លោក ស ខេង ថ្លែងកាលពីថ្ងៃម្សិលមិញ។ រូបថត Sar Kheng page
ពោធិ៍សាត់ៈ រដ្ឋមន្ត្រីក្រសួងមហាផ្ទៃលោក ស ខេង បានណែនាំឱ្យអភិបាលខេត្តពោធិ៍សាត់ថ្មីលោក ខូយ រីដា ខិតខំកសាងសមិទ្ធផលថ្មីៗ និងពង្រឹងការងារឱ្យកាន់តែមានប្រសិទ្ធភាព ខណៈអភិបាលខេត្តថ្មីរូបនេះបានប្តេជ្ញា ខិតខំទប់ស្កាត់បទល្មើសលួច ប្លន់ ល្បែងស៊ីសង និងបង្ក្រាបគ្រឿងញៀនខុសច្បាប់ក្នុងដែនសមត្ថកិច្ចរបស់ខ្លួន។
ក្នុងពិធីប្រកាសចូលកាន់មុខតំណែង កាលពីថ្ងៃទី ២១ វិច្ឆិកា ឆ្នាំ ២០២២ លោក ស ខេង បានលើកឡើងថា ដោយផ្អែកលើលក្ខណសម្បត្តិ សមត្ថភាព និងបទពិសោធន៍បំពេញការងារកន្លងមក រាជរដ្ឋាភិបាលបានលើកសំណើ ទូលថ្វាយព្រះមហាក្សត្រ ស្នើសុំតែងតាំងលោក ខូយ រីដា អភិបាលរងខេត្តបាត់ដំបងឱ្យមកកាន់តំណែងជាអភិបាលខេត្តពោធិ៍សាត់ ជំនួសលោក ជាវ តាយ ដែលមានបញ្ហាសុខភាព។ ជាមួយគ្នានេះលោក ស ខេង ក៏បានស្នើសុំតែងតាំងលោក ជាវ តាយ ជារដ្ឋលេខាធិការក្រសួងមហាផ្ទៃ ដោយផ្អែកលើគុណសម្បត្តិ លក្ខណសម្បត្តិក្នុងការបម្រើការងារជូនជាតិ។
នាឱកាសនោះដែរ លោកឧបនាយករដ្ឋមន្ត្រីបានវាយតម្លៃខ្ពស់ចំពោះលោក ខូយ រីដា ដែលមានបទពិសោធន៍ការងារធ្លាប់កាន់មុខតំណែងជានាយករដ្ឋបាលសាលាខេត្តពោធិ៍សាត់ ជាអភិបាលរងខេត្តពោធិ៍សាត់ និងបាត់ដំបង មុនទទួលមុខតំណែងជាអភិបាលខេត្តពោធិ៍សាត់។
តាមរយៈបទពិសោធន៍ការងារនេះលោក ស ខេង សង្ឃឹមថា អភិបាលខេត្តថ្មីនឹងរួមចំណែកដល់ការអភិវឌ្ឍដល់ថ្នាក់ក្រោមជាតិឱ្យកាន់តែមានប្រសិទ្ធភាព។
លោកថា៖ «សង្ឃឹមថា ឯកឧត្តមអភិបាលខេត្តថ្មីនឹងខិតខំកសាងសមិទ្ធផលថ្មីៗ និងពង្រឹងការងារឱ្យកាន់តែមានប្រសិទ្ធភាពបន្ថែមទៀត បន្តពីឯកឧត្តម ជាវ តាយ និងសូមស្នើសុំថ្នាក់ដឹកនាំ និងមន្ត្រីរាជការ ព្រមទាំងភាគីពាក់ព័ន្ធរួមទាំងប្រជាពលរដ្ឋសហការគាំទ្រឯកឧត្តម ខូយ រីដា»។
លោក ខូយ រីដា មានប្រសាសន៍ថា ការទទួលបានមុខតំណែងជាអភិបាលខេត្តនេះ គឺជាកិត្តិយសដ៏ធំធេង ក្នុងអាជីពជាអ្នករាជការ និងជាវិញ្ញាសាថ្មីមួយសម្រាប់រូបលោក ក្នុងការបំពេញតួនាទី និងភារកិច្ចរួមចំណែកកសាងអភិវឌ្ឍន៍ប្រទេសជាតិមាតុភូមិ ក្នុងពេលបច្ចុប្បន្ន និងអនាគត។
