ពិធីប្រគល់ និងបើកឱ្យដំណើរការគ្រឿងបរិក្ខារផលិតទឹកភ្លៀងនៅវិទ្យាល័យកំបូលកាលពីថ្ងៃទី១២ ធ្នូ ។ រូបថត សហការី
ភ្នំពេញៈគ្រឿងបរិក្ខារផលិតទឹកភ្លៀងសម្រាប់បរិភោគប្រកបអនាម័យតាមរយៈធុងបាសាំងទឹកធំៗចំនួន៤ដែលអាចផ្ទុកទឹកភ្លៀងបានចំណុះ២ម៉ឺនលីត្រ ត្រូវបានសាកលវិទ្យាល័យជាតិសេអ៊ូលបើកសម្ពោធជាផ្លូវការនិងប្រគល់ជូនដល់នាយកវិទ្យាល័យកំបូល សម្រាប់ឱ្យសិស្សានុសិស្សប្រើប្រាស់បានដល់១ ០០០នាក់ ក្នុង១ថ្ងៃ ចាប់ពីថ្ងៃទី១២ ខែធ្នូ ឆ្នាំ២០២២។
នាយកវិទ្យាល័យកំបូលលោកណុត វ៉ូ បានសម្តែងក្តីរីករាយយ៉ាងក្រៃលែងដែលសាកលវិទ្យាល័យជាតិសេអ៊ូលបានផ្តល់ជូននូវគ្រឿងបរិក្ខារផលិតទឹកភ្លៀងសម្រាប់បរិភោគដល់សិស្សក្នុងវិទ្យាល័យរបស់លោកដែលជាការចូលរួមចំណែកកាត់បន្ថយភាពក្រីក្រ និងជួយកាត់បន្ថយការប្រើប្រាស់គ្រឿងប្លាស្ទិក។
លោកនាយកវិទ្យាល័យបានឱ្យដឹងនៅថ្ងៃបើកសម្ពោធឱ្យប្រើប្រាស់ផ្លូវការកាលពីថ្ងៃទី១២ ខែធ្នូ ថា៖ «គ្រឿងបរិក្ខារនោះ មានបាសាំងទឹកធំៗចំនួន៤ ដោយបាសាំង១ អាចផ្ទុកទឹកភ្លៀងបានចំណុះ ៥០០០លីត្រ ដូច្នេះសរុបទាំង៤បាសាំង អាចរក្សាទឹកទុកបានចំណុះដល់ទៅ២ម៉ឺនលីត្រសម្រាប់ប្រើប្រាស់។ យើងមានក្បាលរ៉ូប៊ីនេសម្រាប់បង្ហូរទឹកស្អាតចេញពីបាសាំងនោះចំនួន២ ដើម្បីប្រើប្រាស់»។
លោកបានបន្ដថា មុនបើកសម្ពោធឱ្យប្រើប្រាស់គឺខាងក្រុមការងាររបស់សាកលវិទ្យាល័យជាតិសេអ៊ូល បានមកសិក្សា និងដំឡើងមុន១ខែ ដើម្បីយកទឹកដែលចម្រោះចេញមកពិនិត្យ និងពិសោធឱ្យឃើញលទ្ធផលល្អមានអនាម័យអាចបរិភោគបានជាមុនសិន។
លោកនាយកវិទ្យាល័យ ណុត វ៉ូ មានប្រសាសន៍ថា៖ «ការជួយបាសាំងទឹក សម្រាប់រក្សាទុកទឹកភ្លៀងយកមកប្រើប្រាស់ ប្រកបដោយភាពអនាម័យពីសំណាក់សាកលវិទ្យាល័យជាតិសេអ៊ូលនេះគឺជាការចូលរួមចំណែកមួយក្នុងការកាត់បន្ថយភាពក្រីក្រីទៅដល់សិស្សានុសិស្សរៀននៅសាលាយើងខ្ញុំផង និងកាត់បន្ថយការប្រើប្រាស់គ្រឿងប្លាស្ទិកផង។ចាប់ពីមានបាសាំងទឹកចម្រោះទឹកភ្លៀងនេះទៅសិស្សានុសិស្សអាចយកដបទឹកផ្ទាល់ខ្លួនមកពីផ្ទះម្នាក់១ ហើយពួកគេអាចដាក់ទឹកបន្ថែមនាពេលប្រើទឹកអស់ ដោយមិនចាំបាច់ទិញទឹកបន្ថែមសម្រាប់បរិភោគនោះឡើយ»។
លោកMoo-Young Han ជាសាស្ត្រាចារ្យកិត្តិយសនៃនាយកដ្ឋានវិស្វកម្មសំណង់ស៊ីវិលនិងបរិស្ថាននៃសាកលវិទ្យាល័យជាតិសេអ៊ូលកំពុងប្រតិបត្តិការគ្រឿងបរិក្ខារដែលបំប្លែងទឹកភ្លៀងទៅជាទឹកបរិភោគនៅក្នុងប្រទេសកម្ពុជា និងប្រទេសថៃ។សាកលវិទ្យាល័យជាតិសេអ៊ូលបានដំណើរការនូវគ្រឿងបរិក្ខារផលិតទឹកភ្លៀងសម្រាប់បរិភោគមានទំហំ ២០តោន នៅក្នុងប្រទេសកម្ពុជា និងប្រទេសថៃ។
