អ្នកចូលរួមក្នុងសន្និសីទសារព័ត៌មាន កាលពីព្រឹកថ្ងៃទី១២ធ្នូ។ ហុង មិនា
ភ្នំពេញៈ មហោស្រពជាតិភាពយន្តខ្នាតខ្លីលើកទី៣ រៀបចំដោយនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នឹងប្រព្រឹត្តទៅរយៈពេល ៥ថ្ងៃ គឺចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២២ ដោយទទួលបានស្នាដៃភាពយន្តខ្លីពីសមិទ្ធករខ្មែរដាក់ចូលរួមប្រកួតប្រជែងមានចំនួន ៣៥ ចំណងជើង។
លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌ បង្ហើបថា ការរៀបចំមហោស្រពជាតិភាពយន្តខ្នាតខ្លីនេះក្នុងគោលបំណងជំរុញលើកទឹកចិត្តដល់យុវជន ក្នុងការអភិវឌ្ឍសមត្ថភាព និងការបង្កើតគំនិតច្នៃប្រឌិតដើម្បីរួមចំណែក អភិវឌ្ឍវិស័យភាពយន្តជាតិ ដែលក្រសួងវប្បធម៌ និងវិចិត្រសិល្បៈនឹងរៀបចំលើកទី៣ នៅឆ្នាំ២០២២ ក្រោមពាក្យស្លោក «ភាពយន្តខ្នាតខ្លីជាជំហានឆ្ពោះទៅភាពយន្តខ្នាតវែង-Short Film as a stepping Stone to Feature Films»។
លោកប៉ុក បូរក្ស ប្រាប់ឱ្យដឹងបីចំនួនភាពយន្តខ្នាតខ្លី ដែលបានដាក់ចូលរួមលលើកទី៣ក្នុងកម្មវិធីធ្វើសន្និសីទសារព័ត៌មាន នៅព្រឹកថ្ងៃទី១២ ខែធ្នូ ឆ្នាំ២០២២នេះថា៖ «អស់រយៈពេល ៤ខែ គឺចាប់តាំងពីថ្ងៃទទួលពាក្យស្នើសុំចូលរួមប្រកួតប្រជែងមកគណៈកម្មការរៀបចំមហោស្រព បានទទួលស្នាដៃភាពយន្តខ្នាតខ្លី ដើម្បីសុំចូលប្រកួតប្រជែងចំនួន ៣៥ស្នាដៃ។ ដោយក្នុងនោះមាន ៤ស្នាដៃគឺជាស្នាដៃរបស់សិក្ខាកាម ដែលបានចូលរួមវគ្គបណ្តុះបណ្តាលជំនាញផលិតភាពយន្តខ្នាតខ្លី (Cambodia Film Lab) ដែលរៀបចំដោយនាយកដ្ឋានសិល្បភាពយន្ត និងផ្សព្វផ្សាយវប្បធម៌ និងធ្វើការដឹកនាំបណ្តុះបណ្តាល ដោយលោក Deependra Gauchan។
វគ្គបណ្តុះបណ្តាលនេះ ផ្តោតលើមុខវិជ្ជា ៣សំខាន់គឺមុខវិជ្ជាសរសេរអត្ថបទនិពន្ធភាពយន្ត (Script) មុខវិជ្ជាដឹកនាំរឿង (Directing) និងថតភាពយន្ត (Cinematography) ដែលចាប់ផ្តើមតាំងពីខែ កញ្ញា រហូតដល់ខែវិច្ឆិកា ឆ្នាំ២០២២»។
កម្មវិធីមហោស្រពជាតិភាពយន្តខ្នាតខ្លីលើកទី៣នេះ នឹងបើកសម្ពោធនៅថ្ងៃទី១៦ ខែធ្នូ ឆ្នាំ២០២២ វេលាម៉ោង ៥ល្ងាច និងពិធីបិទមហោស្រព នឹងធ្វើនៅថ្ងៃទី២០ ខែធ្នូ ឆ្នាំ២០២២ ខណៈពានរង្វាន់ធំចំនួន ៣ និងរង្វាន់លើកទឹកចិត្តចំនួន ៥ផ្សេងទៀត។
លោក ប៉ុក បូរក្ស បញ្ជាក់ឱ្យដឹងពីពានរង្វាន់ទាំងនោះថា៖ «ពានរង្វាន់ធំគឺយើងមានពានរង្វាន់មាស (Gold Award) ដែលនឹងទទួលបានពានមាស១ អមដោយសាច់ប្រាក់ ១២លានរៀល ឧបត្ថម្ភដោយរោងភាពយន្ត មេជើ ស៊ីណេផ្លិច (Major Cineplex by Smart)។ ពានរង្វាន់ប្រាក់ (Silver Award) នឹងទទួលបានពានប្រាក់១ អមដោយសាច់ប្រាក់ ៨លានរៀល ឧបត្ថម្ភដោយក្រុមហ៊ុនភេសជ្ជៈ ហនុមាន (Hanuman Beverages)។ ពានរង្វាន់សំរឹទ្ធ (Bronze Award) នឹងទទួលបានពានសំរឹទ្ធ១ អមដោយសាច់ប្រាក់ ៤លានរៀលឧបត្ថម្ភដោយក្រុមហ៊ុន វេសថេច មេឌា (Westec Media)»។
លោកបន្តថា៖ «ចំពោះពានរង្វាន់លើកទឹកចិត្តវិញគឺមានរហូតដល់ចំនួន ៥រង្វាន់។ ទី១ ពានរង្វាន់ទស្សនិកជន (Audience Choice Award) នឹងទទួលបានពាន១ អមដោយកាម៉េរ៉ាឌីជីថល ១គ្រឿង ឧបត្ថម្ភដោយផលិតកម្មរាម (Ream Production)។ ទី២ ពានរង្វាន់ពិសេស របស់មេប្រយោគ (Special Jury Award) នឹងទទួលបានពាន១ អមដោយទឹកប្រាក់ ៣លានរៀល ឧបត្ថម្ភដោយ រោងភាពយន្តលេជេន ស៊ីណេម៉ា (Legend Cinema)។ ទី៣ ពានរង្វាន់អត្ថបទនិពន្ធល្អ (Best Script Award) នឹងទទួលបានពាន១ អមដោយទឹកប្រាក់ ២លានរៀល ឧបត្ថម្ភដោយក្រុមហ៊ុនមេឌាឡូត Media Load។ ទី៤ ពានរង្វាន់អ្នកដឹកនាំរឿងវ័យក្មេង (Rising Director Award) នឹងទទួលបានពាន១អមដោយទឹកប្រាក់ ២លានរៀល ឧបត្ថម្ភដោយក្រុមហ៊ុន ត្រីមូលៀ (Trimulia Hotel)។ ឯទី៥ពានរង្វាន់បច្ចេកទេសល្អ (Technical Excellence) នឹងទទួលបានពាន១ អមដោយទឹកប្រាក់ ២លានរៀល ឧបត្ថម្ភដោយក្រុមហ៊ុន អ៊ឹម ភីកឈ័រ(M-Pictures)»។
ចំពោះស្នាដៃភាពយន្តទាំងអស់ នឹងឆ្លងកាត់ការពិនិត្យវាយតម្លៃជា ២ដំណាក់កាល ដោយអនុគណៈកម្មការមេប្រយោគរបស់មហោស្រព។ ដំណាក់កាលទី១ មានគណៈមេប្រយោគចំនួន ៧រូប នឹងពិនិត្យវាយតម្លៃស្នាដៃទាំងអស់ ដើម្បីជ្រើសរើសយកស្នាដៃភាពយន្តលេចធ្លោចំនួន ៥ស្នាដៃ ដើម្បីដាក់ជូនគណៈមេប្រយោគវគ្គផ្តាច់ព្រ័ត្រ ពិនិត្យសម្រេច នៅថ្ងៃប្រារព្ធពិធីបិទមហោស្រព នាថ្ងៃទី២០ ខែធ្នូ ឆ្នាំ២០២២។ គណៈមេប្រយោគវគ្គដំបូង ក៏ជ្រើសរើសស្នាដៃល្អៗមួយចំនួនផ្សេងទៀត ដើម្បីដាក់ជូនមេប្រយោគវគ្គផ្តាច់ព្រ័ត្រ ពិនិត្យសម្រេចផ្តល់រង្វាន់លើកទឹកចិត្តផ្សេងផងដែរ។
