លោកស្រី ម៉ែន នារីសោភ័គ និងលោក Abdul Rahman Saleh Al-Saleh (កណ្តាល)ក្នុងជំនួប កាលពីថ្ងៃទី ១៥ វិច្ឆិកា។ រូបថត កាកបាទក្រហមកម្ពុជា
ភ្នំពេញៈ កាកបាទក្រហមកម្ពុជា សំណូមពរឱ្យសមាគមជាតិអឌ្ឍចន្ទក្រហមគុយវ៉ែត ជួយលើការកសាងសហគមន៍ឱ្យមានភាពធន់នឹងគ្រោះមហន្តរាយ ខណៈអឌ្ឍចន្ទក្រហមគុយវ៉ែត នឹងអាចចាប់ផ្តើមទំនាក់ទំនងធ្វើការងារមនុស្សធម៌ជាមួយនឹងកាកបាទក្រហមកម្ពុជា។
នេះជាការលើកឡើងរបស់លោក Abdul Rahman Saleh Al-Saleh ប្រធាននាយកដ្ឋានបញ្ជាទិញ និងភ័ស្តុភារ នៃសមាគមជាតិអឌ្ឍចន្ទក្រហមគុយវ៉ែត ក្នុងជំនួបពិភាក្សាការងារស្តីពីកិច្ចសហប្រតិបត្តិការមនុស្សធម៌ ជាមួយលោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា នាថ្ងៃទី ១៥ ខែវិច្ឆិកា ឆ្នាំ ២០២២។
លោក Abdul Rahman Saleh Al-Saleh បានលើកឡើងក្នុងជំនួបនោះថា នេះជាលើកដំបូងហើយ ដែលគណៈប្រតិភូអឌ្ឍចន្ទក្រហមគុយវ៉ែត បានមកទស្សនកិច្ចផ្ទាល់នៅទីស្នាក់ការកណ្តាល កាកបាទក្រហមកម្ពុជា ហើយលោកក៏បានបញ្ជាក់ផងដែរថា បច្ចុប្បន្នអឌ្ឍចន្ទក្រហមគុយវ៉េត បានធ្វើសកម្មភាពមនុស្សធម៌ជួយដល់បណ្តាសមាគមជាតិជាង៩០ប្រទេស ដែលជាសមាជិករបស់សហព័ន្ធអន្តរជាតិ ដែលជួបប្រទះនឹងគ្រោះមហន្តរាយផ្សេងៗ។
លោក Abdul Rahman Saleh Al-Saleh មានប្រសាសន៍ថា ៖ «ប៉ុន្តែសម្រាប់កាកបាទក្រហមកម្ពុជា ខាងអឌ្ឍចន្ទក្រហមគុយវ៉ែត មើលឃើញថា រាជរដ្ឋាភិបាលកម្ពុជា និងកាកបាទក្រហមកម្ពុជា មានសមត្ថភាពគ្រប់គ្រាន់ក្នុងការឆ្លើយតបទៅនឹងគ្រោះមហន្តរាយនៅក្នុងប្រទេសរបស់ខ្លួន»។
លោកសង្ឃឹមថា អឌ្ឍចន្ទក្រហមគុយវ៉ែត និងកាកបាទក្រហមកម្ពុជា នឹងអាចចាប់ផ្តើមទំនាក់ទំនងធ្វើការជាមួយគ្នាក្នុងការងារមនុស្សធម៌នេះ។
យោងតាមកាកបាទក្រហមកម្ពុជា បានឱ្យដឹងថា នៅល្ងាចថ្ងៃទី ១៥ វិច្ឆិកា លោក Abdul Rahman Saleh Al-Saleh ក៏បានជួបជាមួយក្រសួងសេដ្ឋកិច្ចនិងហិរញ្ញវត្ថុនៃកម្ពុជា ដើម្បីស្វែងយល់ពីការជួយឧបត្ថម្ភដល់មន្ទីរពេទ្យកុមារគន្ធបុប្ផា ហើយពាក់ព័ន្ធនឹងការផ្តល់ថវិកាទៅមន្ទីរពេទ្យកុមារគន្ធបុប្ផានេះ ខាងអឌ្ឍចន្ទក្រហមគុយវ៉ែត គឺមានបំណងផ្ញើថវិកា តាមរយៈកាកបាទក្រហមកម្ពុជា។
ក្នុងឱកាសជំនួបពិភាក្សាការងារនោះដែរ លោកស្រី ម៉ែន នារីសោភ័គ ក៏បានថ្លែងអំណរគុណចំពោះអឌ្ឍចន្ទក្រហមគុយវ៉ែត ដែលមានចំណាប់អារម្មណ៍ជួយកាកបាទក្រហមកម្ពុជា និងបានចាប់ផ្តើមធ្វើការជាមួយគ្នាចាប់ពីពេលនេះផងដែរ។
លោកស្រីមានប្រសាសន៍ថា៖ «ការងារធំៗដូចជាការឆ្លើយតបគ្រោះមហន្តរាយ គ្រោះទឹកជំនន់ជាដើមនោះ រាជរដ្ឋាភិបាលកម្ពុជា មានប្រព័ន្ធស្បៀងបម្រុងកម្ពុជា ដែលស្ថិតក្រោមការគ្រប់គ្រងរបស់ក្រសួងសេដ្ឋកិច្ចនិងហិរញ្ញវត្ថុ និងមានគណៈកម្មាធិការជាតិគ្រប់គ្រងគ្រោះមហន្តរាយ ដែលមានលទ្ធភាពគ្រប់គ្រាន់ក្នុងការឆ្លើយតបទៅនឹងគ្រោះមហន្តរាយទាំងនោះ»។
លោកស្រីបញ្ជាក់ថា ប៉ុន្តែអ្វីដែលកាកបាទក្រហមកម្ពុជា ត្រូវសម្លឹងសម្រាប់ទិសដៅអនាគតនោះ គឺការកសាងសហគមន៍ឱ្យមានភាពធន់នឹងគ្រោះមហន្តរាយ ដូច្នេះកាកបាទក្រហមកម្ពុជា បានសំណូមពរឱ្យអឌ្ឍចន្ទក្រហមគុយវ៉ែត ជួយលើការងារនេះ។
សូមបញ្ជាក់ថា ក្នុងរយៈពេលកន្លងមក អឌ្ឍចន្ទក្រហមគុយវ៉ែត ក៏បានទាក់ទងដើម្បីជួយកាកបាទក្រហមកម្ពុជាផងដែរ ប៉ុន្តែមិនបានដឹងថា និន្នាការរបស់កាកបាទក្រហមកម្ពុជាផ្តោតទៅលើអ្វីខ្លះ តែពេលនេះស្ថាប័នជាតិទាំង ២ នឹងធ្វើការជាមួយគ្នាឱ្យបានរលូនក្នុងសកម្មភាពមនុស្សធម៌៕
