ថ្នាក់ដឹកនាំនៃមន្ទីរអភិវឌ្ឍន៍ជនបទខេត្តកណ្តាល ពេលចុះទៅផ្ទៀងផ្ទាត់តាមផ្ទះពលរដ្ឋក្នុងស្រុកពញ្ញាឮកាលពីថ្ងៃទី ៨ កញ្ញា។ រូបថត រដ្ឋបាលខេត្តកណ្តាល
កណ្តាលៈ មន្ទីរអភិវឌ្ឍន៍ជនបទខេត្តកណ្តាល កាលពីថ្ងៃទី ៨ កញ្ញា បានចុះផ្ទៀងផ្ទាត់ លើការបញ្ឈប់ការបន្ទោបង់ពាសវាលពាសកាល (ODF) នៅស្រុកពញាឮ បន្ទាប់ពីស្រុកចំនួន ៤ ក្នុងខេត្តនេះ ទទួលបាន ODF ជាផ្លូវការដោយក្រសួងអភិវឌ្ឍន៍ជនបទ។
លោក ហឿន ទ្រី អនុប្រធានមន្ទីរអភិវឌ្ឍន៍ជនបទ ខេត្តកណ្តាល បានអំពាវនាវដល់អាជ្ញាធរ ភូមិ-ឃុំ-ស្រុក ត្រូវតែខិតខំចុះផ្សព្វផ្សាយអប់រំ ណែនាំ ដល់ប្រជាពលរដ្ឋនៅមូលដ្ឋានឱ្យមានការយល់ដឹងខ្ពស់អំពីសុខភាព ភាពស្អាត និងអនាម័យជនបទ ដោយត្រូវធ្វើយ៉ាងណាជំរុញឱ្យប្រជាពលរដ្ឋមានបង្គន់អនាម័យប្រើប្រាស់បានត្រឹមត្រូវ ដើម្បីធ្វើឱ្យស្រុកពញាឮក្លាយជាស្រុក ODF មានន័យថា ប្រជាពលរដ្ឋក្នុងស្រុកពញាឮបានបញ្ឈប់ទាំងស្រុង នូវការបន្ទោបងពាសវាលពាសកាល។ នេះបើយោងតាមហ្វេសប៊ុករដ្ឋបាលខេត្តកណ្តាល។
ការអំពាវនាវនេះបានធ្វើឡើង ក្នុងការចុះផ្ទៀងផ្ទាត់ អំពីស្ថានភាពបញ្ឈប់ការបន្ទោបង់ ពាសវាលពាសកាល ODF ថ្នាក់ស្រុក នៅស្រុកពញាឮ ក្នុងឃុំគោលដៅចំនួន ២ ឃុំ គឺ ឃុំឈ្វាំង និងឃុំជ្រៃលាស់ កាលពីថ្ងៃទី ៨ ខែកញ្ញា ដោយមានការចូលរួមពី លោក សំអុល ចំរើនឧត្តម អភិបាលរងស្រុកពញាឮ អាជ្ញាធរភូមិ-ឃុំ និងមន្ត្រីជំនាញជាច្រើនរូបទៀត។
លោក ហឿន ទ្រី បានបញ្ជាក់ថា ការចុះផ្ទៀងផ្ទាត់ ODF នៅស្រុកពញាឮនាពេលនេះ គឺជាការចុះវាយតម្លៃដោយថ្នាក់ខេត្ត ហើយនៅពេលខាងមុខក្រសួងអភិវឌ្ឍន៍ជនបទ នឹងចុះមកវាយតម្លៃម្ដងទៀត។
នៅក្នុងការចុះវាយតម្លៃនោះក្រសួងអភិវឌ្ឍន៍ជនបទនឹងមិនឱ្យអាជ្ញាធរខេត្តកណ្តាលបានដឹងជាមុនថា ត្រូវចុះនៅទីតាំង ភូមិ ឃុំ ស្រុក ណាមួយនោះទេ។
ហេតុដូច្នេះហើយទើបលោក ហឿន ទ្រី បានអំពាវនាវឱ្យអាជ្ញាធរ ភូមិ ឃុំ ស្រុក ត្រូវត្រៀមខ្លួនឱ្យរួចរាល់ ដោយត្រូវប្រាកដថា ក្នុងមូលដ្ឋានរបស់ខ្លួន គឺនៅតាមក្នុងផ្ទះរបស់ប្រជាពលរដ្ឋ សាលារៀន សាលាឃុំ សាលាស្រុកត្រូវមានបង្គន់អនាម័យប្រើប្រាស់បានត្រឹមត្រូវ មានភាពស្អាត មិនមានក្លិន មានទឹក និងសាប៊ូ សំដៅធ្វើឱ្យការចុះវាយតម្លៃ ODF ក្នុងខេត្តកណ្ដាលទទួលបានលទ្ធផលល្អប្រសើរ។
នាឱកាសនោះដែរ លោក សំអុល ចំរើនឧត្តម អភិបាលរងស្រុកពញាឮ បានថ្លែងនូវអំណរ គុណយ៉ាងជ្រាលជ្រៅ ដល់អាជ្ញាធរខេត្ត និងមន្ទីរអភិវឌ្ឍន៍ជនបទខេត្ត ដែលបានចុះមកចុះផ្ទៀងផ្ទាត់ វិនិច្ឆ័យអំពីស្ថានភាពបញ្ឈប់ការបន្ទោបង់ពាសវាលពាសកាល ODF នៅស្រុកពញាឮ។
លោក សំអុល ចំរើនឧត្តម បញ្ជាក់ថារដ្ឋបាលស្រុកនឹងផ្ដល់កិច្ចសហការយ៉ាងពេញទំហឹងជាមួយមន្ទីរ ពីព្រោះតាមរយៈការចុះ នាពេលនេះ បានជួយបង្ហាត់បង្ហាញបន្ថែមទៀតទៅដល់រដ្ឋបាលស្រុក ក្នុងការបញ្ឈប់ការ បន្ទោបង់ពាសវាលពាសកាល ជំរុញឱ្យស្រុកពញាឮក្លាយជាស្រុក ODF។
សូមជម្រាបផងដែរថា ខេត្តកណ្តាលទទួលបាន ODF ចំនួន ៤ ស្រុករួចមកហើយដែលបានប្រកាសទទួលស្គាល់ជាផ្លូវការដោយក្រសួងអភិវឌ្ឍន៍ជនបទ គឺមានស្រុកអង្គស្នួល ស្រុកកណ្តាលស្ទឹង ស្រុកលើកដែក ស្រុកខ្សាច់កណ្តាល។
បើតាមរដ្ឋបាលខេត្តកណ្តាល នាពេលថ្មីៗនេះ ស្រុកល្វាឯម ស្រុកកោះធំ និងស្រុកមុខកំពូលក៏ត្រូវបានជាប់ជាស្រុក ODF ផងដែរ ក្នុងក្របខ័ណ្ឌផ្ទៃក្នុងរបស់ខេត្ត ដែលមិនទាន់ធ្វើលិខិតបញ្ជូនទៅក្រសួងអភិវឌ្ឍន៍ជនបទ ដើម្បីធ្វើការប្រកាសជាផ្លូវការនៅឡើយទេ។
ជំហានបន្ទាប់ ក្រុមការងារនឹងបន្តចុះផ្ទៀងផ្ទាត់ការបញ្ឈប់ការបន្ទោបង់ពាសវាលពាសកាល ODF ថ្នាក់ស្រុក នៅស្រុកកៀនស្វាយ និងក្រុងតាខ្មៅ៕
