បេក្ខជនដែលត្រូវបានសម្ភាសរកការងារធ្វើកាលពីថ្ងៃទី១៥ធ្នូ។ រូបថត ក្រសួងការងារ
ភ្នំពេញៈ លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានធ្វើជាអធិបតី បើកសន្និសីទអធិការកិច្ចការងារអាស៊ានលើកទី១១ ក្រោមមូលបទ«ការធ្វើទំនើបកម្មអធិការកិច្ចការងារ តាមរយៈបដិវត្តកម្មបច្ចេកវិទ្យា នៅក្រោយជំងឺរាតត្បាតជាសកល» កាលពីថ្ងៃទី១៥ ខែធ្នូ ឆ្នាំ២០២២ នៅទីស្តីការក្រសួងការងារ ដោយមានការចូលរួមពីមន្ត្រីបង្គោលអធិការកិច្ចការងារអាស៊ាន មន្ត្រីបង្គោលសុវត្ថិភាព និងសុខភាពការងារអាស៊ាន លេខាធិការដ្ឋានអាស៊ាន និងដៃគូអាស៊ាន តាមរយៈប្រព័ន្ធវីដេអូ។
បើតាមក្រសួងការងារ មូលបទនៃសន្និសីទនេះ ក៏ជាចំណែកមួយក្នុងការចូលរួមសម្រេចឱ្យ បាននូវគោលដៅរួមក្នុងក្របខ័ណ្ឌរបស់អាស៊ាន ដែលថ្នាក់ដឹកនាំកំពូលបានអនុម័ត ក៏ដូចជាការបន្តសម្រេចឱ្យបាននូវកម្មវិធីការងារនៃរដ្ឋមន្ត្រីការងារអាស៊ាន សំដៅធ្វើឱ្យការអនុវត្តច្បាប់ និងលិខិតបទដ្ឋានគតិយុត្តិពាក់ព័ន្ធ នឹងវិស័យការងារកាន់តែមានប្រសិទ្ធភាពខ្ពស់ តាមរយៈបច្ចេកវិទ្យាព័ត៌មាន ដែលជួយគាំទ្រក្នុងការពង្រឹងប្រសិទ្ធភាពអធិការកិច្ចការងារ សេវាអធិការកិច្ចការងារកាន់តែឆាប់រហ័ស ផ្តល់ភាពងាយស្រួលក្នុងការវាយតម្លៃលក្ខខណ្ឌការងារ និងលក្ខខណ្ឌសុវត្ថិភាព និងសុខភាពការងារ។
បន្ថែមពីនេះ ក៏ដើម្បីសម្រួលដល់ការចុះធ្វើអធិការកិច្ចការងារនៅទីកន្លែងដែលមានហានិភ័យ ឬទីកន្លែងដែលអធិការការងារ មិនអាចចុះធ្វើអធិការកិច្ចការងារដោយផ្ទាល់បាន ដោយសារកត្តាគ្រោះធម្មជាតិ ឬជំងឺឆ្លងផ្សេងៗ។
ជាងនេះទៅទៀត ប្រព័ន្ធអធិការកិច្ចការងារបែបទំនើបក៏នឹងជួយ លើកកម្ពស់កិច្ចសន្ទនាសង្គមឱ្យកាន់តែប្រសើរឡើង និងធានាអនុលោមភាពតាមច្បាប់ និងបទប្បញ្ញត្តិ ស្តីពីការងារផងដែរ។
លោកអ៊ិត សំហេង បានវាយតម្លៃខ្ពស់ចំពោះមន្ត្រីបង្គោលអធិការកិច្ចការងារអាស៊ាន និងមន្ត្រីបង្គោលសុវត្ថិភាព និងសុខភាពការងារអាស៊ាន ដែលបានសម្រេចគាំទ្រកម្ពុជា ក្នុងការជ្រើសរើសយកមូលបទដ៏មានសារ:សំខាន់នេះ ដោយមានអនុមូលបទ ចំនួន ២ មកធ្វើជាមូលដ្ឋានសម្រាប់ការពិភាក្សានៅក្នុងសន្និសីទលើកទី១១។
