ភ្នំពេញៈ អ្នកជំនាញផ្នែកទំនាក់ទំនងអន្តរជាតិ និងភូមិសាស្ត្រនយោបាយយល់ថា កម្ពុជាគួរជំរុញឲ្យមានការដាក់ស្ថានទូតរវាងកម្ពុជា និងកាណាដា ដើម្បីបង្កើនកិច្ចសហប្រតិបត្តិការទ្វេភាគីទាំងទំនាក់ទំនងនិងពាណិជ្ជកម្ម ដែលកាណាដាក៏ជាមហាប្រទេសមួយក្នុងចំណោមបណ្តាប្រទេសជឿនលឿនទាំង ២០(G-20) ក្នុងសកលលោកផងដែរ។
អ្នកតាមដាននយោបាយអន្តរជាតិយល់ឃើញថា កម្ពុជាគួរចាប់យកឱកាសបង្កើនកិច្ចសហប្រតិបត្តិការទ្វេភាគី កម្ពុជា-កាណាដា ក្នុងពេលដែលនាយករដ្ឋមន្រ្តីកាណាដាលោក Justin Trudeau មកបំពេញទស្សនកិច្ចផ្លូវការក្នុងក្របខ័ណ្ឌអាស៊ាននារាជធានីភ្នំពេញ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក គិន ភា មើលឃើញថា វត្តមានរបស់នាយករដ្ឋមន្ត្រីកាណាដានៅកម្ពុជា ជាការសបញ្ជាក់ឱ្យឃើញពីការវិវត្តជាវិជ្ជមាន នៃទំនាក់ទំនងរវាងប្រទេសទាំង ២ ទោះបីក្នុងក្របខ័ណ្ឌអាស៊ានក្តី ។
ប៉ុន្តែវាជាការឲ្យតម្លៃដល់កម្ពុជាជាម្ចាស់ផ្ទះពីសំណាក់ប្រទេសមហាអំណាចទាំងនោះតួយ៉ាងកាណាដា សហរដ្ឋអាមេរិក ចិន ឥណ្ឌាជាដើម ដែលយល់ព្រមទទួលការអញ្ជើញរបស់កម្ពុជា ហើយកម្ពុជាក្លាយជានិយតករសំខាន់ក្នុងបញ្ហាតំបន់ និងពិភពលោកក្នុងកែវភ្នែកប្រទេសមហាអំណាច។
លោក គិន ភា ថ្លែងថា៖ «វត្តមានរបស់មេដឹកនាំកាណាដា ស្របជាមួយមេដឹកនាំពិភពលោកសំខាន់ៗផ្សេងៗទៀត រាប់ទាំងសហរដ្ឋអាមេរិក ចិន សហភាពអឺរ៉ុប អង្គការសហប្រជាជាតិ បង្ហាញពីសមត្ថភាពក្នុងការសម្របសម្រួលរបស់កម្ពុជាក្នុងការរៀបចំកិច្ចប្រជុំទាំងនេះ ហើយជានយោបាយការបរទេសមួយដែលយើងមានភាពចម្រុះ »។
សម្រាប់ស្ថានភាពទំនាក់ទំនងទ្វេភាគីកម្ពុជា-កាណាដា លោក គិន ភា យល់ថា ទំនាក់ទំនងនៃរដ្ឋទាំង២កំពុងវិវត្តទៅមុខជាសហវិជ្ជមានដោយមិនមានភាពរកាំរកូសណាមួយឡើយ ក្នុងពេលបច្ចុប្បន្ននេះ ហើយកាណាដាក៏ជាដៃគូអភិវឌ្ឍន៍ប្រទេសដ៏សំខាន់សម្រាប់កម្ពុជាផង ក្នុងវិស័យកសាងធនធានមនុស្ស វិស័យបរិស្ថាន និងសង្គមសេដ្ឋកិច្ច។
លោក គិន ភា ផ្តល់យោបល់ដូច្នេះថា៖«កម្ពុជាគួរជំរុញការលើកកម្ពស់ទំនាក់ទំនងរវាងប្រទេសទាំង២រហូត យើងអាចថា នឹងមានការដាក់នូវស្ថានទូតរៀងៗខ្លួន ហើយជំរុញការបំផ្លាស់ប្តូរវិស័យពាណិជ្ជកម្មពីកម្ពុជាទៅកាណាដាបន្ថែមទៀត ហើយជំរុញឲ្យកាណាដាជួយកម្ពុជាបន្ថែមទៀត លើវិស័យអភិវឌ្ឍន៍ធនធានមនុស្ស ព្រោះតម្រូវការកាណាដាមិនសូវខុសគ្នាទៅទីផ្សារសហរដ្ឋអាមេរិកនោះទេ» ។