លោកបញ្ជាក់ថា ដើម្បីជាសក្ខីភាពឆ្លើយតបនឹងការផ្តល់នូវការគាំទ្រ និងជំនឿជឿជាក់ប្រកបដោយទំនុកចិត្តពីប្រមុខរាជរដ្ឋាភិបាល លោកប្ដេជ្ញាខិតខំអនុវត្តការងារឱ្យបានម៉ឺងម៉ាត់ទៅតាមគោលការណ៍ច្បាប់ លិខិតបទដ្ឋានគតិយុត្តជាធរមាន និង គោរពគោលការណ៍ណែនាំនានារបស់រាជរដ្ឋាភិបាល ដែលបានដាក់ចេញឱ្យមានប្រសិទ្ធភាពខ្ពស់ ដើម្បីធានាសន្តិសុខសុវត្ថិភាពសណ្ដាប់ធ្នាប់សាធារណៈផលប្រយោជន៍ជាតិ។
បន្ថែមពីនេះ លោកបានប្តេជ្ញាថា៖ «យើងនឹងខិតខំជំរុញការអនុវត្តគោលនយោបាយភូមិឃុំ សង្កាត់មានសុវត្ថិភាពឱ្យកាន់តែមានប្រសិទ្ធភាពតាមកិច្ចខិតខំប្រឹងប្រែងបង្ការទប់ស្កាត់ និងបង្ក្រាបបទល្មើសនានា ពិសេសសកម្មភាពលួចឆក់ប្លន់បទល្មើសគ្រឿងញៀនខុសច្បាប់អំពើជួញដូរមនុស្ស និងល្បែងស៊ីសងខុសច្បាប់ក្នុងភូមិសាស្ត្រខេត្ត កងរក្សាសន្តិសុខសណ្ដាប់ធ្នាប់សង្គមរក្សាស្ថិរភាពនយោបាយ និងភាពសុខដុមនីយកម្មជូនប្រជាពលរដ្ឋកាន់តែល្អប្រសើរឡើងថែមទៀត»។
ក្នុងពិធីឡើងកាន់តំណែងនោះ លោក ខូយ រីដា ក៏បានដាក់ចេញនូវគោលនយោបាយជាច្រើនរួមមាន យកចិត្តទុកដាក់រៀបចំកសាង និងអភិវឌ្ឍលើវិស័យនានាក្នុងខេត្ត ពិសេសការរៀបចំកែលម្អសោភណភាពទីក្រុង និងទីប្រជុំជនក្នុងការចូលរួមប្រឡងប្រណាំងទីក្រុងស្អាត ធ្វើឱ្យមានបរិស្ថានល្អធ្វើឱ្យមានសក្ដានុពលសេដ្ឋកិច្ចសង្គម ដើម្បីលើកកម្ពស់គុណភាពជីវភាពរស់នៅជូនប្រជាជនទូទាំងខេត្ត។
ខិតខំពង្រឹងការអនុវត្តតួនាទីភារកិច្ចនានាក្នុងនាមជាតំណាងរាជរដ្ឋាភិបាល តំណាងក្រសួងស្ថាប័ននានារបស់រាជរដ្ឋាភិបាល ព្រមទាំងខិតខំពង្រឹងគណនេយ្យភាព និងទទួលខុសត្រូវក្នុងការអនុវត្តរាល់ដីកា សេចក្ដីសម្រេចនានារបស់ក្រុមប្រឹក្សា ស្របតាមច្បាប់ លិខិតបទដ្ឋានគតិយុត្តបានកំណត់។
អភិបាលស្តីទីនៃគណៈអភិបាលខេត្តពោធិ៍សាត់ លោក ចេង ឡៃ បានថ្លែងថា សម្រាប់ខេត្តពោធិ៍សាត់ការការពារសន្តិសុខសណ្ដាប់ធ្នាប់សាធារណៈមានលក្ខណៈល្អប្រសើរ ខណៈសកម្មភាពបទល្មើសទាំងឡាយត្រូវបានកាត់បន្ថយជាអតិបរមា៕
