លោក គង់ សំអាន អាយុ ៧០ ឆ្នាំ អតីត CNRP ដែលជាប់ពន្ធនាគារ ៧ ឆ្នាំរឿងអំពើក្បត់។ រូបថត FB
ភ្នំពេញៈ កញ្ញា គង់ មួយលី បានបង្ហាញនូវបំណងចង់ឃើញឪពុករបស់នាង ឈ្មោះ គង់ សំអាន អាយុ ៧០ ឆ្នាំ ឱ្យមានសេរីភាពឡើងវិញក្នុងអំឡុងពេលបុណ្យភ្ជុំបិណ្ឌ ក្រោយតុលាការសម្រេចដាក់ពន្ធនាគារ ៧ ឆ្នាំ កាលពីឆ្នាំ ២០២០។
នៅថ្ងៃទី ៤ ខែ ឧសភា ឆ្នាំ ២០២២ តុលាការកំពូលសម្រេចតម្កល់សំណុំរឿងលោក គង់ សំអាន ទុកជាបានការដដែល បន្ទាប់ពីតុលាការនេះបានបើកសវនាការ លើបណ្ដឹងសារទុក្ខសំណុំរឿងលោក គង់ សំអាន ដែលបានប្ដឹងប្រឆាំងនឹងការសម្រេចរបស់តុលាការថ្នាក់ក្រោម។ តុលាការថ្នាក់ក្រោម ដែលបានកាត់ទោសឱ្យលោកជាប់ពន្ធនាគារ ៧ ឆ្នាំ កាលពីឆ្នាំ ២០២០។ លោក គង់ សំអាន និងសកម្មជន ៦ នាក់ផ្សេងទៀត មានជាប់ពាក់ព័ន្ធនឹងសំណុំរឿងរួមគំនិតក្បត់ពាក់ព័ន្ធនឹងការធ្វើមាតុភូមិនិវត្តន៍របស់លោក សម រង្ស៊ី ក្នុងឆ្នាំ ២០១៩។
កញ្ញា គង់ មួយលី ថ្លែងថា៖ «ខ្ញុំសុំរាជរដ្ឋាភិបាលនិងលោក ហ៊ុន ម៉ាណែត ជួយឱ្យគេដោះលែងឪពុកខ្ញុំមកវិញផង។ ពិបាកណាស់ពេលពុកខ្ញុំមិននៅបាត់បង់ចំណូលមួយផ្នែក។ ការដោះលែងឪពុកខ្ញុំមកវិញ គឺដើម្បីឱ្យគាត់មានឱកាសផ្ទេរចំណេះដឹងទៅក្មេងជំនាន់ក្រោយ ក្មេងជំនាន់ក្រោយត្រូវការគាត់»។
កញ្ញាថ្លែងបន្តថា៖ «នេះក៏ដោយសារខ្ញុំយល់ថា ឪពុកមានវ័យចាស់ណាស់ហើយ ហើយម្យ៉ាងកំពុងមានជំងឺប្រចាំកាយទៀតដូចជា ជំងឺក្រពះ ដុះសាច់តម្រងនោម និងបញ្ហាមាត់ធ្មេញជាដើម»។
ទោះយ៉ាងណាក៏ដោយ លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានឱ្យដឹងថា ស្ថានភាពសុខភាពរបស់លោក គង់ សំអាន មានសភាពធម្មតាទេមិនធ្ងន់ធ្ងរដូចក្ដីព្រួយបារម្ភរបស់គ្រួសារឡើយ។
លោក សវនា ថ្លែងថា៖ «ខ្ញុំធ្លាប់ជួបគាត់ (លោក គង់ សំអាន) ផ្ទាល់មើលទៅដូចធម្មតាទេ តែខ្ញុំមិនហ៊ានវាយតម្លៃយ៉ាងម៉េចទេ តែខ្ញុំសួរអ្នកជំនាញគេនិយាយប្រាប់ថា សុខភាពគាត់អត់អីទេ ហើយគេក៏ប្រាប់ខ្ញុំដែរថា គាត់មានតែបញ្ហាមាត់ធ្មេញប៉ុណ្ណោះ»។
លោក អំ សំអាត នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ បានអះអាងថា ក្រុមគ្រួសារអ្នកជាប់ឃុំបានចាត់ទុករឿងរ៉ាវរបស់ឪពុកឬប្ដីរបស់ខ្លួនជារឿងនយោបាយ ដូច្នេះហើយទើបពួកគេសង្ឃឹមលើអ្នកនយោបាយដែលអាចនឹងដោះស្រាយបញ្ហារបស់ពួកគេបាន។
លោក អំ សំអាត ថ្លែងថា៖ «ក្នុងនាមជាអង្គការសង្គមស៊ីវិលខ្ញុំយល់ឃើញថា អ្នកនយោបាយទាំងអស់ គួរត្រឡប់មកអនុវត្តវប្បធម៌សន្ទនាឬការចរចាដែលអ្នកនយោបាយខ្មែរធ្លាប់ធ្វើពីដើមមកដើម្បីឱ្យអ្នកជាប់ឃុំបាននៅក្រៅឃុំឬទម្លាក់ចោលបទចោទព្រោះរូបភាពនេះយើងធ្លាប់ឃើញនាពេលកន្លងមក»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ចំពោះការស្នើសុំឱ្យមានកិច្ចអន្តរាគមន៍ដោះលែងសកម្មជននយោបាយក្នុងឱកាសបុណ្យភ្ជុំបិណ្ឌ ឬកាន់បិណ្ឌ វាអាស្រ័យលើលក្ខខណ្ឌអនុវត្តទោសដែលក្រសួងយុត្តិធម៌ធ្លាប់អនុវត្តចំពោះអ្នកទោសទូទៅនាពេលកន្លងមក។
លោក សុខ ឥសាន៖ «មុនដោះលែង ទណ្ឌិតម្នាក់ៗត្រូវបំពេញទោសរបស់ខ្លួន ឱ្យបាន ២ ភាគ ៣ សិន ទើបជាមូលដ្ឋានដើម្បីឱ្យគេយកមកវាយតម្លៃថា បុគ្គលជាទណ្ឌិតហ្នឹងមានការរីកចម្រើនក្នុងការកែប្រែខ្លួនដែរ ឬទេ?»៕
