ទិដ្ឋភាពសម្រាប់ឆ្លងឆ្នាំសកល នៅខេត្តបាត់ដំបង។ រូបថត សហការី
ខេត្តបាត់ដំបង ខេត្តបាត់ដំបង នឹងរៀបចំការបង្ហាញពិព័រណ៍មុខម្ហូបខ្មែរ នៅថ្ងៃឆ្លងឆ្នាំសកល ដើម្បីជាការទាក់ទាញភ្ញៀវទេសចរជាតិ និងអន្តរជាតិ ចូលមកកម្សាន្តក្នុងខេត្តបាត់ដំបង។ នេះបើតាមមន្ត្រីជំនាញនៃមន្ទីរទេសចរណ៍ខេត្តបាត់ដំបង កាលពីថ្ងៃទី ២១ ខែធ្នូ កន្លងទៅ។
អនុប្រធានមន្ទីរទេសចរណ៍ខេត្តបាត់ដំបងលោក នូ ថា ថ្លែងថា ការរៀបចំបង្ហាញពិព័រណ៍មុខម្ហូបខ្មែរ នៅថ្ងៃឆ្លងឆ្នាំសកលនេះ គឺដោយសារខេត្តបាត់ដំបង គឺជាខេត្តមួយដែលមានប្រវត្តិសាស្ត្រ វប្បធម៌ ទំនៀមទម្លាប់យ៉ាងសម្បូរបែបតាំងពីដើមមក។
លោកបន្ថែមថា៖«អ្វីដែលជាការកត់សម្គាល់មួយ គឺភ្ញៀវទេសចរភាគច្រើន ជាពិសេសភ្ញៀវទេសចរក្នុងស្រុក ពេលដែលឮឈ្មោះបាត់ដំបង គេតែងតែនឹកឃើញដល់បទចម្រៀងរបស់អធិរាជសំឡេងមាស ស៊ីន ស៊ីសាមុត ដែលបានរៀបរាប់ពីមុខម្ហូបចំណី អាហារ ដ៏ឈ្ងុយឆ្ងាញ់ ដែលអ្នកនិពន្ធ បានចងក្រងពីប្រវត្តិមុខម្ហូបដ៏ពេញនិយមនិងឈ្ងុយឆ្ងាញ់ដូចជាអាម៉ុកត្រីផ្អកត្រីប្រៃណែមត្រីក្រូចពោធិ៍សាត់ និងដូងខ្ទិះជាដើម»។
លោកបញ្ជាក់ថា ពិព័រណ៌នេះឆ្លុះបញ្ចាំង និងបង្ហាញពីអត្តសញ្ញាណ ស្នាដៃចម្អិនម្ហូបអាហាររបស់អ្នកបាត់ដំបង រហូតពេលខ្លះបានទាក់ទាញដល់ភ្ញៀវទេសចរ ឱ្យមកលេងកម្សាន្ត ដើម្បីបានភ្លក្ស និងស្គាល់រសជាតិ និងមុខម្ហូបខ្លះៗផងដែរ។
លោក នូ ថា ថ្លែងទៀតថា៖ «នេះជាព្រឹត្តិការណ៍មួយ ដែលយើងធ្វើដើម្បីទាក់ទាញភ្ញៀវទេសចរជាតិ និងជាពិសេសភ្ញៀវទេសចរអន្តរជាតិ ដែលយើងបង្ហាញពីសមិទ្ធផលម្ហូបខ្មែរយើង ដែលបន្សល់ទុកពីមុនដូនតាយើងមកអ៊ីចឹង។ ហើយយើងនឹងធ្វើការផ្សព្វផ្សាយថាម្ហូបនេះ ជាម្ហូបអ្នកខេត្តបាត់ដំបង យើងផ្សព្វផ្សាយទៅកាន់ភ្ញៀវទេសចរអន្តរជាតិ ដើម្បីទាក់ទាញ»។
លោកបន្ថែមថា ចំពោះការយកម្ហូបខ្មែរមកតាំងក្នុងព្រឹត្តិការណ៍ពិព័រណ៍ម្ហូបអាហារនេះ គឺមានការរៀបចំ និងជាស្នាដៃរបស់ប្រជាពលរដ្ឋ សហគមន៍ទេសចរ និងតាមបណ្ដាស្ថាប័នរដ្ឋផងដែរ។ក្រៅពីពិព័រណ៌ម្ហូបអាហារ បាត់ដំបងក៏នឹងគ្រោងរៀបចំឱ្យមានការដាក់តាំងពិព័រណ៍ ផលិតផល ការសម្តែងសិល្បៈរបាំប្រពៃណី និងរបាំប្រជាប្រិយ ការសម្តែងសៀក របស់អង្គការហ្វាពន្លឺសិល្បៈកម្ពុជា ការប្រគុំតន្ត្រីខ្នាតតូច-ធំ និង ការអុចកាំជ្រួច ឆ្លងឆ្នាំនៅរាត្រីថ្ងៃទី៣១ ខែធ្នូ ឆ្នាំ២០២២ជាដើម។
លោក សុខ លូ អភិបាលខេត្តបាត់ដំបង បានថ្លែងថាគ្រប់អាជ្ញាធរក្រុង និងមន្ទីរជំនាញពាក់ព័ន្ធទាំងអស់ នឹងធ្វើការចុះពិនិត្យមើលទីតាំងត្រៀមរៀបចំការដាក់តាំងបង្ហាញពិព័រណ៍មុខម្ហូបខ្មែរ របស់ប្រជាពលរដ្ឋខេត្តបាត់ដំបង ដែលល្បីល្បាញ ដើម្បីបង្ហាញជូនដល់ភ្ញៀវទេសចរជាតិ និងអន្តរជាតិ ដែលនឹងមកចូលរួមលេងកម្សាន្តនៅទីនេះ នាឱកាសពិធីអបអរសាទរបុណ្យចូលឆ្នាំថ្មី ឆ្នាំសកល។
ការត្រៀមរៀបចំពិធីបុណ្យឆ្លងឆ្នាំសកល២០២២ ឈានចូលឆ្នាំថ្មី២០២៣ រយៈពេល២ថ្ងៃចាប់ពីថ្ងៃទី៣០-៣១ ខែធ្នូ ឆ្នាំ២០២២ ដោយកំណត់យកទីតាំងខាងមុខសាលាខេត្ត បរិវេណមន្ទីរទេសចរណ៍ខេត្ត តាមដងផ្លូវភ្លោះចាប់ពីស្ពានថ្មថ្មី១៣មករា ខាងមុខសាលាខេត្តចាស់រហូតដល់សួនច្បារស្តុបសួនយុវ័ន ក្នុងសង្កាត់រតនៈ ក្រុងបាត់ដំបង៕
