លោក ហ៊ុន សែន ថ្លែងពេលជួបពលរដ្ឋនៅខេត្តសៀមរាប ពីថ្ងៃទី ១៣ កញ្ញា។ រូប SPM
ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសនៅតែធ្វើជាប្រធានគណបក្សប្រជាជនកម្ពុជាដដែល បើទោះបីលោកនឹងចាកចេញពីតំណែងនាយករដ្ឋមន្ត្រីនាពេលអនាគតក៏ដោយ ដោយថា លោកនឹងមានសិទ្ធិត្រួតពិនិត្យលើសកម្មភាពរបស់នាយករដ្ឋមន្ត្រី និងរដ្ឋមន្ត្រី ហើយអាចដករដ្ឋមន្ត្រីចេញ បើធ្វើការមិនត្រូវ។
លោកប្រកាសដូច្នេះក្នុងពិធីសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ដែលពិធីនេះធ្វើឡើងនៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប នាថ្ងៃទី ១៣ ខែកញ្ញា។
លោក ហ៊ុន សែន បញ្ជាក់ថា៖ «បើទោះបីជាខ្ញុំចាកចេញពីតួនាទីជានាយករដ្ឋមន្ត្រី ខ្ញុំនៅតែធ្វើប្រធានគណបក្សប្រជាជនដដែល។ ខ្ញុំមានសិទ្ធិត្រួតពិនិត្យលើសកម្មភាពរបស់នាយករដ្ឋមន្ត្រី និងរដ្ឋមន្ត្រីនានា។ បើធ្វើមិនត្រូវដកចេញ! ប្រធានបក្សដកចេញចប់!»។
លោកបន្ថែមថា ការបោះឆ្នោតនៅកម្ពុជា គឺបោះឆ្នោតឱ្យគណបក្សនយោបាយ បន្ទាប់មកទើបគណបក្សតែងតាំងនាយករដ្ឋមន្ត្រី។ លោកលើកឧទាហរណ៍នៅប្រទេសអង់គ្លេសថា ការបោះឆ្នោតនៅអង់គ្លេស ដំបូងគឺបោះឆ្នោតជ្រើសរើសតំណាងរាស្ត្រ ដែលជាសមាជិកសភា ចេញពីគណបក្សនយោបាយ បន្ទាប់មកសមាជិកគណបក្សនយោបាយបោះឆ្នោតជ្រើសរើសនាយករដ្ឋមន្ត្រី។
ឆ្លើយតបនឹងអ្នករិះគន់លោក លោកនាយករដ្ឋមន្ត្រីថ្លែងថា៖ «ដល់ជាប់បានហើយ គេអត់ទៅឆ្លងកាត់សភាទេ គេទៅជួបគាល់ព្រះមហាក្សត្រិយានី អេលីហ្សាប៊ែត ប៉ុន្មានម៉ោង មុនពេលដែលព្រះអង្គសោយទិវង្គត។ បន្ទាប់ទៅ គេក្លាយទៅជានាយករដ្ឋមន្ត្រី។ ឥឡូវគេអត់ឃើញនាំគណៈរដ្ឋមន្ត្រីទៅសុំការទុកចិត្តពីសភាផង»។
លោក ហ៊ុន សែន បានពន្យល់ការណ៍ដែលកម្ពុជាអនុវត្តខុសពីអង់គ្លេសថា៖ «ឯចំពោះយើងម៉េចបានយើងធ្វើខុស។ យើងគ្រាន់តែគណបក្ស ដែលមានអាសនៈច្រើន ជាងគេទៅសុំការតែងតាំងនាយករដ្ឋមន្ត្រីពីព្រះមហាក្សត្រ។ ព្រះមហាក្សត្រទ្រង់ចាត់តាំងនាយករដ្ឋមន្ត្រី ហើយនាយករដ្ឋមន្ត្រីនោះ ត្រូវរៀបចំគណៈរដ្ឋមន្ត្រីទៅសុំការទុកចិត្តពីសភា»។
លោកថា៖ «អង់គ្លេសអត់ទៅសុំការទុកចិត្តពីសភា ម៉េចអស់លោក មិនទៅទិតៀនអង់គ្លេស? ឯខ្ញុំត្រូវទៅសុំការទុកចិត្តពីសភា។ បើសុំការទុកចិត្តពីសភាអត់បានទេ ការតែងតាំងនាយករដ្ឋមន្ត្រីដោយព្រះមហាក្សត្រ ក៏អត់មានន័យ អត់ទាន់មានតម្លៃ»។
លោក ហ៊ុន សែន បានបន្ថែមថា ចំណុចខ្លាំងរបស់គណបក្សប្រជាជនកម្ពុជា ឬចំណុចខ្លាំងរបស់លោកដែលធ្វើឱ្យដៃគូប្រកួតរបស់លោកមិនអាចយកឈ្នះលោកបាន គឺនៅត្រង់ថា ដៃគូប្រកួតរបស់លោកវាយតម្លៃលោកមិនត្រូវទាំងអស់។
លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន ដែលជាសមាជិកអចិន្រៃ្តយ៍គណបក្សប្រជាជនកម្ពុជា មានតួនាទីជាអគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក ត្រូវបានអង្គសន្និបាតគណៈកម្មាធិការកណ្តាលគណបក្សប្រជាជនកម្ពុជាបោះឆ្នោតគាំទ្រជាបេក្ខភាពនាយករដ្ឋមន្ត្រី សម្រាប់បន្តវេននាពេលអនាគតកាលពីចុងឆ្នាំ ២០២១។
