មន្ត្រីអាជ្ញាធរ និងមន្ត្រីអង្គការភ្លែនអន្តរជាតិកម្ពុជា ក្នុងពិធីសម្ពោធសាលារៀន កាលពីឆ្នាំ ២០២១ នៅខេត្តរតនគិរី។ រូបថត Plan International Cambodia
ភ្នំពេញៈ ជាការរួមចំណែកជាមួយរាជរដ្ឋាភិបាលកម្ពុជា ក្នុងយុទ្ធសាស្ត្រ «ការអប់រំសម្រាប់ទាំងអស់គ្នា» របស់រដ្ឋាភិបាល អង្គការភ្លែនអន្តរជាតិកម្ពុជា (Plan International) បានសាងសង់មត្តេយ្យសហគមន៍ មត្តេយ្យតាមខ្នងផ្ទះ និងមត្តេយ្យរដ្ឋ សម្រាប់កុមារអាយុពី ៣ ដល់ ៥ ឆ្នាំ បានចំនួន ៤៤០កន្លែង ក្នុងរយៈពេល ២០ ឆ្នាំចុងក្រោយនេះ។
សេចក្តីប្រកាសព័ត៌មានរបស់អង្គការភ្លែនអន្តរជាតិ ក្នុងទិវាអបអរសាទរខួប ២០ ឆ្នាំរបស់ខ្លួន នាថ្ងៃទី ១១ ខែតុលា ស្តីពី «ការអបអរសាទរភាពជោគជ័យរបស់កុមារ និងស្រី្តវ័យក្មេង» លើកឡើងថា ក្នុងរយៈពេល ២០ ឆ្នាំចុងក្រោយនេះ អង្គការបានបង្កើតកម្មវិធីគំនិតផ្តួចផ្តើមកែលម្អសាលារៀន ដោយគាំទ្រដល់ក្រសួងអប់រំ យុវជន និងកីឡាក្នុងការបង្កើតគោលនយោបាយ និងគោលគំនិតនៃកិច្ចការពារកុមារ និងសុវត្ថិភាពសាលារៀន សម្រាប់សាលារដ្ឋទាំងអស់។
នាពិធីនោះ នាយិកាប្រចាំប្រទេសរបស់អង្គការភ្លែនអន្តរជាតិកម្ពុជា លោកស្រី គ្វីននេត វ៉ង ថ្លែងថា អង្គការលោកស្រីបានធ្វើប្រតិបត្តិការនៅប្រទេសកម្ពុជា អស់រយៈពេល ២០ ឆ្នាំហើយ ដើម្បីលើកកម្ពស់សិទ្ធិកុមារ និងសមភាពសម្រាប់ក្មេងស្រី ជាពិសេសក្មេងស្រីជំទង់និងស្ត្រីវ័យក្មេងក្នុងភាពចម្រុះផ្សេងគ្នារបស់ពួកគេនៅប្រទេសកម្ពុជា។
លោកស្រីថ្លែងថា៖ «យើងនៅក្មេង ស្វាហាប់ និងពោរពេញទៅដោយថាមពល ដូចស្ត្រី និងបុរសអាយុ ២០ ឆ្នាំ។ តែយើងឆ្លាតវៃ និងមានបទពិសោធច្រើន រួមមានផ្នែកអប់រំ អាហារូបត្ថម្ភ កិច្ចការការពារកុមារ សិទ្ធិកុមារ ទឹកស្អាត និងអនាម័យ និងផ្នែកជាច្រើនទៀត»។
បើតាមអង្គការភ្លែនអន្តរជាតិកម្ពុជា កុមារជាង ៦៣០ ០០០ នាក់ ក្នុងនោះមានកុមារីចំនួន ៣១០ ០០០ នាក់ នៅសាលាបឋមសិក្សា បានទទួលអត្ថប្រយោជន៍ពីកម្មវិធីស្បៀងអាហារតាមសាលារៀន រួមមាន អាហារពេលព្រឹក អនាម័យ គ្រឿងបរិក្ខារអនាម័យ និងប្រព័ន្ធចែកចាយទឹក។
