លោកស ខេង ដឹកនាំកិច្ចប្រជុំ តាមប្រព័ន្ធវីដេអូជាមួយសមភាគីថៃ នៅថ្ងៃទី១៦កញ្ញា។ រូបថត ក្រសួងមហាផ្ទៃ
ភ្នំពេញៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈប្រតិភូកម្ពុជា នៅថ្ងៃទី ១៦ កញ្ញា បានអញ្ជើញធ្វើជាសហដឹកនាំកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៧ តាមប្រព័ន្ធវីដេអូ តបតាមការអញ្ជើញរបស់នាយឧត្ដមសេនីយ៍ អនុភុង ផៅចិន្តា រដ្ឋមន្ត្រីក្រសួងមហាផ្ទៃ នៃព្រះរាជាណាចក្រថៃ។
ក្រោយបញ្ចប់កិច្ចប្រជុំ ភាគីទាំង ២ បានចេញសេចក្ដីប្រកាសព័ត៌មានរួម ឱ្យដឹងថា កិច្ចប្រជុំបានដំណើរការក្នុងបរិយាកាសមិត្តភាព សាមគ្គីភាព ភាតរភាព និងយោគយល់គ្នាទៅវិញទៅមក។
ភាគីទាំង ២ ទទួលស្គាល់នូវសារៈសំខាន់នៃទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធ រវាងបណ្តាខេត្តជាប់ព្រំដែនកម្ពុជា-ថៃ និងមានឆន្ទៈក្នុងការរក្សាសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាពរវាងប្រទេសទាំង ២។
កិច្ចប្រជុំបានផ្តល់តម្លៃខ្ពស់ដល់ការពង្រឹងកិច្ចសហប្រតិបត្តិការរវាងខេត្តជាប់ព្រំដែនកម្ពុជា-ថៃ លើកិច្ចសហប្រតិបត្តិការយ៉ាងទូលំទូលាយចំនួន ១៩ ចំណុច។
កិច្ចសហប្រតិបត្តិការទាំងនោះ រួមមានកិច្ចសហប្រតិបត្តិការក្នុងការអនុវត្តកិច្ចព្រមព្រៀង ស្ដីពីការឆ្លងកាត់ព្រំដែន ដោយភាគីទាំង ២ បានឯកភាពគ្នាបន្តអប់រំ និងផ្សព្វផ្សាយដល់ប្រជាពលរដ្ឋ និងអាជ្ញាធរមានសមត្ថកិច្ចនៅតាមតំបន់ព្រំដែនដើម្បីអនុវត្តប្រកបដោយប្រសិទ្ធភាព និងពេញលេញនូវកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាណាចក្រថៃ ស្តីពីការឆ្លងកាត់ព្រំដែនរវាងប្រទេសទាំង២។
កិច្ចសហប្រតិបត្តិការគ្រប់គ្រងការឆ្លងកាត់ព្រំដែនអំឡុងពេលឆ្លងរាលដាលជំងឺកូវីដ ១៩ ដោយភាគីទាំង ២ លើកទឹកចិត្តដល់ស្ថាប័នពាក់ព័ន្ធនៃប្រទេសទាំង ២ បង្កើនការសម្របសម្រួលឱ្យស៊ីសង្វាក់គ្នានូវបែបបទនីតិវិធី និងវិធានការឆ្លងកាត់ព្រំដែន រួមមានវិធានការសុខភាពសាធារណៈ ដើម្បីទប់ស្កាត់ការរីករាលដាលជំងឺកូវីដ ១៩ និងជំងឺឆ្លងដទៃទៀត សំដៅជួយសម្រួលដល់ការធ្វើដំណើរឆ្លងកាត់ព្រំដែន និងបើកដំណើរការឡើងវិញនូវច្រកទ្វារព្រំដែនផ្សេងទៀតដែលមិនទាន់បានបើកដំណើរការនៅឡើយ។
កិច្ចសហប្រតិបត្តិការលើវិស័យពាណិជ្ជកម្ម និងវិនិយោគនៅតាមព្រំដែន ដោយ ភាគីទាំង ២ បានគូសបញ្ជាក់ពីសារៈសំខាន់នៃការជំរុញ និងសម្របសម្រួលដល់សកម្មភាពពាណិជ្ជកម្ម និងសេដ្ឋកិច្ចឆ្លងកាត់ព្រំដែនរវាងខេត្តបន្ទាយមានជ័យ-ខេត្តស្រះកែវ និងខេត្តកោះកុង-ខេត្តត្រាត។
