ភ្នំពេញៈ រដ្ឋាភិបាលជប៉ុន បានឯកភាពផ្តល់ថវិកាចំនួនជាង ៥០ ម៉ឺនដុល្លារអាមេរិកសម្រាប់គម្រោងទិញម៉ាស៊ីនផលិតឧបករណ៍សិប្បនិមិ្មត និងសាងសង់អគារស្នាក់នៅមជ្ឈមណ្ឌលស្តារលទ្ធភាពពលកម្មកាយសម្បទាខេត្តតាកែវ និងគម្រោងសាងសង់អគារផ្នែកសម្ភពនិងថែទាំទារកទើបនឹងកើតនៅមន្ទីរពេទ្យបង្អែកខេត្តកំពង់ចាម។
កិច្ចសន្យាផ្តល់ជំនួយនេះត្រូវបានចុះហត្ថលេខាកាលពីថ្ងៃទី ៨ ខែធ្នូ ដោយ លោក តានិណៃ អ៊ិឈិតុម៉ុ (Taninai Ichitomo) ឧបទូតនៃស្ថានទូតជប៉ុនប្រចាំកម្ពុជា និងតំណាងមជ្ឈមណ្ឌលស្តារលទ្ធភាពពលកម្មកាយសម្បទាខេត្តតាកែវ និង មន្ទីរពេទ្យបង្អែកខេត្តកំពង់ចាម។
គម្រោងទិញម៉ាស៊ីនផលិតឧបករណ៍សិប្បនិមិ្មត និងសាងសង់អគារស្នាក់នៅមជ្ឈមណ្ឌលស្តារលទ្ធភាពពលកម្មកាយសម្បទាខេត្តតាកែវ មានថវិកាចំនួនជាង ១៦ ម៉ឺនដុល្លារអាមេរិក។
ជំនួយនេះនឹងត្រូវបានប្រើប្រាស់ដើម្បីដំឡើងឧបករណ៍ចំនួន ១៥ ប្រភេទ សម្រាប់ផលិតឧបករណ៍សិប្បនិមិ្មត និងស្តារនីតិសម្បទា និងសាងសង់អគារស្នាក់សម្រាប់អ្នកជំងឺ នៅមជ្ឈមណ្ឌលស្តារលទ្ធភាពពលកម្មកាយសម្បទាខេត្តតាកែវ (PRC) ក្នុងខេត្តតាកែវ។
សេចក្តីប្រកាសព័ត៌មានស្ថានទូតជប៉ុនប្រចាំកម្ពុជាបញ្ជាក់នាថ្ងៃទី ៨ ខែធ្នូ ថា PRC នេះ បាននិងកំពុងប្រឈមមុខនឹងបញ្ហាមួយចំនួនដោយសារភាពសឹករេចរឹលនៃឧបករណ៍ចាំបាច់នាពេលបច្ចុប្បន្ន ដើម្បីផលិតឧបករណ៍សិប្បនិម្មិត និងរណប និងដោយសារភាពចាស់ទ្រុឌទ្រោមនៃអគារស្នាក់សម្រាប់អ្នកជំងឺ។
សេចក្តីប្រកាសព័ត៌មានបញ្ជាក់ថា៖ «តាមរយៈគម្រោងនេះ យើងរំពឹងថាអ្នកជំងឺចំនួន ៧០០ នាក់ ដែលមកព្យាបាលនៅ PRC នេះ ជារៀងរាល់ឆ្នាំ នឹងទទួលបានអត្ថប្រយោជន៍ពីបរិក្ខារ និងសេវាកម្ម ដែលមានភាពប្រសើរជាងមុន»។
ចំពោះគម្រោងសាងសង់អគារផ្នែកសម្ភពនិងថែទាំទារកទើបនឹងកើត នៅមន្ទីរពេទ្យបង្អែកខេត្តកំពង់ចាម គឺមានថវិកាចំនួនជាង ៣៤ ម៉ឺន ដុល្លារអាមេរិក។
ជំនួយនេះនឹងត្រូវបានប្រើប្រាស់សម្រាប់សាងសង់អគារចំនួន ១ ខ្នង កម្ពស់ ៣ ជាន់ សម្រាប់ផ្នែកសម្ភព និងថែទាំទារកទើបនឹងកើតនៅមន្ទីរពេទ្យបង្អែកខេត្តកំពង់ចាម។
សេចក្តីប្រកាសព័ត៌មានដដែលបានឱ្យដឹងថា មន្ទីរពេទ្យនេះបាន និងកំពុងប្រឈមនឹងបញ្ហាដូចជា ការស្នាក់នៅលើសចំណុះនៅក្នុងអគារផ្នែកសម្ភពបច្ចុប្បន្ន សម្រាប់ម្តាយ និងការចំណាយពេលក្នុងការបញ្ចូនទារកទើបនឹងកើតស្ថិតក្នុងករណីសង្គ្រោះបន្ទាន់ ទៅកាន់ផ្នែកថែទាំទារកទើបនឹងកើត ដែលនៅឆ្ងាយ។
សេចក្តីប្រកាសព័ត៌មានបន្តថា៖ «តាមរយៈការសាងសង់អគារថ្មីផ្នែកសម្ភព និងថែទាំទារកទើបនឹងកើតនេះ យើងរំពឹងថាមន្ទីរពេទ្យអាចផ្តល់កន្លែងស្នាក់ ដែលសមរម្យជាងមុនសម្រាប់ម្តាយដែលទើបសម្រាល និងដំណើរការការព្យាបាលចាំបាច់នានាសម្រាប់ទារកដែលមានតម្រូវការចាំបាច់បានភ្លាមៗ»៕
