ភ្នំពេញៈ យូនីសេហ្វ និងដៃគូអំពាវនាវដល់មនុស្សគ្រប់រូបឱ្យលើកកម្ពស់សិទ្ធិកុមារ ដើម្បីកសាងពិភពលោកកាន់តែល្អជាមួយពួកគេ។
នាថ្ងៃទី ១៨ ខែវិច្ឆិកា យូនីសេហ្វ បានប្រារឰទិវាកុមារពិភពលោកជាមួយព្រឹត្តិការណ៍រំលេចទេពកោសល្យយុវជន ដែលជំរុញឱ្យមានការផ្លាស់ប្តូរវិជ្ជមានសម្រាប់អនាគតប្រកបដោយសមភាព និងបរិយាប័ន្ន។
ព្រឹត្តិការណ៍នេះមានការចូលរួមពីកុមារ យុវជន និងអ្នកគាំទ្រនានាដែលរួមមានមន្ត្រីជាន់ខ្ពស់មកពីរាជរដ្ឋាភិបាលកម្ពុជា មនុស្សមានឥទ្ធិពល អ្នកតំណាង និងសហគ្រិនមកពីសហគមន៍អភិវឌ្ឍន៍ និងការទូត។
ទិវាកុមារពិភពលោកនៅឆ្នាំនេះផ្ដោតសំខាន់ទៅលើកុមារ និងយុវជន ដែលកំពុងជួយកសាងពិភពលោកមួយដែលកាន់តែមានសមភាព និងបរិយាប័ន្ន។ ព្រឹត្តិការណ៍នៅក្រុងភ្នំពេញនេះផ្ដោតលើអ្នកដឹកនាំវ័យក្មេងនៃកម្មវិធីជំនាន់ថ្មី ដែលជាគំនិតផ្ដួចផ្ដើមមួយរបស់យូនីសេហ្វ ដែលបានផ្តល់អត្ថប្រយោជន៍ដល់កុមារ និងយុវជនជាង ២ ០០០ នាក់រួចមកហើយ នៅក្នុងឆ្នាំនេះ។
សេចក្តីប្រកាសព័ត៌មានយូនីសេហ្វ បញ្ជាក់នាថ្ងៃទី ១៨ ខែវិច្ឆិកា ថា៖ «ទិវាកុមារពិភពលោក គឺជាព្រឹត្តិការណ៍ប្រចាំឆ្នាំសម្រាប់ធ្វើសកម្មភាព ដែលត្រូវប្រារព្ធឡើងដោយកុមារ និងយុវជន និងសម្រាប់កុមារ និងយុវជន។ នៅថ្ងៃនេះ យូនីសេហ្វ និងដៃគូ សូមអំពាវនាវដល់មនុស្សគ្រប់រូបឱ្យលើកកម្ពស់ និងអបអរសាទរដល់ទិវាសិទ្ធិកុមារ ដែលនាំទៅធ្វើសកម្មភាពនានា ដើម្បីកសាងពិភពលោកកាន់តែល្អជាមួយពួកគេ»។
លោក ពុធ សាមិត្ត អគ្គនាយកនៃអគ្គនាយកដ្ឋានអប់រំទូទៅនៃក្រសួងអប់រំ យុវជន និងកីឡា ថ្លែងថា ព្រឹត្តិការណ៍នេះ មានសារៈសំខាន់ និងអត្ថន័យធំធេង ដើម្បីបណ្តុះនូវគំនិត និងមហិច្ឆតារបស់កុមារ និងយុវជនឱ្យមានជំនឿជឿជាក់ និងក្តីសង្ឃឹមដ៏មុតមាំចំពោះអនាគតដ៏ត្រចះត្រចង់ តាមរយៈការទទួលបានការអប់រំមានគុណភាព និងការឆ្លើយតប។
លោកត្រូវបានស្រង់សម្ដីនៅក្នុងសេចក្តីប្រកាសព័ត៌មាននេះថា៖ «ក្រសួងគាំទ្រនូវកម្មវិធីនេះដូចដែលបានដាក់អាទិភាពនៅក្នុងផែនទីបង្ហាញផ្លូវការអប់រំនៅកម្ពុជាឆ្នាំ២០៣០ ផែនការយុទ្ធសាស្ត្រវិស័យអប់រំ៥ឆ្នាំ និងផែនការប្រតិបត្តិប្រចាំឆ្នាំ ក្នុងការវិនិយោគលើការអប់រំសម្រាប់យុវជន»។
លោក ចូសែហ្វ សូយ័រ អ្នកសម្របសម្រួលអង្គការសហប្រជាជាតិប្រចាំកម្ពុជាថ្លែងថា អនាគតប្រកបដោយចីរភាពនឹងមិនអាចកសាងបានទ្បើយ បើសិនជាមិនមានការចូលរួមពីកុមារនិងយុវជន ដែលជាក្រុមមនុស្សនឹងរស់នៅក្នុងអនាគតនោះ។ គ្រប់គ្នានៅអង្គការសហប្រជាជាតិ គាំទ្រពេញទំហឹងដល់យុវជនឱ្យចូលរួមនៅគ្រប់វិស័យទាំងអស់នៃការអភិវឌ្ឍរបស់ប្រទេស។
លោកត្រូវបានស្រង់សម្ដីនៅក្នុងសេចក្តីប្រកាសព័ត៌មាននេះថា៖ «យើងត្រូវលើកកម្ពស់សកម្មភាពយុវជន នឹងផ្តល់ឱ្យពួកគេនូវឧបករណ៍ដើម្បីដោះស្រាយនូវបញ្ហាប្រឈមនានា។ កម្មវិធីជំនាន់ថ្មីគឺជាឧទាហរណ៍មួយនៃគម្រោងដែលកសាងប្រព័ន្ធគាំទ្រដល់គំនិតដ៏ត្រចះត្រចង់របស់យុវជនឆ្នើមៗ»។
លោក អានៀរបាន ឆាតឺរជី តំណាងស្តីទីយូនីសេហ្វប្រចាំកម្ពុជា បានមានប្រសាសន៍ថា កម្មវិធីជំនាន់ថ្មីបានចាប់ផ្តើមអនុវត្ត ដើម្បីផ្ដល់ឱកាសដល់យុវជន អាចដឹកនាំគម្រោងរបស់ខ្លួន អភិវឌ្ឍឆ្ពោះទៅអនាគតដែលផ្តល់ អាទិភាពដល់តម្រូវការ និងក្តីសង្ឃឹមរបស់កុមារ។ កុមារ និងយុវជនកម្ពុជាកំពុងតែខិតខំប្រឹងប្រែងដើម្បីអនាគតកាន់តែប្រសើរ។ យូនីសេហ្វនឹងបន្តគាំទ្រពួកគេនៅគ្រប់វិស័យនៃជីវិតរបស់ពួកគេ ដូចជាការអប់រំ សុខភាព និងកិច្ចការពារកុមារ។
លោកថា៖ «យើងឱ្យតម្លៃលើកុមារជាស្នូលនៃកម្មវិធីទាំងអស់របស់យើង។ ប៉ុន្តែគ្មានអ្វីដែលធ្វើឱ្យយើងខ្ញុំរំភើបជាងពេលដែលឃើញ កុមារ និងយុវជន ដឹកនាំគម្រោងរបស់ខ្លួនលើវិស័យទាំងនោះ ដូចដែលពួកគេបានបង្ហាញឱ្យយើងឃើញនៅថ្ងៃនេះ ដែលនេះគឺជាឧទាហរណ៍នៃស្មារតីរបស់ទិវាកុមារពិភពលោក»៕