.jpg)
លោក Wang Wentian ឯកអគ្គរដ្ឋទូតចិនប្រចាំកម្ពុជា ថ្លែងកាលពីខែកញ្ញា ឆ្នាំ ២០២២។ ហុង មិនា
ភ្នំពេញៈ លោក Wang Wentian ឯកអគ្គរដ្ឋទូតចិនប្រចាំកម្ពុជា កាលពីចុងសប្ដាហ៍កន្លងមកនេះ បានចេញសារតាមលិខិតចំហ បញ្ជាក់បន្ថែមទៀត ចំពោះចំណងមិត្តភាពចិន និងកម្ពុជាកាន់តែរឹងមាំ ក្រោយពីដំណើរទស្សនកិច្ចរបស់មេដឹកនាំចិនមកកម្ពុជា និងបានចូលរួមកិច្ចប្រជុំកំពូលអាស៊ាន-ចិន និងកិច្ចប្រជុំកំពូលអាស៊ីបូព៌ានៅរាជធានីភ្នំពេញ។
លោក Wang ថ្លែងនៅក្នុងលិខិតចំហ កាលពីថ្ងៃទី ១៩ ខែវិច្ឆិកាថា ចំណុចលេចធ្លោនៃដំណើរទស្សនកិច្ចនេះ ជាការបន្តពង្រឹងជឿទុកចិត្តគ្នាទៅវិញទៅមកលើនយោបាយ និងការកសាងសហគមន៍វាសនារួម ត្រូវបានចាក់ឫសយ៉ាងជ្រៅនៅក្នុងក្រអៅបេះដូងប្រជាជន។
លោក Wang ថ្លែងថា៖ «ភាគីចិនបានបញ្ជាក់ជាថ្មីម្ដងទៀតចំពោះការគោរពឯករាជ្យ អធិបតេយ្យភាព និងបូរណភាពទឹកដីរបស់កម្ពុជា គាំទ្រប្រជាជនកម្ពុជាដើរលើមាគ៌ានៃការអភិវឌ្ឍដែលសមស្របនឹងលក្ខខណ្ឌជាតិរបស់ខ្លួន ខិតខំប្រឹងប្រែងជួយកម្ពុជាក្នុងការការពារស្ថិរភាព សម្រេចបាននូវការអភិវឌ្ឍ និងការកែលម្អជីវភាពរស់នៅរបស់ប្រជាពលរដ្ឋ»។
លោកបន្តថា៖ «ភាគីទាំង ២ បានសង្កត់ធ្ងន់ថា នឹងពន្លឿនការកសាងសហគមន៍វាសនារួមរវាងចិន និងកម្ពុជាឱ្យកាន់តែជិតស្និទ្ធក្នុងសម័យកាលប្រវត្តិសាស្ត្រថ្មីពិភាក្សា និងចុះហត្ថលេខាលើផែនការសកម្មភាពថ្មីក្នុងការកសាងសហគមន៍វាសនារួមរវាងចិន និងកម្ពុជា និងរួមគ្នាបញ្ជូនសារវិជ្ជមានថា ចិន និងកម្ពុជា បន្តមរតកបឋមចិត្តនិងចំណងមិត្តភាពដោយមិនងាករេ»។
លោក លី កេឈាង (Li Keqiang) នាយករដ្ឋមន្ដ្រីចិនបានមកបំពេញទស្សនកិច្ចនៅកម្ពុជារយៈពេល ៤ ថ្ងៃ ចាប់ពីថ្ងៃទី ៨-១១ ខែវិច្ឆិកា។ ក្រោយពីបញ្ចប់ទស្សនកិច្ចនេះ លោកបានចូលរួមកិច្ចប្រជុំកំពូលអាស៊ាន-ចិន និងកិច្ចប្រជុំកំពូលអាស៊ីបូព៌ា នៅរាជធានីភ្នំពេញ ដែលបានបិទបញ្ចប់កាលពីប្រមាណ ១ សប្តាហ៍មុន។
លោក Wang Wentian ឯកអគ្គរដ្ឋទូតចិនប្រចាំកម្ពុជាថ្លែងថា លោក Li បានជ្រើសរើសប្រទេសកម្ពុជា សម្រាប់ដំណើរទស្សនកិច្ចលើកដំបូងរបស់លោក ចាប់តាំងពីមានការផ្ទុះឡើងនូវជំងឺកូវីដ ១៩ បានឆ្លុះបញ្ចាំងពីការយកចិត្តទុកដាក់ខ្ពស់ របស់ភាគីចិនសម្រាប់ទំនាក់ទំនងចិន និងកម្ពុជា ហើយក៏បង្ហាញពីលក្ខណៈសំខាន់ពិសេសនៃទំនាក់ទំនងរវាងប្រទេសទាំង ២។
