរាមវៀតណាម នៅទីក្រុងហាណូយកាលពីថ្ងៃទី៥កញ្ញា។ រូបថត រដ្ឋបាលរាជធានីភ្នំពេញ
ភ្នំពេញៈលោក ឃួង ស្រេង អភិបាលរាជធានីភ្នំពេញ បានស្វាគមន៍ចំពោះបណ្តាក្រុមហ៊ុនពីប្រទេសវៀតណាម ដែលមានបំណងធ្វើការវិនិយោគលើការកែឆ្នៃ និងបំប្លែងកាកសំណល់សំរាមទៅជាថាមពលអគ្គិសនី និងបំប្លែងទឹកកខ្វក់ទៅជាទឹកស្អាត ក៏ដូចជាការទុកដាក់សំរាមបំបាត់ក្លិនជាដើម។
អភិបាលរាជធានីភ្នំពេញ បានលើកឡើងដូចនេះ ក្នុងដំណើរទស្សនកិច្ចផ្លូវការរបស់លោកនៅប្រទេសវៀតណាមចាប់ពីថ្ងៃទី ០៤ ដល់ទី ៨ ខែកញ្ញា ក្នុងគោលដៅរឹតចំណងមិត្តភាព សាមគ្គីភាព និងកិច្ចសហប្រតិបត្តិការឱ្យកាន់តែល្អប្រសើរ លើវិស័យបរិស្ថាន សំរាម អប់រំ ទេសចរណ៍ បណ្តុះបណ្តាលនិងវិស័យសុខាភិបាលក្នុងនាមទីក្រុងសម្ព័ន្ធមេត្រីភាពទាំង២ រាជធានីភ្នំពេញនិងរដ្ឋធានីហាណូយ។
នាថ្ងៃទី ៥ កញ្ញា លោក ឃួង ស្រេង លោក ចាយ ណាវុធ ឯកអគ្គរាជទូតកម្ពុជាប្រចាំសាធារណរដ្ឋសង្គមនិយមវៀតណាម និងលោក NGUYEN TRONGDONG អភិបាលរងរដ្ឋធានីហាណូយ បានចុះទស្សនកិច្ចទិដ្ឋភាពទូទៅនៃសម្ពន្ធ័ក្រុមហ៊ុន CNTY.EUZY និងគម្រោងសាងសង់រោងចក្រថាមពលសកម្មភាព និងគម្រោងបច្ចេកទេសរបស់ក្រុមហ៊ុនថាមពលពីកាកសំណល់ SOC.SON នៃបរិស្ថានធានអ៊ីហាណូយ និងគម្រោងរោងចក្រអគ្គិសនីបំប្លែងចេញពីកាកសំណល់ Soc Son។
យោងតាមសេចក្តីប្រកាសរបស់រដ្ឋបាលរាជធានីភ្នំពេញ នៅថ្ងៃទី ០៦ ខែកញ្ញា បានឱ្យដឹងថា ឆ្លងកាត់រយៈពេលជាច្រើនឆ្នាំដំណើរការអភិវឌ្ឍយ៉ាងខ្លាំងក្លា បច្ចុប្បន្នសម្ព័ន្ធក្រុមហ៊ុននេះបានជាប់ចំណាត់ថ្នាក់លេខ ៣ នៅលើពិភពលោក ក្នុងវិស័យប្រតិបត្តិការបរិស្ថានទីក្រុងដែលមានវិសាលភាពនៅក្នុងប្រទេសជាង ៣០ មានរោងចក្រ កម្ចាត់កាកសំណង់រឹងជាង ៣០០ កន្លែង នៅទូទាំងពិភពលោក។
សម្ព័ន្ធក្រុមហ៊ុននេះ មានសមត្ថភាពកែឆ្នៃសំរាមរហូតដល់ ៥ ម៉ឺនតោន ក្នុង ១ ថ្ងៃ ជាមួយបុគ្គលិកសរុបជាង ៨ ម៉ឺននាក់ ក្នុងនោះមានបុគ្គលិកជាង៦ម៉ឺននាក់ជាជនជាតិអឺរ៉ុប។ ជាមួយគ្នានេះក៏បានកាត់បន្ថយកាកសំណល់ លើកកម្ពស់ប្រសិទ្ធភាពនៃការប្រើប្រាស់ដីធ្លី និងកាត់បន្ថយការបំពុលបរិស្ថានផងដែរ។
