លោកនាយករដ្ឋមន្ត្រី ហ៊ុន សែន និងប្រធានាធិបតីអ៊ុយក្រែន លោក Volodymyr Zelenskyy។ រូបថត សហការី
ភ្នំពេញៈ ប្រធានាធិបតីអ៊ុយក្រែន លោក Volodymyr Zelenskyy ប្រកាសធានាថា អ៊ុយក្រែន នឹងនៅតែជាប្រទេសធានាសន្តិសុខស្បៀងសម្រាប់បណ្តាប្រទេសអាស៊ាន ខណៈលោកអរគុណកម្ពុជាដែលជាប្រធានអាស៊ាន ចំពោះការគាំទ្រអធិបតេយ្យភាព និងបូរណភាពទឹកដីអ៊ុយក្រែន ដែលការគាំទ្រនេះធ្វើឡើងនៅឯអង្គការសហប្រជាជាតិ។
លោកប្រកាសធានាដូច្នេះក្នុងជំនួបតាមទូរស័ព្ទជាមួយលោកនាយករដ្ឋមន្ត្រី ហ៊ុន សែន នាល្ងាចថ្ងៃទី ១ ខែវិច្ឆិកា។
លោក Zelenskyy បានសរសរនៅលើ Twitter ក្រោយកិច្ចសន្ទនានេះថា៖ «[ខ្ញុំ] បានជួបសន្ទនាតាមទូរស័ព្ទជាមួយសម្តេចនាយករដ្ឋមន្ត្រី ហ៊ុន សែន។ សូមអរគុណកម្ពុជា ដែលធ្វើជាប្រធានអាស៊ាន ចំពោះការគាំទ្រអធិបតេយ្យភាព និងបូរណភាពទឹកដីអ៊ុយក្រែន សម្រាប់ការគាំទ្រនៅអង្គការសហប្រជាជាតិ។ [សូម] ធានាថា យើងនឹងនៅតែជាប្រទេសធានាសន្តិសុខស្បៀង សម្រាប់បណ្តាប្រទេសអាស៊ាន»។
នាថ្ងៃទី១ ខែវិច្ឆិកា នៅមុនជំនួបជាមួយលោក Zelenskyy លោក ហ៊ុន សែន បានប្រកាសថា ជំនួបនេះនឹងផ្តោតលើទំនាក់ទំនងទ្វេភាគី និងទំនាក់ទំនងរវាងអ៊ុយក្រែន និងអាស៊ាន ហើយថា លោកនឹងអាចចោទសួរលោក Zelenskyy អំពីបញ្ហាការនាំចេញស្បៀងរបស់អ៊ុយក្រែន ទៅកាន់តំបន់ផ្សេងៗ បន្ទាប់ពីការអាក់ខានការនាំចេញស្បៀងពីកំពង់ផែអ៊ុយក្រែន។
លោកថា កាលពីមុននេះ ស្បៀងដែលបាននាំចេញពីអ៊ុយក្រែន ដើម្បីផ្គត់ផ្គង់ទៅកាន់តំបន់ផ្សេងៗ មានស្ថិរភាពបង្គួរ។
កាលពីដើមខែតុលា លោក ហ៊ុន សែន ប្រកាសជំហរមិនគាំទ្រការធ្វើប្រជាមតិរបស់រុស្ស៊ី ដើម្បីកាត់យកទឹកដីអ៊ុយក្រែនបញ្ចូលទៅប្រទេសរុស្ស៊ី ដោយលោកបញ្ជាក់ថា៖ «ខ្ញុំធ្លាប់បានប្រកាសហើយ ថាយើងអត់គាំទ្រទេ ហើយយើងប្រឆាំងជាមួយនឹងការបង្កើតរដ្ឋ ផ្តាច់រដ្ឋ ផ្តាច់ទឹកដី ហើយនិងការប្រើប្រាស់កម្លាំង ឬគំរាមប្រើប្រាស់កម្លាំង»។
កាលពីខែមីនា កម្ពុជាបានបោះឆ្នោតគាំទ្រសេចក្តីសម្រេចរបស់មហាសន្និបាតអង្គការសហប្រជាជាតិដែលទាមទារឱ្យរុស្ស៊ីបញ្ចប់ប្រតិបត្តិការយោធារបស់ខ្លួនជាបន្ទាន់ នៅប្រទេសអ៊ុយក្រែន ខណៈកម្ពុជាក៏បានសម្តែងការព្រួយបារម្ភយ៉ាងខ្លាំងចំពោះស្ថានភាពធ្ងន់ធ្ងរនៃសង្គ្រាមនៅប្រទេសនេះ៕
វីដេអូ៖
