យុវជន ហួរ ថៃលី និងយុវតី ម៉ៅ ថាឡែន ដែលនឹងត្រូវចេញទៅចូលរួមក្នុងកម្មវិធី ១ នៅប្រទេសជប៉ុន នាថ្ងៃទី ១៦ តុលា។ រូបថត សហការី
ភ្នំពេញៈ នាថ្ងៃអាទិត្យ ទី ១៦ ខែតុលា ឆ្នាំ ២០២២ បុគ្គលិកអប់រំនៃក្រសួងអប់រំ យុវជន និងកីឡា ២ រូប គឺលោក ស្រួយ ផានិត និងលោក សួស សុវណ្ណារិន នឹងដឹកនាំសិស្សឆ្នើមផ្នែករូបវិទ្យាថ្នាក់ទី១០ ចំនួន ៣ រូប ទៅចូលរួមក្នុងកម្មវិធី Sakura Science High School Program in JFY 2022 នៅប្រទេសជប៉ុន។ នេះបើតាមលិខិតឧទ្ទេសនាម ចុះហត្ថលេខាដោយរដ្ឋមន្ត្រីអប់រំ លោក ហង់ជួន ណារ៉ុន កាលពីថ្ងៃទី ៥ កញ្ញា។
ប្រភពពីក្រសួងអប់រំ យុវជន និងកីឡាឱ្យដឹងថា លោក ស្រួយ ផានិត ជាអនុប្រធានការិយាល័យ នៃនាយកដ្ឋានកិច្ចការប្រឡង និងលោក សួស សុវណ្ណារិន ជាមន្រ្តីការិយាល័យអាហារូបករណ៍ នៃនាយកដ្ឋានមធ្យមសិក្សាចំណេះដឹងទូទៅត្រូវបានចាត់តាំងឱ្យធ្វើជាអ្នកដឹកនាំ និងគ្រប់គ្រងសិស្ស ទៅចូលរួមកម្មវិធី Sakura Science High School Program in JFY 2022 រយៈពេល ១ សប្តាហ៍ ចាប់ពីថ្ងៃទី ១៧-២១ ខែតុលា ឆ្នាំ ២០២២ នៅប្រទេសជប៉ុន។
ចំណែកឯសិស្សឆ្នើមផ្នែករូបវិទ្យាថ្នាក់ទី១០ មានវ័យ ១៥ ឆ្នាំ ដូចគ្នា មកពីខេត្ត ៣ ផ្សេងគ្នា។ យុវតី ម៉ៅ ថាឡែន មកពីវិទ្យាល័យអន្តរជាតិ យូអេសអេ (USA) រៀនថ្នាក់ទី10C នៅខេត្តបាត់ដំបង យុវជនស៊ន់ ប្រសិទ្ធ មកពីវិទ្យាល័យមេសាង រៀនថ្នាក់ទី10A នៅខេត្តព្រៃវែង និងយុវជន ហួរ ថៃលី មកពីវិទ្យាល័យព្រះបាទសុរាម្រឹត រៀនថ្នាក់ទី10B នៅខេត្តកំពង់ឆ្នាំង។
សាលាអន្តរជាតិ យូអេសអេ ដែលមានទីតាំងនៅខេត្តបាត់ដំបង បានកោតសរសើរ និងបង្ហាញពីលក្ខណសម្បត្តិយុវតី ម៉ៅ ថាឡែន តាមបណ្តាញសង្គមហ្វេសប៊ុកខ្លួនថា ប្អូនស្រី គឺជាសិស្សជយលាភីលេខ ១ ថ្នាក់ជាតិ ដែលរៀបចំការប្រឡង ដោយក្រសួងអប់រំ យុវជន និងកីឡា កាលពីថ្ងៃទី ២ ខែមីនា ឆ្នាំ ២០២២ និងបានប្រកាសលទ្ធផល កាលពីថ្ងៃទី ៦ ខែមេសា ឆ្នាំ ២០២២។
ប្រភពខាងលើសរសេរថា៖ «ប្អូនស្រី ម៉ៅ ថាឡែន សិស្សវិទ្យាល័យអន្តរជាតិ យូ អេស អេ ដែលទទួលបានជយលាភីចំណាត់ថ្នាក់លេខ ១ ថ្នាក់ជាតិ ពីការប្រកួតអ្នកវិទ្យាសាស្រ្តវ័យក្មេង អាស៊ានបូកបី (APT JSO+3) មុខវិជ្ជារូបវិទ្យា ដែលរៀបចំឡើង ដោយក្រសួងអប់រំ យុវជន និងកីឡា នៃព្រះរាជាណាចក្រកម្ពុជា។ ប្អូននឹងត្រូវទៅទស្សនកិច្ចសិក្សា នៅប្រទេសជប៉ុន រយៈពេល ៩ ថ្ងៃ ចាប់ពីថ្ងៃទី ១៥ ខែតុលា រហូតដល់ថ្ងៃទី ២៤ ខែតុលា ឆ្នាំ ២០២២ ខាងមុខនេះ ជូនពរប្អូនឱ្យទទួលបានជោគជ័យបន្តទៀត!»។
លោក ឈន់ ផេង ជាគ្រូបង្រៀនឯកទេសរូបវិទ្យា នៅវិទ្យាល័យមេសាង ក្នុងខេត្តព្រៃវែង បង្ហាញអារម្មណ៍រីករាយតាមបណ្តាញសង្គមពីលទ្ធផលល្អ របស់សិស្សខ្លួនសម្រាប់ការប្រកួតទាំងគណិតវិទ្យា និងរូបវិទ្យាថ្នាក់ទី១០។
លោកគ្រូ ផេង សរសេរថា៖ «អបអរសាទរវិទ្យាល័យមេសាង ដែលបានប្រឡងជាប់សិស្សឆ្នើម (ថ្នាក់ទី១០) លំដាប់ថ្នាក់ជាតិផ្នែកគណិតវិទ្យា១ នាក់ និងរូបវិទ្យាចំនួន ៤ នាក់។ ចំពោះបេក្ខជនដែលប្រឡងជាប់នឹងត្រូវឆ្លងកាត់វគ្គបណ្ដុះបណ្ដាលបន្ថែមនៅសាកលវិទ្យាល័យភូមិន្ទភ្នំពេញ ដើម្បីត្រៀមចេញទៅប្រកួតលើឆាកអន្តរជាតិ»៕
