លោក ឌិត ទីណា ថ្លែងនៅក្នុងសន្និសីទកាសែតម្សិលមិញ។ ហុង មិនា
ភ្នំពេញៈ រដ្ឋមន្ត្រីក្រសួងកសិកម្មថ្មីលោក ឌិត ទីណា បានប្តេជ្ញាខិតខំប្រឹងប្រែងអស់ពីកម្លាំងកាយចិត្ត និងស្មារតី ក្នុងការដោះស្រាយបញ្ហាប្រឈមជូនប្រជាពលរដ្ឋ ជាពិសេសនៅក្នុងបរិបទដែលប្រជាពលរដ្ឋកំពុងរងផលប៉ះពាល់ដោយសារគ្រោះទឹកជំនន់ និងប្តេជ្ញាចិត្តលើកកម្ពស់ជីវភាពរបស់ប្រជាកសិករ ដោយធានាឱ្យបាននូវសន្តិសុខស្បៀង ព្រមទាំងលើកកម្ពស់ការនាំចេញនូវផលិតផលកសិកម្ម។
លោក ឌិត ទីណា បានថ្លែងក្នុងពិធីប្រកាសចូលកាន់តំណែងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទនៅថ្ងៃ ទី ១៧ តុលា ថា៖ «ខ្ញុំបាទសូមប្តេជ្ញាចិត្តខិតខំប្រឹងប្រែងអស់ពីកម្លាំងកាយចិត្ត និងប្រាជ្ញាស្មារតី រួមជាមួយថ្នាក់ដឹកនាំមន្ត្រីរាជការគ្រប់លំដាប់ថ្នាក់នៃក្រសួងកសិកម្ម រុក្ខាប្រមាញ់ និងនេសាទ សហការជាមួយគ្រប់ស្ថាប័នពាក់ព័ន្ធដើម្បីបម្រើប្រជាពលរដ្ឋ ដោះស្រាយបញ្ហាប្រឈមជូនប្រជាពលរដ្ឋ ជាពិសេសនៅក្នុងបរិបទដែលប្រជាពលរដ្ឋកំពុងរងផលប៉ះពាល់ដោយសារគ្រោះមហន្តរាយទឹកជំនន់»។
ពិធីផ្ទេរតំណែងរដ្ឋមន្ត្រីកសិកម្មនេះប្រព្រឹត្តទៅក្រោមអធិបតីភាពលោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងក៏មានការចូលរួមពីលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមលោក ស៊ុយ សែម រដ្ឋមន្ត្រីក្រសួងរ៉ែ និងថាមពល លោក សាយ សំអាល់ រដ្ឋមន្ត្រីក្រសួងបរិស្ថាន លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក កើត រិទ្ធ រដ្ឋមន្ត្រីក្រសួងយុត្តិធម៌ និងលោក វេង សាខុន រដ្ឋមន្ត្រីប្រតិភូអមនាយករដ្ឋមន្ត្រី និងមន្ត្រីពាក់ព័ន្ធផ្សេងទៀត។
ការប្រកាសចូលកាន់តំណែងរបស់លោក ឌិត ទីណា ធ្វើឡើង ៣ ថ្ងៃ បន្ទាប់ពីព្រះមហាក្សត្រ និង រដ្ឋសភាបានចេញព្រះរាជក្រឹត្យតែងតាំង និងបោះឆ្នោតផ្តល់សេចក្តីទុកចិត្តលើរូបលោកដោយសំឡេង ១១១ លើ ១១១ និងរយៈពេល ៩ ថ្ងៃបន្ទាប់ពីលោក វេង សាខុន រដ្ឋមន្ត្រីកសិកម្ម ត្រូវបានបញ្ចប់មុខតំណែង។
