.jpg)
អគារ គ.ជ.ប។ ហុង មិនា
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) កម្ពុជាបានចូលរួមសង្កេតការណ៍ក្នុងដំណើរការបោះឆ្នោតជ្រើសតាំងតំណាងរាស្ត្រ នីតិកាលទី១៥ របស់ម៉ាឡេស៊ី នាឆ្នាំ ២០២២ ពីចម្ងាយតាមរយៈប្រព័ន្ធវីដេអូ ក្នុងគោលដៅពង្រឹងកិច្ចការទំនាក់ទំនងអន្តរជាតិ និងផ្តល់ឱកាសដល់ គ.ជ.ប កម្ពុជាបានដកស្រង់បទពិសោធន៍ចេញពីដំណើរការងារនៃការរៀបចំការបោះឆ្នោតរបស់ម៉ាឡេស៊ី។
យោងតាមសេចក្តីប្រកាសព័ត៌មានរបស់គ.ជ.ប. កម្ពុជា ចេញផ្សាយនៅថ្ងៃទី ២១ ខែវិច្ឆិកា ឆ្នាំ ២០២២ បានឲ្យដឹងថា គណៈកម្មាធិការជាតិរៀបចំការបោះឆ្នោត (គ.ជ.ប) របស់កម្ពុជា បានសម្រេចចូលរួមសង្កេតការណ៍ពីដំណើរការរៀបចំការបោះឆ្នោតតំណាងរាស្ត្រ នីតិកាលទី១៥ របស់ម៉ាឡេស៊ី នាឆ្នាំ ២០២២ នេះ តបតាមការអញ្ជើញពីភាគី គ.ជ.ប. ប្រទេសម៉ាឡេស៊ី។
កម្ពុជាបានចាត់តាំងមន្ត្រី គ.ជ.ប. ចំនួន ១៣ រូប ដែលដឹកនាំដោយលោក ម៉ុក ដារ៉ា អគ្គលេខាធិការរង គ.ជ.ប. ដើម្បីចូលរួមសង្កេតការណ៍បោះឆ្នោតរបស់ប្រទេសម៉ាឡេស៊ី តាមរយៈប្រព័ន្ធវីដេអូសន្និសីទពីចម្ងាយ នៅទីស្តីការ គ.ជ.ប. កម្ពុជាផ្ទាល់ ចាប់ពីវេលាម៉ោង ៧ ដល់ម៉ោង ៩ យប់ កាលពីថ្ងៃទី ១៩ ខែវិច្ឆិកា កន្លងទៅ។
ជាមួយគ្នានេះដែរ បន្ទាប់ពីបញ្ចប់ការសង្កេតការណ៍បោះឆ្នោតពីចម្ងាយនេះ លោក ម៉ុក ដារ៉ា លើកឡើងថា ទោះបីជាការចូលរួមសង្កេតការណ៍បោះឆ្នោតរបស់ប្រទេសម៉ាឡេស៊ីនេះ ប្រព្រឹត្តទៅពីចម្ងាយដោយប្រព័ន្ធវីដេអូក្តី ក៏ជាការចូលរួមចំណែកដ៏សំខាន់ពីសំណាក់កម្ពុជាក្នុងទំនាក់ទំនងអន្តរជាតិនិងជាការដកស្រង់បទពិសោធន៍ការងារសម្រាប់ គ.ជ.ប. កម្ពុជាដែរ។
លោក ម៉ុក ដារ៉ា គូសបញ្ជាក់ ដូច្នេះថា៖ «ការចូលរូមនេះ គឺជាការពង្រឹងកិច្ចការទំនាក់ទំនងអន្តរជាតិឲ្យកាន់តែល្អ ជាពិសេសគឺផ្តល់ឱកាសដល់ គ.ជ.ប កម្ពុជា បានសង្កេតមើល និងស្វែងយល់អំពីការអនុវត្តល្អៗក្នុងការរៀបចំការបោះឆ្នោតនៅប្រទេសម៉ាឡេស៊ី»។