ឯដំណាក់កាលទី២ គណៈមេប្រយោគវគ្គផ្តាច់ព្រ័ត្រចំនួន ៧រូបទៀត នឹងពិនិត្យវាយតម្លៃស្នាដៃភាពយន្តលេចធ្លោទាំង ៥ស្នាដៃចុងក្រោយ ដើម្បីជ្រើសរើសផ្តល់ពានរង្វាន់ប្រចាំកម្មវិធីមហោស្រព និងពានរង្វាន់លើកទឹកចិត្ត។
លោកស៊ិន ចន្ទសាយ៉ា តំណាងគណៈមេប្រយោគប្រាប់ពីលក្ខខណ្ឌ ៦ចំណុច ដែលអនុគណៈកម្មការមេប្រយោគមហោស្រព ត្រូវតែផ្តោតលើការវាយតម្លៃស្នាដៃភាពយន្តខ្លីរបស់សិមិទ្ធករថា៖ «ក្នុងចំណោម ៦ចំណុច មានលក្ខណៈពិសេសជាងគេក្នុងការវាយតម្លៃលើស្នាដៃភាពយន្តខ្លីនោះទី១ ការសរសេរអត្ថបទភាពយន្ត និងទី២ការដឹកនាំរឿង។ ៤ចំណុចផ្សេងទៀតវិញនោះគឺជាចំណែកបន្ទាប់បន្សំដូចជាចំណុចទី៣ ការថត ឬអ្នកថតភាពយន្ត ទី៤ សិល្បៈ ទី៥ បច្ចេកទេសសំឡេង (ផ្តោតទាំងទីកន្លែងថតផ្ទាល់ និងស្ទូឌីយោ) និងទី៦ បច្ចេកទេសកាត់តសំឡេង ឬវីដេអូ»។
លោកស៊ិន ចន្ទសាយ៉ា ក៏បន្តឱ្យដឹងពីកត្តាសំខាន់ ២យ៉ាង ដែលសមិទ្ធករភាពយន្តជំនាន់ក្រោយ ត្រូវចាប់អារម្មណ៍ សម្រាប់ការអភិវឌ្ឍជំនាញខ្លួនឯងដែរគឺជំនាញរឹង (Hard skills) ផ្តោតលើចំណេះដឹងពាក់ព័ន្ធជំនាញភាពយន្ត និងជំនាញទន់ (Soft skills) ផ្តោតលើវិធីសាស្រ្តនៃការប្រើប្រាស់ភាសា ពាក្យពេចន៍នៃការសរសេរភាពយន្ត។
លោក ឯក ប៊ុនថា អគ្គនាយករងនៃអគ្គនាយកដ្ឋានបច្ចេកទេសវប្បធម៌ នៃក្រសួងវប្បធម៌ និងវិចិត្រសិល្បៈសម្តែងនូវការកោតសរសើរ និងវាយតម្លៃខ្ពស់ ដល់ការខិតខំប្រឹងប្រែងរបស់ក្រុមការងារនៅនាយកដ្ឋានសិល្បភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ និងដៃគូសហការ អ្នកឧបត្ថម្ភទាំងអស់ ដែលបានរួមសហការរៀបចំព្រឹត្តិការណ៍មហោស្រពជាតិភាពយន្តខ្នាតខ្លីកម្ពុជាលើកទី៣ ឆ្នាំនេះ។
លោក ឯក ប៊ុនថា បញ្ជាក់ថា៖ «មហោស្រពជាតិភាពយន្តខ្នាតខ្លីកម្ពុជាលើកទី៣ ដែលគ្រោងនឹងរៀបចំនាចុងសប្តាហ៍នេះគឺជាព្រឹត្តិការណ៍ដ៏មានសារៈសំខាន់ និងចាំបាច់ក្នុងការជំរុញ លើកទឹកចិត្តដល់យុវជន ដើម្បីបញ្ចេញគំនិត ចែករំលែកព័ត៌មាន ដែលពួកគេមានតាមរយៈអេក្រង់ ឬផ្ទាំងសំពត់ស និងជាជំហានដំបូងក្នុងការនាំពួកឱ្យក្លាយជាផលិតករភាពយន្ត»។