លោកថ្លែងថា៖ «ដំណើរទស្សនកិច្ចនាលើកនេះបានជួយលើកកម្ពស់កិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ រវាងចិន និងកម្ពុជា ឱ្យកាន់តែស៊ីជម្រៅថែមមួយកម្រិតទៀត ជំរុញទំនាក់ទំនងរវាងប្រទេសទាំង២ឱ្យកាន់តែស៊ីជម្រៅក្នុងកម្រិតខ្ពស់ ផ្តល់អត្ថប្រយោជន៍កាន់តែល្អប្រសើរជូនដល់ប្រជាជនទាំង ២»។
លិខិតនេះបានបញ្ជាក់ថា ក្នុងអំឡុងពេលនៃការបំពេញទស្សនកិច្ចនៅកម្ពុជា លោក Li បានចូលគាល់ព្រះមហាក្សត្រកម្ពុជា និងមានជំនួបជាមួយលោកនាយករដ្ឋមន្ត្រី ហ៊ុន សែន ដោយភាគីទាំង ២ បានពិភាក្សាគ្នាយ៉ាងស៊ីជម្រៅលើប្រធានបទដូចជាការរឹតចំណងមិត្តភាពជាប្រពៃណី ការលើកកម្ពស់កិច្ចសហប្រតិបត្តិការជាក់ស្តែងលើបណ្តាវិស័យ និងបញ្ហាអន្តរជាតិនិងក្នុងតំបន់ដែលជាក្តីបារម្ភរួម និងបានកំណត់ជាកុងសង់ស៊ីសយ៉ាងទូលំទូលាយ។
ភាគីទាំង ២ បានប្រកាសរួមគ្នាថា ឆ្នាំ ២០២៣ ជា «ឆ្នាំមិត្តភាពរវាងចិន និងកម្ពុជា» និងបានចេញសេចក្ដីថ្លែងការណ៍រួម ព្រមទាំងបានចុះហត្ថលេខាលើឯកសារកិច្ចសហប្រតិបត្តិការទ្វេភាគីចំនួន ១៨ ឯកសារ។
ចិន និងកម្ពុជា ក៏បានប្តេជ្ញាបន្តលើកកម្ពស់កិច្ចសហប្រតិបត្តិការជាក់ស្ដែងឱ្យកាន់តែស៊ីជម្រៅ និងជំរុញកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយឱ្យកាន់តែល្អប្រសើរ។ ភាគីទាំង ២ បានឯកភាពពង្រឹងកិច្ចសហប្រតិបត្តិការវិស័យការពារជាតិ និងការអនុវត្តច្បាប់នៃប្រទេសទាំង ២ និងជំរុញបង្ក្រាបសកម្មភាពជួញដូរមនុស្ស ល្បែងស៊ីសងអនឡាញ សកម្មភាពឆបោកតាមទូរគមនាគមន៍ និងបទឧក្រិដ្ឋកម្មដែលពាក់ព័ន្ធ។
ឯកអគ្គរដ្ឋទូតចិនរូបនេះបញ្ជាក់ថា ភាគីទាំង ២ ក៏បានឯកភាពគ្នាពន្លឿនការកសាងរួមគ្នានូវខ្សែក្រវាត់ និងផ្លូវដែលមានគុណភាពខ្ពស់ លើកកម្ពស់កិច្ចសហប្រតិបត្តិការផលិតកម្មនិងវិនិយោគ ពន្លឿនគម្រោងធំៗ ដើម្បីជួយកម្ពុជា ពន្លឿនការកសាងប្រព័ន្ធឧស្សាហកម្មទំនើបនីយកម្ម សម្រេចបានការអភិវឌ្ឍប្រកបដោយចីរភាព។
លោក យង់ ពៅ អគ្គលេខាធិការរាជបណ្ឌិត្យសភាកម្ពុជាប្រាប់ ភ្នំពេញ ប៉ុស្តិ៍ថា ការចុះកិច្ចព្រមព្រៀង និងឯកសារយ៉ាងច្រើនរវាងកម្ពុជា និងចិនក្នុងអំឡុងពេលទស្សនកិច្ចរបស់លោក Li គឺសម្រាប់ជាការបញ្ជាក់ពីទំនាក់ទំនងទ្វេភាគីរវាងកម្ពុជា និងចិន។ ម្យ៉ាងទៀត នៅក្នុងទិដ្ឋភាពនៃភូមិសាស្ត្រនយោបាយនៅក្នុងតំបន់នេះ គឺកម្ពុជាមានតួនាទីសំខាន់ណាស់រវាងទំនាក់ទំនងកម្ពុជា-ចិន ក្នុងបរិបទអាស៊ាននេះ។ កម្ពុជា និងចិនត្រូវការគ្នាទៅវិញទៅមក។
លោកថា៖ «ដូច្នេះ អគ្គរដ្ឋទូតចិនប្រចាំព្រះរាជាណាកម្ពុជា ចេញលិខិតចំហនេះ ជាការពិតហើយ គឺកម្ពុជា-ចិន ជាមិត្តគ្រប់ជ្រុងជ្រោយយ៉ាងដូច្នេះប្រាកដមែន»៕