នាឱកាសនោះដែរ បន្ទាប់ពីធ្វើទស្សនកិច្ចនៅក្រុមហ៊ុននេះរួចមក លោក ឃួង ស្រេង បានលើកឡើងពីការស្វាគមន៍របស់រដ្ឋបាលរាជធានីភ្នំពេញ ប្រសិនបើបណ្តាក្រុមហ៊ុនពីវៀតណាម មានបំណងវិនិយោគលើការកែច្នៃ និងបំប្លែងកាកសំណល់សំរាមទៅជាថាមពលអគ្គិសនី និងបំប្លែងទឹកកខ្វក់ទៅជាទឹកស្អាត ក៏ដូចជាការទុកដាក់សំរាមបំបាត់ក្លិនជាដើម។
លោក ឃួង ស្រេង មានប្រសាសន៍ថា៖ «រាជធានីភ្នំពេញ ដែលកំពុងរីកចម្រើនយ៉ាងលឿនបែបនេះ បញ្ហាប្រឈមតែងកើតមានដូចជាបញ្ហាចរាចរណ៍, សំណង់, បញ្ហាបរិស្ថាន, ប្រពន្ធ័លូ ជាពិសេសបញ្ហាសំរាម នេះតែម្តងដែលរដ្ឋបាលរាជធានីភ្នំពេញ បានយកចិត្តទុកដាក់យ៉ាងខ្លាំងក្លាក្នុងការលើកកម្ពស់បរិស្ថានទីក្រុង រួមជាមួយដៃគូអភិវឌ្ឍមួយចំនួនទៀតផងដែរ»។
លោកបានបន្ថែមទៀតថា រាជធានីភ្នំពេញមានកំណើនប្រជាពលរដ្ឋ យ៉ាងឆាប់រហ័សប្រមាណជាង៣លាននាក់ ចំណែកបរិមាណសំរាមបានកើនឡើងរហូតដល់ជាង ៣ ពាន់តោន ក្នុង ១ ថ្ងៃ ហើយនៅពេលខាងមុខរាជធានីភ្នំពេញ នឹងបង្កើតទីលានចាក់សំរាមថ្មីចំនួន ២ កន្លែងបន្ថែមទៀត ស្ថិតនៅប៉ែកខាងជើង និងខាងលិចរាជធានីភ្នំពេញ និងមានក្រុមហ៊ុនប្រមូលសំរាមចំនួន៣កំពុងប្រតិបត្តិការប្រមូលសំរាមក្នុងរាជធានីភ្នំពេញសព្វថ្ងៃនេះ។
លោក នេត្រ ភក្រ្តា អ្នកនាំពាក្យក្រសួងបរិស្ថាន បានលើកឡើងក្នុងសន្និសីទសារព័ត៌មានកាលពីថ្ងៃទី ៣០ ខែសីហា ថា បច្ចុប្បន្ននេះ កម្ពុជាបង្កើតសំណល់រឹងសំរាមចំនួនជាង ១ ម៉ឺនតោន ក្នុង ១ ថ្ងៃ និងប្រមាណជាង ៤ លានតោន ក្នុង ១ ឆ្នាំ ក្នុងនោះសំណល់សរីរាង្គប្រមាណ ៦០% សំណល់ប្លាស្ទិកប្រហែល ២០% និងសំណល់ទូទៅ ១០%។
លោកបានថ្លែងឱ្យដឹងថា ក្នុង ១ ថ្ងៃៗ សំណល់ដែលត្រូវបានប្រមូលយកទៅចាក់ចូលទីលានសរុបប្រចាំថ្ងៃប្រមាណ ៥ ៥១៧ តោន (២ ០១៣ ៩២៤ តោន/ឆ្នាំ)។ នៅទូទាំងប្រទេសមានទីលានចាក់សំរាមសរុបចំនួន ២១៣ ក្នុងនោះ ទីលានដែលជាកម្មសិទ្ធិរបស់រដ្ឋមានចំនួន ១៤២ ស្មើនឹង ៦៦,៦% និងជាកម្មសិទ្ធិរបស់ឯកជនមាន ៧០ ទីលាន ស្មើនឹង ៣២,៧%។
លោក នេត្រ ភក្ត្រា បានថ្លែងថា៖ «ក្រសួងបរិស្ថាន កំពុងបន្តជំរុញគោលការណ៍ប្រតិបត្តិមេត្រីបរិស្ថានតាមគ្រឹះស្ថានអប់រំ វត្តអារាម និងរៀបចំបន្ទប់ទឹកសាធារណៈក្នុងនោះបានដំឡើងម៉ាស៊ីនចម្រោះទឹកនៅតាមសាលារៀនដើម្បីកាត់បន្ថយសំណល់ប្លាស្ទិក។ ជាមួយគ្នានេះ ក្រសួងក៏បាននិងជំរុញលើកទឹកចិត្តឱ្យប្រើប្រាស់ជីវប្លាស្ទិក ផលិតផលជំនួសប្លាស្ទិក និងការកែច្នៃសំណល់ប្លាស្ទិកផងដែរ»៕
