ភ្នំពេញៈ ឯកអគ្គរាជទូតអង់គ្លេសថ្មីប្តេជ្ញាចិត្តជាមួយនគរបាលកម្ពុជាក្នុងការប្រយុទ្ធប្រឆាំងបទល្មើសជួញដូរមនុស្សឆ្លងដែន និងបញ្ជាក់ពីការជួយបណ្តុះបណ្តាលជំនាញដល់នគរបាលជាតិកម្ពុជាបន្តទៀត។
នាថ្ងៃទី ១៧ ខែវិច្ឆិកា លោក នេត សាវឿន អគ្គស្នងការនគរបាលជាតិនៃក្រសួងមហាផ្ទៃបានជួបជាមួយលោក Dominic Williams ឯកអគ្គរាជទូតថ្មីនៃចក្រភពអង់គ្លេសប្រចាំកម្ពុជា នៅឯអគ្គស្នងការដ្ឋាននគរបាលជាតិ រាជធានីភ្នំពេញ។
យោងតាមទំព័រហ្វេសប៊ុកក្រសួងមហាផ្ទៃបានឱ្យដឹងថា លោក Williams បានលើកឡើងពីកិច្ចសហប្រតិបត្តិការ «ដ៏ល្អ» កន្លងមករវាងផ្នែកស្ថានកុងស៊ុលនៃស្ថានទូតអង់គ្លេសប្រចាំនៅកម្ពុជា និងនគរបាលជាតិកម្ពុជាក៏ដូចជាមន្ត្រីនៃក្រសួងមហាផ្ទៃផងដែរ។
ហ្វេសប៊ុកដដែលបញ្ជាក់ថា៖ «ឯកឧត្តម [លោក Williams] ក៏បានថ្លែងការកោតសរសើររាល់កិច្ចសហប្រតិបត្តិការតែងតែរក្សាបាននូវការគោរពសិទ្ធិមនុស្ស ក្នុងនោះក៏បានបង្ហាញពីការប្តេជ្ញាចិត្តជាមួយនគរបាលកម្ពុជា ក្នុងការប្រយុទ្ធប្រឆាំងបទល្មើសជួញដូរមនុស្សឆ្លងដែន ជាពិសេសបទល្មើសរំលោភផ្លូវភេទលើកុមារ ព្រមទាំងបានបញ្ជាក់អំពីការជួយគាំទ្រទាំងបទពិសោធន៍ និងការបណ្តុះបណ្តាលជំនាញដល់នគរបាលជាតិកម្ពុជាបន្តទៀតផងដែរ»។
លោក នេត សាវឿន ក៏បានថ្លែងអំណរគុណចំពោះកិច្ចសហប្រតិបត្តិការដែលផ្តល់ដោយទីភ្នាក់ងារឧក្រិដ្ឋកម្មជាតិ (NCA) របស់ចក្រភពអង់គ្លេសពាក់ព័ន្ធនឹងការបណ្តុះបណ្តាលមន្ត្រី ការផ្តល់អាហារូបករណ៍ដល់មន្ត្រីនគរបាលជាតិកម្ពុជាទៅសិក្សានៅប្រទេសអង់គ្លេស និងការផ្តល់ជាមធ្យោបាយសម្ភារបច្ចេកទេសពាក់ព័ន្ធនឹងការប្រយុទ្ធប្រឆាំងបទល្មើសបច្ចេកវិទ្យា។
លោកសង្ឃឹមថាភាគីទាំង ២ នឹងបន្តកិច្ចសហប្រតិបត្តិការឱ្យកាន់តែមានលទ្ធផលល្អបន្ថែមទៀត៕