លោក ហ៊ុន សែន បន្តថា បើទោះបីលោកចាកចេញពីអំណាចក៏មិនមានគណបក្សណាផ្សេងក្រៅពីគណបក្សប្រជាជនកម្ពុជានៅកាន់អំណាចនោះដែរ ដោយលោកបន្ថែមថា បើទោះបីលោក ហ៊ុន ម៉ាណែត ជាកូននរណាក៏ដោយ ក៏លោកនៅតែគាំទ្រលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេនដែរ ព្រោះលោកមានលក្ខណសម្បត្តិគ្រប់គ្រាន់។
លោកបញ្ជាក់ថា៖ «វាមិនមែនស្ថិតក្នុងការគាំទ្រកូនខ្លូនឯងឯណា។ ខ្ញុំគាំទ្រអ្នកណាដែលអាចដឹកនាំគណបក្សប្រជាជនបាន ដែលអាចដឹកនាំកម្ពុជាបាន។ អ៊ីចឹងកុំនិយាយថា អាហ្នឹងរឿងកូន ហ៊ុន សែន។ បើវាមានលទ្ធភាព ធ្វើនាយករដ្ឋមន្ត្រីឱ្យវាធ្វើទៅ ហើយខ្ញុំបានបញ្ជាក់ហើយ បើសិនជាកូនខ្ញុំ មិនគ្រប់លក្ខណសម្បត្តិ ក៏ខ្ញុំមិនគាំទ្រដែរ»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពថ្លែងថា វាជារឿងប្រសើរផងដែរ ដែលថាអំណាចក្នុងបក្សអាចមានឥទ្ធិពលទៅលើរដ្ឋមន្ត្រី ឬក៏នាយករដ្ឋមន្ត្រី។ ប៉ុន្តែកិច្ចការខ្លះអាចថា អំណាចបក្ស មិនអាចដករដ្ឋមន្ត្រីដោយផ្ទាល់បាននោះទេ ព្រោះរដ្ឋមន្ត្រីត្រូវបានជ្រើសរើសដោយនាយករដ្ឋមន្ត្រី។ សំខាន់បំផុត អ្នកដែលត្រួតពិនិត្យការងាររបស់រដ្ឋមន្ត្រីជាទៀងទាត់នោះ គឺនាយករដ្ឋមន្ត្រី។
លោកថ្លែងថា៖ «អ៊ីចឹង ខ្ញុំគ្រាន់តែមានកង្វល់ទេថា ដំណើរការហ្នឹង ស្រួលមិនស្រួល គឺអាចធ្វើឱ្យមានបញ្ហាក្នុងការអនុវត្តផែនការជាតិ ឬក៏កម្មវិធីរបស់ជាតិមួយចំនួន ពីព្រោះជួនកាលនាយករដ្ឋមន្ត្រីអ្នកបញ្ជាឱ្យរដ្ឋមន្ត្រីធ្វើ! មិនអ៊ីចឹង [ត្រូវ] អនុវត្តទៅតាមផែនការ ទៅតាមអាទិភាព»។
លោកថា៖ «បក្សយល់ផ្សេង ប៉ុន្តែនាយករដ្ឋមន្ត្រីបញ្ជាឱ្យធ្វើរឿង ផ្សេងអ៊ីចឹងទៅ! ក្រែងលោថា ខុស គ្នាអ៊ីចឹង។ អ៊ីចឹងអាហ្នឹងជារឿងមួយដែលប្រទាំងប្រទើសដែរ»។
លោក យង់ គិមអេង ថ្លែងថា ជានាយករដ្ឋមន្ត្រី គឺមានអំណាចក្នុងរដ្ឋាភិបាល។ ឯបក្សមានសិទ្ធិណែនាំ ឬស្តីបន្តោស ដើម្បីជួយកែតម្រូវនាយករដ្ឋមន្ត្រីឱ្យដើរត្រង់ផ្លូវ និងឱ្យប្រឹងបំពេញភារកិច្ចជូនជាតិ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យ សភាកម្ពុជា ប្រាប់ភ្នំពេញប៉ុស្តិ៍ថា ទោះបីជាលោក ហ៊ុន សែន ចាកចេញពីតួនាទីជានាយករដ្ឋមន្ត្រីក៏ដោយ ក៏លោកនៅតែជាប្រធានបក្ស ព្រោះក្នុងប្រព័ន្ធនយោបាយរបស់កម្ពុជាគឺជាប្រព័ន្ធដែលគណបក្សមានអំណាចខ្លាំង ដោយកម្ពុជាប្រើប្រព័ន្ធបោះឆ្នោតបែបសមាមាត្រ។ ដូច្នេះ ប្រធានបក្សមានសិទ្ធិចាត់ចែងត្រួតពិនិត្យ ការអនុវត្តរបស់នាយករដ្ឋមន្ត្រី រដ្ឋមន្ត្រី សមាជិករដ្ឋសភា សមាជិកព្រឹទ្ធសភា ឬក៏អ្នកទាំងឡាយណាដែល ទទួលអាណត្តិដោយការបោះឆ្នោត គឺសុទ្ធតែស្ថិតក្រោមខ្សែបន្ទាត់របស់គណបក្សទាំងអស់។
លោកថ្លែងថា៖ «បើសិនជាគាត់ដើរខុសពីខ្សែបន្ទាត់របស់គណបក្ស អ៊ីចឹងគណបក្សអាចបណ្ដេញចេញ។ នៅពេលគណបក្សបណ្ដេញចេញគាត់ត្រូវបាត់បង់សមាជិកភាពរបស់គាត់ក្នុងស្ថាប័នដែលគាត់ជាប់ឆ្នោតហ្នឹង។ ប្រធានបក្សនៅតែមានអំណាចហ្នឹង»៕
វីដេអូ៖