គួរបញ្ជាក់ថា ក្នុងដំណើរការបោះឆ្នោតតំណាងរាស្ត្រម៉ាឡេស៊ី នីតិកាលទី១៥ របស់ម៉ាឡេស៊ី នាឆ្នាំ ២០២២ នេះ ក្រៅពីវត្តមាននៃការចូលរួមសង្កេតការណ៍ពីសំណាក់ គ.ជ.ប. កម្ពុជា ក៏មានដែរនូវវត្តមានអ្នកសង្កេតការណ៍អន្តរជាតិនៃបណ្តាប្រទេសមួយចំនួន និងពីស្ថាប័នអង្គការអន្តរជាតិចំនួនប្រមាណ ៧៥០ នាក់ ផងដែរ។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជាថ្លែងថា ការចូលរួមសង្កេតការណ៍បោះឆ្នោតពីចម្ងាយនេះ ជាទិដ្ឋភាពថ្មីម្យ៉ាង នៅក្នុងសម័យបច្ចេកវិទ្យាព័ត៌មាន និងដំណាក់កាលរាតត្បាតនៃជំងឺឆ្លងជាសកលកូវីដ ១៩ ដែលអាចចូលរួមនិងស្រង់បទពិសោធន៍ពីកិច្ចការរបស់អ្នកជំនាញនៃប្រទេសដទៃក្នុងកិច្ចការរៀបចំការបោះឆ្នោត ប៉ុន្តែនៅមានចំណុចខ្វះខាតមួយចំនួនក្នុងការអង្កេតដោយផ្ទាល់លើឥរិយាបថរបស់អ្នកបោះឆ្នោត។
លោក យង់ ពៅ ចាប់អារម្មណ៍ពីចំណុចរបត់ថ្មីជុំវិញការប្រើប្រាស់បណ្តាញសង្គមជាមួយដំណើរការបោះឆ្នោត ដែលកម្ពុជាអាចទាញយកពីម៉ាឡេស៊ីថា៖ «ម៉ាឡេស៊ីបានជ្រើសរើសបណ្តាញសង្គមដែលពេញនិយម ក្នុងនោះមាន TikTok, Facebook, YouTube ជាដើម ដើម្បីផ្សព្វផ្សាយពីកិច្ចការបោះឆ្នោតនេះ ជាវិធីសាស្ត្រល្អថ្មីដើម្បីបញ្ជ្រាបព័ត៌មានកាន់តែច្បាស់ដល់ដៃប្រជាជន ដែលជាមេរៀនអាចឲ្យ គ.ជ.ប. កម្ពុជាទាញយកជាបទពិសោធន៍ដែរ ព្រោះកម្ពុជាក៏មានសម្ទុះប្រើប្រាស់បណ្តាញសង្គមនេះដែរ»។
លោក យង់ ពៅ ថ្លែងថា បទធិសោធន៍របស់ គ.ជ.ប. កម្ពុជាដែលបានរៀបចំដំណើរការបោះឆ្នោតក្នុងប្រទេសរបស់ខ្លួនដោយខ្លួនឯងរយៈពេលជាច្រើនឆ្នាំកន្លងមកនេះ មានការរីកចម្រើនជាងមុនបន្តិចក្តី ប៉ុន្តែក៏នៅតែមានចំណុចខ្វះខាតដែលគួរទាញយកពីគំរូនៃបណ្តាប្រទេសនានាទៀតដែរតាមរយៈការចូលរួមសង្កេតការណ៍ដូចនេះ។
ដោយឡែកសម្រាប់លោក ថាច់ សេដ្ឋា ប្រធានស្តីទីអ្នកនាំពាក្យគណបក្សភ្លើងទៀន ថ្លែងដោយចង់ឲ្យ គ.ជ.ប. កម្ពុជា ទាញយកបទពិសោធន៍ល្អៗ ពីគំរូភាពនៃចំណុចឯករាជភាពរបស់ គ.ជ.ប. ម៉ាឡេស៊ី និងបណ្តាប្រទេសនានាផ្សេងទៀតដែលខ្លួនបានចូលរួមសង្កេតការណ៍ ដើម្បីយកមកអភិវឌ្ឍខ្លួន។
គួរជម្រាបជូនផងដែរថា គណៈកម្មាធិការជាតិរៀបចំការបោះឆ្នោត (គ.ជ.ប) កម្ពុជា នាពេលកន្លងមក ធ្លាប់បានចូលរួមសង្កេតការណ៍ក្នុងការបោះឆ្នោតនៅតាមបណ្តាប្រទេសជាច្រើន ទាំងក្នុងតំបន់និងពិភពលោក ដើម្បីដកស្រង់បទពិសោធន៍ល្អៗជុំវិញការរៀបចំការបោះឆ្នោត ក្នុងន័យដើម្បីធ្វើការកែលម្អបច្ចេកទេសនិងទម្រង់នៃការរៀបចំរបស់កម្ពុជា ជាពិសេសការធ្វើទំនើបកម្មរតាមបច្ចេកវិទ្យាកុំព្យូទ័រ ក្នុងការពង្រឹងតម្លាភាព សុវត្ថិភាព និងបង្កើនទំនុកចិត្តដល់ពលរដ្ឋកម្ពុជា៕