លោកស្រីគ្វីន នេត វ៉ង បន្តថា៖ «យើងបានសាងសង់សាលាបឋមសិក្សា និងអនុវិទ្យាល័យជាង ៨០ អគារជាមួយការបំពាក់គ្រឿងបរិក្ខារសិក្សាផងដែរ។ យើងក៏បានសាងសង់បណ្ណាល័យជាង ៤០ កន្លែង និងបង្គន់អនាម័យតាមសាលារៀនចំនួន ៤៣០ ដោយមានការបែងចែកបន្ទប់ សម្រាប់បុរស និងស្ត្រីផងដែរ»។
ជាមួយគ្នានេះ អង្គការ ក៏បានផ្តល់ប្រព័ន្ធផ្គត់ផ្គង់ទឹកតាមសាលារៀនជាង ៥២០ រួមមាន ម៉ាស៊ីនបូមចម្រោះទឹក អាងត្រងទឹកភ្លៀង រួមនឹងកន្លែងលាងដៃជាក្រុម តាមសាលារៀនជាង ១ ០០០ កន្លែង ហើយក៏បានបង្កើតថ្នាក់កុំព្យូទ័រ និងការបង្រៀនភាសាអង់គ្លេស នៅសាលារៀនចំនួន ៤ ក្នុងខេត្តសៀមរាបផងដែរ។
លោកស្រីឱ្យដឹងថា៖ «យើងបានដោះស្រាយបញ្ហាក្នុងវិស័យអប់រំ រួមមាន ការចុះឈ្មោះចូលរៀន អត្រាបោះបង់ការសិក្សាខ្ពស់ អនក្ខរកម្ម និងការអប់រំដែលមានស្តង់ដាទាបដោយអង្គការយើងបានបង្កើតការអប់រំបំប៉នសិស្សយឺត។ ផ្តល់អាហារូបករណ៍ និងការអប់រំក្រៅប្រព័ន្ធ (ថ្នាក់តាមភូមិ) ដើម្បីលើកទឹកចិត្តដល់កុមារមកពីគ្រួសារដែលមានចំណូលទាបឱ្យបានទៅសាលារៀន»។
អង្គការភ្លែនអន្តរជាតិកម្ពុជាបានគាំទ្រក្រសួងអប់រំ យុវជន និងកីឡា ក្នុងការបញ្ចូលការឆ្លើយតបយេនឌ័រទៅក្នុងសៀវភៅណែនាំរបស់គ្រូមត្តេយ្យសិក្សា។
សូមបញ្ជាក់ថា នៅឆ្នាំ ២០០២ អង្គការភ្លែនអន្តរជាតិកម្ពុជា បានបើកការិយាល័យរបស់ខ្លួននៅកម្ពុជា ហើយបានអនុវត្តកម្មវិធីដំបូងរបស់ខ្លួននៅខេត្តសៀមរាប នាដើមឆ្នាំ ២០០៣ និងកម្មវិធីទី២ នៅខេត្តកំពង់ចាម នៅពាក់កណ្តាលឆ្នាំ ២០០៤។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានលើកឡើងក្នុងសន្និសីទសារព័ត៌មាន កាលពីខែសីហាកន្លងមកថា គិតត្រឹមឆ្នាំសិក្សា ២០២១-២០២២ សាលាមត្តេយ្យសិក្សា និងសាលារៀនចំណេះទូទៅទាំងសាធារណៈ និងឯកជនមានចំនួន ១៨ ៤៣០។ ក្នុងនោះ មត្តេយ្យសិក្សាសហគមន៍ មាន ៣ ០៨៣ កន្លែង សាលារៀនសាធារណៈ ១៣ ៦៨១ និងសាលារៀនឯកជនចំនួន ១ ៦៦៦។
លោកឱ្យដឹងដែរថា ចាប់ពីឆ្នាំ ២០១៩ ដល់ ២០២២ ក្នុងការពង្រឹងការគ្រប់គ្រងតាមសាលារៀន ក្រសួងធានាបានស្តង់ដាសាលារៀនមានប្រសិទ្ធភាព លើកកម្ពស់គុណវុឌ្ឍិគ្រូបង្រៀន ការកែលម្អហេដ្ឋារចនាសម្ព័ន្ធសាលារៀន និងពង្រឹងការគ្រប់គ្រង ការតាមដាន និងវាយតម្លៃតាមសាលារៀន។
លោក រស់ សុវាចា ថ្លែងថា៖ «ជាមួយគ្នានេះ កម្មវិធីលើកកម្ពស់គុណវុឌ្ឍិគណៈគ្រប់គ្រងសាលារៀន បានជួយឱ្យសាលារៀនអាចពង្រឹងសមត្ថភាពសិស្ស ដែលមានគុណភាពទាំងចំណេះដឹង និងជាកូនល្អ សិស្សល្អ និងពលរដ្ឋល្អក្នុងសហគមន៍»។