ជាមួយគ្នានេះដែរ លោក យង់ ពៅ យល់ឃើញថា ដំណើរទស្សនកិច្ចផ្លូវការរបស់នាយករដ្ឋមន្ត្រីកាណាដា លោក Justin Trudeau នៅក្នុងលក្ខខណ្ឌដៃគូសន្ទនារបស់អាស៊ានក្តី ក៏ជាការចូលរួមចំណែកដ៏សំខាន់នៅក្នុងលម្ហភូមិសាស្ត្រនយោបាយបច្ចុប្បន្ន។
ការណ៍នេះបង្ហាញពីឥទ្ធិពលការទូតដែលកម្ពុជាជោគជ័យ ព្រោះបានអញ្ជើញភាគីពាក់ព័ន្ធ ជាពិសេសមហាអំណាចរបស់ពិភពលោកមកអង្គុយពិភាក្សាគ្នានៅរាជធានីភ្នំពេញ។
អ្នកជំនាញភូមិសាស្ត្រនយោបាយរូបនេះ បានមើលឃើញពីកាលានុវត្តភាពនៃនយោបាយការបរទេសកម្ពុជា និងមធ្យោបាយដែលកម្ពុជាអាចធ្វើពិពិធកម្មការទូតជាមួយប្រទេសធំៗបានក្នុងពេលបច្ចុប្បន្ន ដូច្នេះថា៖ «វាបង្ហាញថា កម្ពុជាពេលនេះ ខុសពីកម្ពុជានៅទសវត្សរ៍មុនៗ ដែលគេមើលឃើញគ្រាន់តែជាប្រទេសទន់ខ្សោយ ខ្សោយទាំងនយោបាយ ទាំងការទូត និងសេដ្ឋកិច្ច តែបច្ចុប្បន្ននេះ ទោះបីកម្ពុជាជាប្រទេសតូច តែនយោបាយការទូតរបស់កម្ពុជាបានទទួលលទ្ធផលជោគជ័យ »។
លោក យង់ ពៅ ចង់ឃើញ ការដាក់ស្ថានទូត ឬស្ថានតំណាង រវាងកាណាដា និងកម្ពុជា ដើម្បីបង្កើនការភ្ជាប់ទំនាក់ទំនងរវាងប្រទេសទាំង២ក្នុងស្ថានភាពលម្ហភូមិសាស្ត្រនយោបាយថ្មីនេះ បើទោះបីទំនាក់ទំនងរវាងប្រទេសទាំង ២ នារយៈពេលចុងក្រោយនេះ ហាក់មិនសូវមានភាពសកម្មនិងនៅមានកម្រិតក្តី តែត្រូវចាប់ផ្តើមទំព័រទំនាក់ទំនងថ្មី។
គួររំឭកថា នាយករដ្ឋមន្ត្រីកាណាដា លោក Justin Trudeau នឹងមានវត្តមាននៅរាជធានីភ្នំពេញសម្រាប់កិច្ចប្រជុំកំពូលអាស៊ានលើកទី៤០ និង៤១ ដែលកម្ពុជាធ្វើជាម្ចាស់ផ្ទះក្នុងឆ្នាំនេះ នៅថ្ងៃទី ១២ ដល់ ១៣ ខែវិច្ឆិកា ឆ្នាំ ២០២២។
នាយករដ្ឋមន្ត្រីកាណាដានឹងចូលរួមដោះស្រាយបញ្ហាប្រឈមក្នុងតំបន់ និងពិភពលោកជាមួយសមភាគីអាស៊ាន និងបណ្តារដ្ឋក្នុងតំបន់ឥណ្ឌូប៉ាស៊ីហ្វិក ជាពិសេសលោកនឹងចូលរួមកិច្ចប្រជុំអនុស្សាវរីយ៍អាស៊ាន-កាណាដា ដើម្បីប្រារព្ធខួបលើកទី៤៥ នៃទំនាក់ទំនងកិច្ចសន្ទនាអាស៊ាន-កាណាដា។
លោក Justin Trudeau បានបញ្ជាក់ពីបំណងរបស់លោកក្នុងកិច្ចប្រជុំកំពូលអាស៊ាននៅរាជធានីភ្នំពេញខាងមុខថា លោកនឹងលើកកម្ពស់សន្តិភាព និងស្ថិរភាពក្នុងតំបន់ ពាណិជ្ជកម្មដែលផ្អែកតាមទិដ្ឋភាពច្បាប់ កំណើនសេដ្ឋកិច្ចដែលផ្តល់ផលប្រយោជន៍រួមដល់មនុស្សគ្រប់គ្នា និងដើម្បីរឹតចំណងទំនាក់ទំនងឱ្យរឹងមាំរវាងប្រជាជន និងប្រជាជនរវាងកាណាដានិងប្រជាជាតិអាស៊ីអាគ្នេយ៍ ៕