បន្ថែមលើនេះ ភាគីទាំង ២ ឯកភាពសហការ និងសម្របសម្រួលសកម្មភាពជំនួញ និងពាណិជ្ជកម្មនៅតាមតំបន់ព្រំដែនកម្ពុជា-ថៃ ដើម្បីជំរុញចីរភាព និងវិបុលភាពរបស់ប្រជាជនរស់នៅតាមខេត្តជាប់ព្រំដែននៃប្រទេសទាំង២។
ក្រៅពីនេះមានកិច្ចសហប្រតិបត្តិការលើវិស័យដឹកជញ្ចូន ដោយភាគីទាំង ២ គាំទ្រដល់ស្ថាប័នពាក់ព័ន្ធនៃប្រទេសទាំង ២ ពិចារណាឡើងវិញ លើកិច្ចចរចាលើកិច្ចព្រមព្រៀងទ្វេភាគី ស្តីពីការដឹកជញ្ជូនឆ្លងកាត់ព្រំដែន តាមផ្លូវគោករវាងកម្ពុជា និងថៃ ដើម្បីជំរុញការតភ្ជាប់ការដឹកជញ្ជូនរវាងប្រទេសទាំង ២។
កិច្ចសហប្រតិបត្តិការលើវិស័យកសិកម្មក្នុងតំបន់ព្រំដែន គឺភាគីទាំង ២ លើកទឹកចិត្តឱ្យខេត្តជាប់ព្រំដែន នៃប្រទេសទាំង ២ សម្របសម្រួលដល់ការធ្វើជំនួញផលិតផលកសិកម្មឆ្លងកាត់ព្រំដែនរបស់ប្រជាពលរដ្ឋរស់នៅតាមតំបន់ព្រំដែន។
កិច្ចសហប្រតិបត្តិការលើវិស័យការងារដោយ ភាគីទាំង ២ បានឯកភាពគ្នាគាំទ្រដល់ក្រសួង ស្ថាប័ន និងមន្ត្រីពាក់ព័ន្ធនៃប្រទេសទាំង ២ សហការសម្របសម្រួលឱ្យពលករនៃប្រទេសទាំង ២ ប្រើប្រាស់បណ្ណ ព្រំដែនសម្រាប់ធ្វើការងារប្រចាំថ្ងៃ និងប្រចាំរដូវនៅតាមតំបន់ព្រំដែន។
បន្ថែមពីនេះ ក៏មានកិច្ចសហប្រតិបត្តិការក្នុងការគ្រប់គ្រងច្រកទ្វារព្រំដែន កិច្ចសហប្រតិបត្តិការ លើវិស័យសុខភាពសាធារណៈ និងការអភិវឌ្ឍសហគមន៍ កិច្ចសហប្រតិបត្តិការគ្រប់គ្រងគ្រោះមហន្តរាយ កិច្ចសហប្រតិបត្តិការលុបបំបាត់ការកាប់ឈើខុសច្បាប់ កិច្ចសហប្រតិបត្តិការថែរក្សាបរិស្ថានព្រំដែន កិច្ចសហប្រតិបត្តិការបង្ការ និងទប់ស្កាត់បទល្មើសឆ្លងដែន និងកិច្ចសហប្រតិបត្តិការបោសសម្អាតមីន។
ក្រៅពីនេះ ភាគីទាំង ២ ក៏បានសម្រេចបន្តកិច្ចសហប្រតិបត្តិការទេសចរណ៍ សហប្រតិបត្តិការខេត្ត/ក្រុងសម្ព័ន្ធមេត្រី បន្តយន្តការកិច្ចសហប្រតិបត្តិការថ្នាក់ខេត្ត និងថ្នាក់មូលដ្ឋាន និងកិច្ចសហប្រតិបត្តិការផ្សេងៗទៀត។
កិច្ចប្រជុំបានលើកទឹកចិត្តឱ្យមានសកម្មភាព ឬព្រឹត្តិការណ៍បន្ថែមទៀត ដើម្បីពង្រឹងនិងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំង ២។
នៅចុងបញ្ចប់នៃសេចក្ដីប្រកាសព័ត៌មានរួមស្ដីពីកិច្ចប្រជុំអភិបាលខេត្តជាប់ព្រំដែនកម្ពុជា-ថៃលើកទី៧ ភាគីកម្ពុជាបានបញ្ជាក់ពីការយល់ព្រមទទួលធ្វើជាម្ចាស់ផ្ទះនៃកិច្ចប្រជុំអភិបាលខេត្តជាប់ព្រំដែនកម្ពុជា-ថៃលើកទី៨ ដោយកាលបរិច្ឆេទ ពេលវេលា និងទីកន្លែងរៀបចំកិច្ចប្រជុំលើកទី៨ នឹងត្រូវពិភាក្សាគ្នាតាមផ្លូវទូត៕