ក្រសួងអប់រំ យុវជន និងកីឡា ធ្លាប់បានបង្ហាញឱ្យដឹងដែរថា នៅកម្ពុជាកម្មវិធីផ្តល់ស្បៀងអាហារតាមសាលារៀនផ្តល់អត្ថប្រយោជន៍ដល់សិស្សថ្នាក់មត្តេយ្យ និងបឋមសិក្សាចំនួន ២៨ ម៉ឺននាក់ នៅសាលារៀនចំនួន ១ ១១៣ នៅខេត្តចំនួន ១០។ បច្ចុប្បន្ន រាជរដ្ឋាភិបាលកម្ពុជា គឺជាអ្នកផ្ដល់មូលនិធិ និងចាត់ចែងកម្មវិធីនៅតាមសាលាចំនួន ២៩០ (២៦%) និងបានបែងចែកថវិកាចំនួន ២៩ លានដុល្លារ សម្រាប់កម្មវិធីក្នុងឆ្នាំនេះ។
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន ធ្លាប់បានថ្លែងថា ការផ្តល់ស្បៀងអាហារតាមសាលារៀននៅកម្ពុជា ជាការបង្ហាញនូវការប្ដេជ្ញាចិត្តរបស់រាជរដ្ឋាភិបាល ក្នុងការពង្រីកកម្មវិធីនេះជាបណ្តើរៗដោយទទួលស្គាល់ពីឥទ្ធិពលជាវិជ្ជមានរបស់កម្មវិធីនេះទៅលើការអប់រំ អាហារូបត្ថម្ភ និងកិច្ចគាំពារសង្គម។
ដោយឡែក អង្គការភ្លែនអន្តរជាតិកម្ពុជា ក៏បាននិងកំពុងធ្វើការយ៉ាងជិតស្និទ្ធជាមួយក្រសួងពាក់ព័ន្ធ ដើម្បីអភិវឌ្ឍគោលនយោបាយជាតិស្តីពីប្រព័ន្ធការពារកុមារ ច្បាប់យុត្តិធម៌អនីតិជន គោលនយោបាយ និងផែនការកិច្ចការពារកុមារនៅសាលារៀន និងផែនការអនុវត្តសៀវភៅមគ្គុទ្ទេសក៍ សម្រាប់គ្រូបង្រៀនស្តីពីការបង្ការការប្រើប្រាស់គ្រឿងញៀនខុសច្បាប់ ព្រមទាំងការទប់ស្កាត់ និងការប្រឆាំងការជួញដូរមនុស្សសម្រាប់បឋមសិក្សា និងអនុវិទ្យាល័យ។
លោកស្រី គ្វីននេត វ៉ង លើកឡើងថា៖ «យើងបានបង្កើតបណ្តាញកិច្ចការពារកុមារសហគមន៍ជាង ១៦០ បណ្តាញ ដែលសមាជិក រួមមាន អ្នកដឹកនាំសហគមន៍ គ្រូបង្រៀន ឪពុកម្តាយ ក្រុមយុវជន បុគ្គលិកអង្គការមិនមែនរដ្ឋាភិបាល និងបុគ្គលិករបស់យើង ដើម្បីទប់ស្កាត់ និងឆ្លើយតបទៅនឹងការរំលោភបំពានលើកុមារ និងផ្តល់ការគាំទ្រផ្នែកសង្គម សេដ្ឋកិច្ច និងផ្លូវច្បាប់ដល់ជនរងគ្រោះ»។
លោកស្រីបន្ថែមថា៖ «យើងបានបង្កើត និងគាំទ្រវេទិកាថ្នាក់មូលដ្ឋានដល់ថ្នាក់ជាតិ ដើម្បីផ្សព្វផ្សាយបរិស្ថានសុវត្ថិភាពកុមារ និងសំឡេងកុមារទៅដល់អ្នកបង្កើតគោលនយោបាយ។ វេទិកានេះបានបញ្ចូលកុមារ និងយុវជន ជិត ៧ ០០០ នាក់ ក្នុងខេត្តចំនួន ១២ ទៅជាបណ្តាញក្លិបកុមារថ្នាក់ជាតិ»៕
