ភ្នំពេញៈ លោក ​ស៊ុន ចាន់ថុល ទេសរដ្ឋមន្ត្រី និង​ជា​រដ្ឋមន្ត្រី​ក្រសួង​សាធារណការ​ និង​ដឹកជញ្ជូន បាន​ស្នើឱ្យ​លោកស្រី Jyotsana Varma ដែល​ទើប​ទទួលបាន​ការតែងតាំង​ជា​នាយិកា​ធនាគារ​អភិវឌ្ឍន៍​អាស៊ី (ADB)​ប្រចាំ កម្ពុជា​ពិនិត្យ​លទ្ធភាព​ផ្តល់​ការគាំទ្រ​លើ​គម្រោង ថែទាំ​ជួសជុល​ផ្លូវថ្នល់ គម្រោង​ផែនការ​មេ​ស្ដីពី​ហេដ្ឋា​រចនា​សម្ព័ន្ធ និង​ប្រព័ន្ធគ្រប់គ្រង​ទឹក​កខ្វក់​នៅតាម​បណ្ដា​រាជធានី​-​ខេត្ត​មួយចំនួន​។

លើសពីនេះ លោក​ក៏​បាន​ស្នើឱ្យ ADB ពិនិត្យ​លទ្ធភាព​ជួយ​លើ​គម្រោង​ផែនការ​មេ​ដឹកជញ្ជូន​សាធារណៈ ក៏ដូចជា​ចូលរួម​គាំទ្រ និង​សហការ​ជាមួយនឹង​គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក ដើម្បី​លើកកម្ពស់​សុវត្ថិភាព​ចរាចរណ៍ និង​កាត់បន្ថយ​អត្រា​គ្រោះថ្នាក់​ចរាចរណ៍​នៅ​កម្ពុជា​។

លោក ​ស៊ុន ចាន់ថុល​ បាន​ស្នើ​បែប​នេះ ក្នុង​ជំនួប​សម្តែង​ការគួរសម​ និង​ពិភាក្សា​ការងារ​ជាមួយ​លោកស្រី Jyotsana Varma កាលពី​ថ្ងៃទី​ ៨ ​កញ្ញា នៅ​ទីស្តីការក្រសួង​សាធារណការ​និង​ដឹកជញ្ជូន​។

បើតាម​ហ្វេសប៊ុក​ក្រសួង​សាធារណការ លោកស្រី​នាយិកា ADB បាន​សម្ដែង​នូវ​ឆន្ទៈ​យ៉ាង​មុតមាំ ក្នុង​ការបន្ត​សហការ​ជាមួយ​ក្រសួង សាធារណការ ក៏ដូចជា​រាជរដ្ឋាភិបាល​កម្ពុជា​។

ជាមួយ​គ្នា​នេះ លោក ​ស៊ុន ចាន់ថុល បាន​សម្ដែង​នូវ​សេចក្តី​សោមនស្ស​រីករាយ និង​អបអរសាទរ​ចំពោះ​លោកស្រី Jyotsana Varma ដែល​បាន​អញ្ជើញ​មក​បំពេញ​បេសកកម្ម​ជា​នាយិកា​ថ្មី​នៃ ADB ប្រចាំ​កម្ពុជា និង​បាន​ថ្លែង អំណរគុណ​យ៉ាង​ជ្រាលជ្រៅ​ចំពោះ ADB ដែល​តែងតែ​ជួយ​គាំទ្រ​ស្ទើរ​គ្រប់​វិស័យ​លើ​ការអភិវឌ្ឍ​កម្ពុជា ជាពិសេស​វិស័យ​ហេដ្ឋា​រចនា​សម្ព័ន្ធ​រូបវន្ត និង​វិស័យ​ដឹកជញ្ជូន​សាធារណៈ​។

ជា​ការ​ឆ្លើយតប លោកស្រី​នាយិកាបាន​សម្ដែង​នូវ​ចំណាប់អារម្មណ៍ និង​ការ​កោត​សរសើរ​ចំពោះ​ការ​រីក​ចម្រើន​យ៉ាង​ឆាប់រហ័ស​របស់​កម្ពុជា​លើ​វិស័យ​ហេដ្ឋា​រចនា​សម្ព័ន្ធ និង​ដឹក​ជ​ញ្ចូ​ន ក្រោម​កិច្ច​ខិតខំ​ប្រឹងប្រែង ពី​សំណាក់​ថ្នាក់​ដឹកនាំ​ក្រសួង​សាធារណការ ក៏ដូចជា​ក្រោម​ការដឹកនាំ​ដ៏​ឆ្លាត​វៃ​របស់លោក​នាយករដ្ឋមន្ត្រី​ហ៊ុន សែន​។

ក្នុង​ជំនួប​នេះ​ដែរ លោក​រដ្ឋមន្ត្រី​ក្រសួង​សាធារណការ ក៏បាន​លើកឡើង​អំពី​សកម្មភាព​ការងារ​សំខាន់ៗ​ជាច្រើន ដែល​ក្រសួង​បាន និង​កំពុង​យក​ចិត្ត​ទុក​ដាក់​ក្នុង​ការ​អនុវត្ត និង​ការអភិវឌ្ឍ​ឱ្យ​កាន់តែ​មាន​ភាព​រីកចម្រើន និង​ទំនើប ជាពិសេស​ការគ្រប់គ្រង​ប្រព័ន្ធ​ចម្រោះ​ទឹក​កខ្វក់ ការជំរុញ​ការប្រើប្រាស់​រថយន្ត​អគ្គិសនី ប្រព័ន្ធ​ស្វ័យប្រវត្តិកម្ម និង​ទំនើបកម្ម​ប្រព័ន្ធ​បច្ចេកវិទ្យា​ឌីជីថល​។

សូម​ជម្រាបជូន​ថា លោកស្រី Jyotsana Varma បាន​បំពេញ​ការងារ​ក្នុង​វិស័យ​អភិវឌ្ឍន៍​នេះ អស់​រយៈពេល​ជាង​ ២៩ ឆ្នាំ មក​ហើយ​។ លោកស្រី​ត្រូវបាន​តែងតាំង​ជា​នាយិកា​ធនាគារ​អភិវឌ្ឍន៍​អាស៊ី ប្រចាំ​ព្រះរាជាណាចក្រ​កម្ពុជា​នៅក្នុង​ខែកក្កដា ឆ្នាំ​ ២០២២ ថ្មីៗ​នេះ​៕