អនុមូលបទទាំង២នោះ គឺ ទី១-អធិការកិច្ច និងបច្ចេកវិទ្យាដែលជំរុញឱ្យមានការផ្លាស់ប្តូរសម្រាប់ការងារសមរម្យ និងទី២-អធិការកិច្ចការងារ នៅក្នុងពិភពលោកក្រោយជំងឺរាតត្បាត។ មូលបទនេះ ពិតជាមានលក្ខណ:សមស្របបំផុត ឆ្លើយតបទៅស្ថានភាព នៃការវិវត្តន៍សេដ្ឋកិច្ច-សង្គម ដែលបានរងផលប៉ះពាលពីជំងឺកូវីដ១៩ ក្នុងតំបន់អាស៊ាន និងជាសកលលើការអភិវឌ្ឍគ្រប់វិស័យ រួមមានទាំងវិស័យការងារ ជាពិសេស ស្ថានភាពសុវត្ថិភាព និងសុខភាពការងារ ព្រមទាំងលក្ខខណ្ឌការងារផងដែរ។
បើតាមក្រសួងការងារសន្និសីទអធិការកិច្ចការងារអាស៊ានលើកទី១១ នេះមានគោលបំណងមិនត្រឹមតែដើម្បីចែករំលែកបទពិសោធន៍ និងឧត្តមានុវត្តន៍នៃប្រព័ន្ធអធិការកិច្ចការងារក្នុងតំបន់អាស៊ានប៉ុណ្ណោះទេ ប៉ុន្តែថែមទាំងពិភាក្សាលើនវានុវត្តន៍ បញ្ហាប្រឈម និងយុទ្ធសាស្ត្រឆ្ពោះទៅរកការប្រើប្រាស់ប្រព័ន្ធអាយស៊ីធី (ICT) ក្នុងប្រព័ន្ធអធិការកិច្ចការងារផងដែរ។ ដើម្បីឱ្យអង្គសន្និសីទទទួលបានជោគជ័យ ឯកឧត្តមរដ្ឋមន្ត្រី បានផ្តល់អនុសាសន៍ដូចខាងក្រោម៖
បន្ថែមពីនេះ លោករដ្ឋមន្ត្រីបានផ្តល់អនុសាសន៍ចំនួន៣ចំណុច ក្នុងនោះរួមមាន៖
ទី១-គណៈកម្មការអធិការកិច្ចការងារអាស៊ាន និងស្ថាប័នអាស៊ាន គួរពិនិត្យមើលលទ្ធភាពបន្ថែមក្នុងការបង្កើត យន្តការតាមដាន និងវាយតម្លៃការអនុវត្តសេចក្តីសន្និដ្ឋាន និងអនុសាសន៍ដែលបានដាក់ចេញដោយ អង្គសន្និសីទកន្លងមក ព្រមទាំងលើកទឹកចិត្តដល់រដ្ឋជាសមាជិកក្នុងការស្នើគម្រោង/សកម្មភាពនានា ស្របតាមអ្វីដែលបានដាក់ក្នុងអនុសាសន៍នេះ និងកៀរគរការចូលរួមរបស់អង្គការដៃគូខាងក្រៅអាស៊ានផងដែរ។
ទី២- អាស៊ានគួរពង្រីកកិច្ចសហប្រតិបត្តិការរវាងរដ្ឋសមាជិកអាស៊ាន និងជាមួយដៃគូសន្ទនា/អភិវឌ្ឍន៍ របស់អាស៊ាន ដើម្បីចែករំលែកបទពិសោធន៍ និងភាពជោគជ័យរបស់ខ្លួនក្នុងវិស័យអធិការកិច្ចការងារ ជាពិសេសជាមួយប្រទេសប្រើប្រាស់បច្ចេកទេសកម្រិតខ្ពស់ សម្រាប់បង្កើនប្រសិទ្ធភាពប្រព័ន្ធអធិការកិច្ចការងារ ថ្នាក់ជាតិរបស់ខ្លួន ក្នុងទម្រង់ដូចជា៖ ដំណើរទស្សនកិច្ចសិក្សា សិក្ខាសាលា/វេទិកាចែករំលែក ជាដើម។
ចំណែកទី៣- គណៈកម្មការអធិការកិច្ចការងារអាស៊ាន គួរមានការផ្សព្វផ្សាយព័ត៌មាន ការបណ្តុះបណ្តាល និងការបញ្ជ្រាបការយល់ដឹងពីបច្ចេកវិទ្យា វិស័យអធិការកិច្ចការងារ និងការផ្តល់សេវាសាធារណៈដល់កម្មករនិយោជិតនៅបណ្តាប្រទេសអាស៊ាន៕
