.jpg)
ពិធីចុះហត្ថលេខារវាងក្រសួងប្រៃសណីយ៍និងតំណាងJICA នៅថ្ងៃទី២៩ វិច្ឆិកា ។ រូបថត ក្រសួងប្រៃសណីយ៍
ភ្នំពេញៈ ក្រសួងប្រៃសណីយ៍និងទូរគមនាគមន៍និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានចុះហត្ថលេខាលើគម្រោងធ្វើឱ្យប្រសើរឡើងនូវភាពធន់នៃសាយប័រ (Cyber) ដើម្បីពង្រឹងបន្ថែមទៀតនូវភាពធន់នៃសន្តិសុខសាយប័រនេះ។
នៅថ្ងៃទី ២៩ ខែវិច្ឆិកា លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍បានចូលរួមជាអធិបតីក្នុងពិធីចុះហត្ថលេខាលើកិច្ចសហប្រតិបត្តិការជំនួយបច្ចេកទេសរវាងស្ថាប័នទាំង ២ នេះស្តីពី «គម្រោងធ្វើឱ្យប្រសើរឡើងនូវភាពធន់នៃសាយប័រ (Cyber Resilience)» នៅទីស្តីការក្រសួង។
លោកស្រី កាមៃ ហារឹកុ តំណាង JICA ប្រចាំកម្ពុជា បានចុះហត្ថលេខាលើគម្រោងនេះដែលនឹងត្រូវអនុវត្តជាផ្លូវការចាប់ពីឆ្នាំ ២០២៣ ដែលមានគោលដៅធ្វើឱ្យប្រសើរឡើងនូវសមត្ថភាពក្នុងការផ្តល់សេវារបស់ក្រុមឆ្លើយតបឧប្បត្តិហេតុសន្តិសុខសាយប័រ និងលើកកម្ពស់សកម្មភាពសន្តិសុខសាយប័ររបស់អង្គភាព និងអ្នកពាក់ព័ន្ធ។
គម្រោងនេះក៏មានគោលដៅផ្តល់ធាតុចូលសម្រាប់រៀបចំច្បាប់លិខិតបទដ្ឋានគតិយុត្ត និងស្តង់ដា ដើម្បីពង្រឹងសន្តិសុខសាយប័រដើម្បីសម្រេចបានគោលដៅរួមក្នុងការលើកកម្ពស់ភាពធន់នៃសង្គមឌីជីថលនៅកម្ពុជា។
JICAប្រចាំកម្ពុជាបញ្ជាក់ក្នុងហ្វេសប៊ុកនៅថ្ងៃទី ២៩ ខែវិច្ឆិកាថា នៅក្នុងជំនួបមុនការចុះហត្ថលេខានេះ ភាគីទាំង ២ បានផ្លាស់ប្តូរការសន្ទនាគ្នាទៅលើទំនាក់ទំនងរវាងប្រទេសទាំង២ព្រមទាំងពិភាក្សាអំពីរបៀបពង្រឹងកិច្ចសហប្រតិបត្តិការជិតស្និទ្ធបន្ថែមទៀត ជាពិសេសទៅលើវិស័យបច្ចេកវិទ្យាឌីជីថល និងសន្តិសុខសាយប័រ ។
JICA បញ្ជាក់ថា «ក្រោមកិច្ចសហប្រតិបត្តិការបច្ចេកទេសនេះ ភាគីទាំង ២ រំពឹងថា ភាពធន់នៃសន្តិសុខសាយប័រនឹងត្រូវបានពង្រឹងបន្ថែមទៀតតាមរយៈការបង្កើនសមត្ថភាពសន្តិសុខសាយប័រនៃនាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាន»។
គម្រោងនេះរួមមាន សកម្មភាពដូចជា ការធ្វើឱ្យប្រសើរឡើងនូវការិយាល័យឆ្លើយតបបញ្ហាបន្ទាន់នៃកុំព្យូទ័រ (CSIRT) ការលើកកម្ពស់ការយល់ដឹងអំពីសន្តិសុខសាយប័រសម្រាប់ស្ថាប័នពាក់ព័ន្ធ ប្រជាពលរដ្ឋ និងក្រុមហ៊ុនប្រតិបត្តិការហេដ្ឋារចនាសម្ព័ន្ធព័ត៌មាន (CII) និងការអភិវឌ្ឍគោលនយោបាយនិងលិខិតបទដ្ឋានគតិយុត្តនៅក្នុងវិស័យនេះផងដែរ។
ហ្វេសប៊ុកដដែលបញ្ជាក់ថា «JICA បង្ហាញការកោតសរសើរក្រសួងប្រៃសណីយ៍និងទូរគមនាគមន៍ចំពោះការខិតខំប្រឹងប្រែងផ្សេងៗ និងកិច្ចសហប្រតិបត្តិការយ៉ាងសកម្ម ក្នុងការបង្កើតគម្រោង»៕