លោកសាស្ត្រាចារ្យ Moo-Young Han បានឱ្យដឹងក្នុងពិធីប្រគល់គ្រឿងបរិក្ខារផលិតទឹកភ្លៀងដល់វិទ្យាល័យកំបូលកាលពីថ្ងៃទី១២ខែធ្នូនោះថាសាកលិវិទ្យាល័យជាតិសេអ៊ូលក៏ទើបតែបានប្រគល់ឱ្យសាលាSenaratក្នុងស្រុក
Pakchong ខេត្ត Nakhon Ratchasima ប្រទេសថៃ កាលពីថ្ងៃទី១១ ខែធ្នូ ឆ្នាំ២០២២ ផងដែរ។
លោកបានបញ្ជាក់ថា៖ «វាជាផ្នែកមួយនៃគម្រោងមេគង្គដើម្បីសាងសង់គ្រឿងបរិក្ខារផ្គត់ផ្គង់ទឹកភ្លៀងសម្រាប់បរិភោគ នៅក្នុងប្រទេសនៃតំបន់ទន្លេមេគង្គចំនួន៥ ដែលទទួលរងនូវផលខ្វះខាតទឹកស្អាតបរិភោគ រួមមានប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម ជាដើម ដែលរៀបចំដោយមូលនិធិសហប្រតិបត្តិការឧស្សាហកម្ម-សាកលវិទ្យាល័យជាតិសេអ៊ូល»។
គ្រឿងបរិក្ខារដែលបានដំឡើក្នុងសាលារៀនទាំង២នេះ(កម្ពុជា១ និងថៃ១) មានទំហំ២០តោន ប្រមូលទឹកភ្លៀងធ្លាក់ពីលើដំបូលអគារឆ្លងកាត់ធុងបាសាំងចំនួន៤ ដែលបាសាំង១ មានចំណុះ ៥តោន (៥០០០លីត្រ) រួចបន្តទៅបន្សុទ្ធទឹកនៅដំណាក់កាលទី១។បន្ទាប់មកចូលដំណើរការចម្រោះត្រូវបានបញ្ចប់ ហើយទឹកភ្លៀងនោះនឹងក្លាយជាទឹកអាចបរិភោគបានភ្លាមៗ អាចផ្គត់ផ្គង់ទឹកភ្លៀងបរិភោគបានប្រហែល១លីត្រ ក្នុងមនុស្សម្នាក់ ហើយអាចផ្តល់ការប្រើប្រាស់ ដល់សិស្សានុសិស្ស ចំនួន ១០០០នាក់ ជារៀងរាល់ថ្ងៃ។
លោកMoo-Young Han បានបន្ដថា៖ «តំបន់ដែលមានភ្លៀងធ្លាក់ច្រើនតាមរយៈគ្រឿងបរិក្ខារនេះនឹងអាចរកដំណោះស្រាយផ្អែកលើធម្មជាតិបាន មានន័យថា ការយកប្រយោជន៍ដែលគ្មានសារធាតុគីមី និងការចំណាយតិច។ លើសពីនេះ សិស្សានុសិស្ស នឹងធ្វើការសិក្សាវិភាគអំពីទឹកភ្លៀង ហើយប្រាប់អំពីលទ្ធផលដល់អ្នកស្រុក»។
លោក Moo-Young Han បានរំឭកដែរថា បរិស្ថានទឹកភ្លៀងដែលមិនសូវល្អរបស់ប្រទេសកូរ៉េដែលស្ងួតនៅនិទាឃរដូវនិងមានភ្លៀងនៅរដូវក្តៅបានធ្វើឱ្យកម្រិតនៃការគ្រប់គ្រងទឹកភ្លៀងរបស់កូរ៉េមានភាពល្អប្រសើរបំផុតនៅក្នុងពិភពលោក។
លោកបានពន្យល់ថា៖ «វាជាឧទាហរណ៍ដ៏ល្អមួយ សម្រាប់ការប៉ាន់ស្មានទៅលើរដូវកាលភ្លៀងធ្លាក់។វានឹងមានន័យយ៉ាងជ្រាលជ្រៅ ប្រសិនបើបច្ចេកវិទ្យារបស់យើងអាចជួយដោះស្រាយវិបត្តិអាកាសធាតុក្នុងសហគមន៍អន្តរជាតិបាន»។
វិទ្យាល័យកំបូល នាពេលបច្ចុប្បន្ន មានសិស្សានុសិស្សកំពុងរៀនក្នុងកម្រិតមធ្យមសិក្សាចាប់ពីថ្នាក់ទី៧ដល់ទី១២ ដោយក្នុងនោះថ្នាក់ទី១២ មានចំនួន៣ថ្នាក់ ថ្នាក់ទី១១ មាន៤ថ្នាក់ ថ្នាក់ទី១០ មាន៥ថ្នាក់ ថ្នាក់ទី៩ មាន៥ថ្នាក់ ថ្នាក់ទី៨ មាន៦ថ្នាក់ ថ្នាក់ទី៧ មាន៦ថ្នាក់។ នេះបើតាមរបាយការណ៍សង្ខេបសម្រាប់ឆ្នាំសិក្សាថ្មីនៃឆ្នាំ២០២៣-២០២៤ ពីលោក ណុត វ៉ូ នាយកវិទ្យាល័យកំបូល៕
