ភ្នំពេញៈ គណៈកម្មាធិកាសិទ្ធិមនុស្សកម្ពុជា (គ.ស.ម.ក.) ចាប់ផ្តើមសាកល្បងដាក់ប្រអប់បណ្តឹងសម្រាប់ជនជាប់ឃុំដាក់ពាក្យបណ្តឹងតវ៉ា នៅចំនួន ៣ ទីតាំង គឺនៅមណ្ឌលអប់រំកែប្រែទី ១ម១) មណ្ឌលអប់រំកែប្រែទី ២ (ម២) និងពន្ធនាគាររាជធានីភ្នំពេញ (PJ) ដើម្បីការពារសិទ្ធិសេរីភាពរបស់ជនជាប់ឃុំ។
កាលពីថ្ងៃទី ២៤ ខែវិច្ឆិកា លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធាន គ.ស.ម.ក.បានដឹកនាំសមាជិក និងក្រុមមេធាវីស្ម័គ្រចិត្តរបស់គ.ស.ម.ក. ចុះដាក់ប្រអប់បណ្តឹងនៅ ៣ ទីតាំងនេះ។
សេចក្តីប្រកាសព័ត៌មាន គ.ស.ម.ក. បញ្ជាក់នាថ្ងៃទី ២៤ ខែវិច្ឆិកា ថា៖ «ឯកឧត្តម កែវ រ៉េមី មានគំនិតផ្ដួចផ្ដើមក្នុងការរៀបចំប្រអប់បណ្តឹង ដើម្បីដាក់តាមបណ្តាពន្ធនាគារ និងមណ្ឌលអប់រំកែប្រែ ក្នុងគោលបំណងបន្តពង្រឹងកិច្ចសហប្រតិបត្តិការរវាងគ.ស.ម.ក. និងពន្ធនាគារ ក្នុងការលើកកម្ពស់ ការគោរព និងការការពារសិទ្ធិសេរីភាពរបស់ជនជាប់ឃុំ»។
តាមរយៈប្រអប់បណ្តឹងនេះ ជនជាប់ឃុំអាចដាក់ពាក្យបណ្តឹងតវ៉ារបស់ខ្លួនដោយសម្ងាត់ពាក់ព័ន្ធនឹងភាពមិនប្រក្រតីក្នុងពន្ធនាគារ និងការអនុវត្តនូវសិទ្ធិសេរីភាពរបស់ខ្លួនជូន គ.ស.ម.ក. ដើម្បីពិនិត្យ អង្កេត និងដោះស្រាយ។
ការដាក់ប្រអប់បណ្តឹងនៅចំនួន ៣ ទីតាំងនេះ គឺជាចំណុចចាប់ផ្ដើម និងជាគម្រោងសាកល្បងមុនពេលឈានដល់ការសម្រេចដាក់ប្រអប់បណ្តឹងរបស់ គ.ស.ម.ក នៅគ្រប់បណ្តាពន្ធនាគារទូទាំងរាជធានី ខេត្ត។
គ.ស.ម.ក. បានកោតសរសើរដល់អគ្គនាយកដ្ឋានពន្ធនាគារ ក៏ដូចជាពន្ធនាគារ និងមណ្ឌលអប់រំកែប្រែទូទាំងរាជធានី ខេត្ត ដែលតែងតែធ្វើការសហការយ៉ាងជិតស្និទ្ធក្នុងការលើកកម្ពស់ការគោរព និងការការពារសិទ្ធិសេរីភាពរបស់ជនជាប់ឃុំ ក៏ដូចជាការពង្រឹងនូវប្រសិទ្ធភាពក្នុងការគ្រប់គ្រងពន្ធនាគារ៕