លោកបន្តថា៖ «ខ្ញុំមានចំណាប់អារម្មណ៍ និងវាយតម្លៃខ្ពស់ចំពោះគណៈកម្មការរៀបចំមហោស្រព ដែលបានរៀបចំឱ្យមានវគ្គបណ្តុះបណ្តាលជំនាញសរសេរអត្ថបទភាពយន្ត ជំនាញដឹកនាំរឿង និងជំនាញថតភាពយន្ត ក្នុងរយៈពេលជាង ៣ខែកន្លងមកនេះ ដែលបានផ្តល់នូវឪកាស និងចំណេះដឹងជាមូលដ្នានបន្ថែមទៀតលើបច្ចេកទេសជំនាញនៃការផលិតភាពយន្តដល់យុវផលិតករវ័យរបស់យើង ហើយសកម្មភាពទាំងនេះ បានរួមចំណែកយ៉ាងសំខាន់ក្នុងគោលដៅជំរុញ និងលើកកម្ពស់ឧស្សាហកម្មភាពយន្តកម្ពុជា ឱ្យមានការរីកចម្រើនប្រកបដោយចីរភាពទៅថ្ងៃអនាគត»។
ស្នាដៃភាពយន្តខ្នាតខ្លីទាំង ៣៥ចំណងជើង ដែលបានដាក់ចូលរួមប្រកួតប្រជែង នឹងត្រូវធ្វើការចាក់បញ្ចាំងនៅរោងភាពយន្តចំនួន ៨ទីតាំងក្នុងរាជធានីភ្នំពេញ ក្នុងនោះរួមមានរោងភាពយន្ត Major Cineplex សាខា Aeon ១ រោងភាពយន្ត Major Cineplex សាខា Aeon ២ រោងភាពយន្ត Legend សាខា Eden Garden រោងភាពយន្ត Legend សាខា Olympia រោងភាពយន្ត Prime សាខា Samai Square រោងភាពយន្ត Prime សាខា ចោមចៅ រោងកុនមជ្ឈមណ្ឌលធនធានសោតទស្សន៍បុប្ផាណា និងរោងកុនវិទ្យាស្ថានភាសាបារាំង។
លោកប៉ុក បូរក្ស បន្ថែមថា៖ «លើសពីនេះ ក្រៅពីការចាក់បញ្ចាំងភាពយន្តខ្នាតខ្លីប្រកួតប្រជែងទាំង ៣៥ស្នាដៃ កម្មវិធីមហោស្រពក៏មានការចាក់បញ្ចាំងភាពយន្តឯកសារខ្លីចំនួន ៣៣ស្នាដៃ ដែលបង្ហាញពីជីវិត ប្រពៃណី វប្បធម៌ ក៏ដូចជាបរិស្ថានរស់នៅ តាមដងទន្លេមេគង្គកម្ពុជាផងដែរ។ ភាពយន្តឯកសារខ្លីទាំងនេះ ផលិតដោយសិក្ខាកាមក្នុងវគ្គបណ្តុះបណ្តាលជំនាញផលិត ភាពយន្តឯកសារដែលរៀបចំដោយ មជ្ឈមណ្ឌលធនធានសោតទស្សន៍បុប្ជាណា ក្នុងរយៈពេលប៉ុន្មានឆ្នាំចុងក្រោយនេះ»។
ភាពយន្តខ្នាតខ្លីទាំង ៣៥ស្នាដៃ នឹងអនុញ្ញាតឱ្យទស្សនិកជនដែលចូលទស្សនាបានដោយសេរី ព្រមទាំងវាយតម្លៃជ្រើសរើសស្នាដៃ ដែលខ្លួនពេញចិត្តផងដែរ។ ខណៈកម្មវិធីបញ្ចាំងមានផ្សព្វផ្សាយតាមហ្វេសប៊ុកផេករបស់មហោស្រព និងវេបសាយមហោស្រព https://www.facebook.com/cnsff៕
