ភ្នំពេញៈ ពិធីបុណ្យកាន់បិណ្ឌបានរំកិលមកដល់បិណ្ឌទី៩ ហើយ គិតនៅត្រឹមថ្ងៃទី ១៩ ខែកញ្ញា ខណៈគេកត់សម្គាល់ឃើញពលរដ្ឋខ្មែរគ្រប់ស្រទាប់វណ្ណៈ ក្នុងនោះក៏មានយុវវ័យកាន់តែច្រើនផងដែរ នាំគ្នាទៅវត្តធ្វើបុណ្យកាន់បិណ្ឌ ដែលជាផ្នែកមួយនៃការចូលរួមថែរក្សាប្រពៃណីទំនៀមទម្លាប់ខ្មែរ។
កញ្ញា អៀ សុនីតា ជានិស្សិតកំពុងសិក្សាឆ្នាំទី៤ នៅសាកលវិទ្យាល័យភូមិន្ទភ្នំពេញថ្លែងថា គោលបំណងធំបំផុតរបស់កញ្ញាគឺទៅវត្តដើម្បីរក្សាប្រពៃណី។ កញ្ញាចង់មានន័យថា យ៉ាងហោចណាស់ក៏បានទៅ ១ វត្តក្នុងអំឡុងពេលកាន់បិណ្ឌ និងភ្ជុំបិណ្ឌ ១៥ ថ្ងៃ។ «ទៅវត្តក៏ដោយសារគិតរឿងធ្វើបុណ្យ ព្រោះខ្ញុំក៏ជឿលើការសាងបុណ្យសន្សំកុសលដែរ»។
ប៉ុន្តែកញ្ញាថា ការធ្វើបុណ្យរបស់កញ្ញា គឺប្រព្រឹត្តទៅដោយគិតលើភាពត្រឹមត្រូវមិនមែនគិតតែពីជំនឿនោះទេ ពោលគឺកញ្ញា មានបំណងធ្វើយ៉ាងណាឱ្យជំនឿ និងភាពជឿនលឿនដើរទន្ទឹមគ្នា។
ចំណែកឯកញ្ញា ឡេង ម៉ារឺឌី និស្សិតទើបបញ្ចប់ការសិក្សាពីសាកលវិទ្យាល័យភូមិន្ទភ្នំពេញយល់ថា ការទៅវត្តក្នុងអំឡុងពេលនៃពិធីបុណ្យកាន់បិណ្ឌ និងភ្ជុំបិណ្ឌជាកាតព្វកិច្ច ដែលប្រជាពលរដ្ឋខ្មែរត្រូវបំពេញ។ «ខ្ញុំខ្លួនឯងមានអារម្មណ៍ស្រឡះខ្លួន ក្រោយពេលបានទៅវត្ត ថ្វាយចង្ហាន់ ព្រះសង្ឃហើយ...ខ្ញុំយល់ថា ដូនតានឹងតាមថែរក្សាយើងវិញ»។
ចំណែកបុគ្គលិកអប់រំវិញ លោក សន ប៊ុនស៊ីម យល់ថា លោកធ្វើបុណ្យក៏គិតទៅលើភាពខ្វះខាតជាក់ស្ដែងផងដែរដោយលោកចូលចិត្តទៅវត្តដាច់ស្រយាល ជាជាងទៅវត្តនៅភ្នំពេញ។ «ការធ្វើបុណ្យ និងធ្វើទានគឺដើម្បីសន្សំទឹកចិត្តខ្ញុំឱ្យចេះចែករំលែកជាមួយសហគមន៍ ដូចជាប្រគេនចង្ហាន់ដល់ព្រះសង្ឃ និងហូបអាហារជុំគ្នាជាមួយពុទ្ធបរិស័ទឯទៀត»៕