បន្ថែមពីនេះលោក ឌិត ទីណាបានប្តេជ្ញានឹងខិតខំប្រឹងប្រែងអនុវត្តគោលនយោបាយ ផែនការ និងយុទ្ធសាស្ត្រជាតិនានា ជាពិសេសយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រអភិវឌ្ឍន៍វិស័យកសិកម្មឆ្នាំ ២០២២-២០៣០ ដើម្បីបម្រើផលប្រយោជន៍ជាតិពិតប្រាកដរបស់ប្រជាពលរដ្ឋ។
ជាមួយគ្នានេះ លោកបានប្តេជ្ញាចិត្តលើកកម្ពស់ជីវភាពរបស់ប្រជាកសិករ ដោយធានាឱ្យបាននូវសន្តិសុខស្បៀង ព្រមទាំងលើកកម្ពស់ការនាំចេញ ដើម្បីរួមចំណែកអភិវឌ្ឍសេដ្ឋកិច្ចឱ្យបានកាន់តែជឿនលឿនថែមទៀត។ លោកថ្លែងថា៖ «កសិកម្មគឺជាវិស័យដ៏សំខាន់មួយ នៃខឿនសេដ្ឋកិច្ចកម្ពុជា។ កន្លងមកសមិទ្ធផលធំៗជាច្រើននៃវិស័យនេះត្រូវបានសម្រេចឡើងជាបន្តបន្ទាប់ស្របតាមបរិបទសង្គម និងនយោបាយ។ ជាក់ស្តែងយើងបានបោះជំហានចេញយ៉ាងឆ្ងាយ ពីកសិកម្មដែលពឹងផ្អែកទាំងស្រុងទៅលើទឹកភ្លៀងមកជាកសិកម្មដែលមានបណ្តាញ ស្រោចស្រពខ្វាត់ខ្វែងដែលផ្តល់លទ្ធភាពឱ្យប្រជាកសិករអាចបង្កបង្កើនផលបានច្រើនដង ពីកសិកម្មបែបប្រពៃណីដែលប្រើប្រាស់កម្លាំងមនុស្ស និងសត្វពាហនៈស្ទើរតែទាំងស្រុងមកជាកសិកម្មទំនើប ដែលប្រើប្រាស់គ្រឿងយន្តស្ទើរតែទាំងស្រុងវិញ»។ លោកថ្លែងថា កម្ពុជាបានចាកចេញពីកសិកម្មដែលទទួលទិន្នផលទាប ផ្គត់ផ្គង់តម្រូវការក្នុងស្រុកមិនគ្រប់មកជាកសិកម្មដែលធានាបានទាំងស្រុងនូវសន្តិសុខស្បៀង និងរហូតឈានដល់ការនាំចេញទៅទីផ្សារបរទេស ដោយរួមចំណែកលើកកម្ពស់សេដ្ឋកិច្ចជាតិ។
ក្នុងសន្និសីទកាសែតបន្ទាប់ពីបិទបញ្ចប់ពិធីប្រកាសចូលកាន់តំណែងនេះ លោក ឌិត ទីណា បញ្ជាក់ថា ប្រហែលជាថ្ងៃទី ១៩ ខែតុលា លោកនឹងត្រូវចុះទៅតាមបណ្តាទីតាំងនៅតាមខេត្តដែលមានប្រជាពលរដ្ឋរងគ្រោះដោយសារគ្រោះទឹកជំនន់ដើម្បីចែកជាជំនួយសម្រាប់ការស្តារឡើងវិញសម្រាប់ប្រជាពលរដ្ឋ។ ឆ្លើយតបទៅនឹងសំណួររបស់អ្នកសារព័ត៌មាន ដែលសួរអំពីការកំណត់យកការងារអាទិភាពចំពោះស្ថានភាពចំពោះមុខនៃគ្រោះទឹកជំនន់នេះ លោកថ្លែងថា៖ «បញ្ហាអាទិភាពនេះ គឺមិនមែនខ្ញុំបាទជាអ្នកកំណត់ផ្ទាល់នោះទេ ព្រោះរាជរដ្ឋាភិបាលមានចំណាត់ការចំពោះការងារគ្រោះមហន្តរាយនោះហើយ។ ឯកឧត្តម ទេសរដ្ឋមន្ត្រី គន់ គីម សព្វថ្ងៃនេះ កំពុងដើរចែកអំណោយនៅឡើយទេ។ អ៊ីចឹង ការងាររដ្ឋាភិបាលមិនចាំតែរដ្ឋមន្ត្រីក្រសួងកសិកម្មដើម្បីទៅធ្វើតែម្នាក់ឯងនោះទេ ហើយអាទិភាពកំណត់ទាំងអស់នេះ ក៏ជាអាទិភាពដែលរាជរដ្ឋាភិបាលបានកំណត់រួចហើយ ដោយមានរូបមន្តច្បាស់លាស់ក្នុងការបែងចែក»។
លោក អូន ព័ន្ធមុនីរ័ត្ន បានថ្លែងក្នុងពិធីនេះថា ផ្អែកតាមការវាយតម្លៃបឋមរបស់ក្រុមការងារ គិតត្រឹមថ្ងៃទី ១២ ខែតុលា ដំណាំស្រូវដែលទទួលរងផលប៉ះពាល់ដោយសារទឹកជំនន់ មានចំនួនប្រមាណជាង ២ សែនហិកតា ផ្ទៃដីដំណាំស្រូវដែលរងការខូចខាតមានចំនួនជាង ៨៥ ពាន់ហិកតា និងផ្ទៃដីដំណាំស្រូវដែលអាចស្តារឡើងវិញមានចំនួនជាង ៤៨ ពាន់ហិកតា។ លោកបានបញ្ជាក់ថា៖ «ខ្ញុំសូមស្នើឱ្យឯកឧត្តមរដ្ឋមន្ត្រី ឌិត ទីណា ថ្នាក់ដឹកនាំ និងមន្ត្រីរាជការ គ្រប់លំដាប់ថ្នាក់នៃក្រសួងកសិកម្ម រុក្ខាប្រមាញ់ និងនេសាទ ចាត់ទុកការងារដោះស្រាយផលប៉ះពាល់ពីទឹកជំនន់នេះ ជាការងារអាទិភាពទី១ នាពេលចំពោះមុខ និងខិតខំអនុវត្តឱ្យបានល្អប្រសើរនូវវិធានការដែលទទួលបាននូវការឯកភាពដ៏ខ្ពង់ខ្ពស់ពីសំណាក់សម្តេចតេជោនាយករដ្ឋមន្ត្រី [ហ៊ុន សែន]»។
លោក វេង សាខុន អតីតរដ្ឋមន្ត្រីកសិកម្ម ដែលត្រូវបានព្រះមហាក្សត្រចេញព្រះរាជក្រឹត្យតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី ក៏បានថ្លែងក្នុងពិធីនេះដែរថា ជាមួយនឹងសមិទ្ធផលដែលសម្រេចបានជាវិជ្ជមានកន្លងមករបស់ក្រសួងកសិកម្ម ក៏នៅមានបញ្ហាប្រឈមមួយចំនួនផងដែរ ដោយលោកបានបញ្ជាក់ថា៖ «យ៉ាងណាក៏ដោយ ខ្ញុំសូមមន្ត្រីគ្រប់ជាន់ថ្នាក់ទាំងអស់ ដែលជាសេនាធិការ ត្រូវបន្តចូលរួមឱ្យបានជិតស្និទ្ធបន្ថែមទៀតក្នុងស្មារតីទទួលខុសត្រូវតាមជំនាញនីមួយៗដើម្បីរួមគ្នាអភិវឌ្ឍវិស័យកសិកម្មឱ្យទទួលបានជោគជ័យក្រោមការដឹកនាំរបស់ឯកឧត្តម ឌិត ទីណា ដែលនឹងត្រូវទទួលភារកិច្ចថ្មីជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ»៕
វីដេអូ៖
