សិក្ខាសាលាស្ដីពី កម្ពុជា-ចិន រួមជោគជ័យប្រយុទ្ធប្រឆាំងនឹងជំងឺកូវីដ ១៩ កាលពីថ្ងៃទី ២១ ខែធ្នូ។ រូបថត ព្រឹទ្ធសភា
ភ្នំពេញៈ លោក ទេព ងន អនុប្រធានទី ២ ព្រឹទ្ធសភាបានថ្លែងថា ប្រទេសកម្ពុជា និងចិន បានជួយគ្នាទៅវិញទៅមក ហើយប្រទេសចិន បានផ្តល់ជាជំនួយទាំងសម្ភារ វ៉ាក់សាំងកូវីដ ១៩ ថ្នាំចិន និងក្រុមគ្រូពេទ្យប្រយុទ្ធប្រឆាំងជំងឺឆ្លងជាច្រើន មកឱ្យប្រទេសកម្ពុជា។
លោក ទេព ងន បានលើកឡើងដូចនេះកាលពីរសៀលថ្ងៃទី ២១ ធ្នូ ក្នុងសិក្ខាសាលាដែលសហការរៀបចំឡើងដោយ វិទ្យុមិត្តភាពកម្ពុជាចិន នៃអគ្គស្ថានីយវិទ្យុនិងទូរទស្សន៍មជ្ឈិមចិន ព្រឹទ្ធសភាកម្ពុជា ការិយាល័យមូលនិធិចិនដើម្បីសន្តិភាពនិងការអភិវឌ្ឍប្រចាំកម្ពុជា សមាគមអ្នកស្រាវជ្រាវវឌ្ឍនភាពកម្ពុជា-ចិន ក្រោមប្រធានបទ «កម្ពុជា-ចិនរួមជោគវាសនាប្រយុទ្ធប្រឆាំងនឹងកូវីដ ១៩» នៅព្រឹទ្ធសភាកម្ពុជា។
លោកថ្លែងថា៖ «កម្ពុជា និងចិន បានជួយគ្នាទៅវិញទៅមក ដោយចិនបានចាត់បញ្ជូនក្រុមគ្រូពេទ្យប្រយុទ្ធប្រឆាំងជំងឺឆ្លងជាច្រើនលើក ព្រមទាំងបរិច្ចាគសម្ភារប្រយុទ្ធប្រឆាំងនឹងជំងឺកូវីដ ១៩ ក៏ដូចជាវ៉ាក់សាំងការពារជំងឺកូវីដជាច្រើនដូស និងច្រើនលើកមកកាន់ប្រទេសកម្ពុជាជួយឱ្យកម្ពុជាទទួលបានលទ្ធផលល្អក្នុងការប្រយុទ្ធប្រឆាំងជំងឺកូវីដ ១៩»។
លោកបន្ថែមថា៖ «រដ្ឋាភិបាលក៏ដូចជាប្រជាជននៃប្រទេសទាំង ២ កម្ពុជា-ចិន នៅតែបន្តការជួយយកអាសាគ្នាទៅវិញទៅមករួមសុខរួមទុក្ខជាមួយគ្នា និងចូលរួមចំណែកយ៉ាងសកម្មក្នុងកិច្ចសហប្រតិបត្តិការប្រយុទ្ធប្រឆាំងនឹងជំងឺមួយនេះ»។
ថ្មីៗនេះប្រទេសចិនបានកែសម្រួលវិធានការបង្ការ និងគ្រប់គ្រងជំងឺរាតត្បាតម្ដងទៀតដែលនេះគឺជាការសម្របខ្លួនតាមស្ថានភាពជាក់ស្ដែង និងជាសកម្មភាពរបស់ប្រទេសចិនខ្លួនឯងផ្ទាល់ដើម្បីបង្កើនភាពត្រឹមត្រូវនៃការបង្ការ និងគ្រប់គ្រងជំងឺរាតត្បាតដើម្បីអនុវត្តវិធានការមានប្រសិទ្ធភាពក្នុងការសម្របសម្រួល សុវត្ថិភាពសុខភាព និងស្ដារឡើងវិញជីវភាពរស់នៅជាប្រក្រតីរបស់ប្រជាជន។
នាឱកាសនោះដែរ លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងដែរថា កម្ពុជាតាមដានស្ថានភាពជំងឺរាតត្បាតកូវីដ ១៩ នៅក្នុងប្រទេសចិនជាប់ជានិច្ចហើយយល់ឃើញថា ការកែសម្រួលជាបន្តបន្ទាប់នូវវិធានការបង្ការ និងគ្រប់គ្រងជំងឺកូវីដ ១៩ របស់ប្រទេសចិនគឺមានភាពប្រុងប្រយ័ត្នសមស្របតាមបែបវិទ្យាសាស្ត្រ។
លោកស្រីថា៖ «ភាគីចិនរក្សាគោលជំហរ យកប្រជាជនជាសំខាន់ យកអាយុជីវិតជាសំខាន់ ថែរក្សាការពារអាយុជីវិតប្រជាជនដោយបានកាត់បន្ថយអត្រាឆ្លង អត្រាឈឺធ្ងន់និងអត្រាស្លាប់ឱ្យទាបជាងគេបំផុតលើពិភពលោកយ៉ាងជោគជ័យ»។
ទន្ទឹមនឹងនោះដែរ ឯកអគ្គរដ្ឋទូតចិនប្រចាំកម្ពុជា លោក វ៉ាងវិនធាន ថ្លែងដែរថា ក្នុងរយៈពេលជិត ៣ ឆ្នាំដែលជំងឺកូវីដ ១៩ កំពុងតែរីករាលដាល រដ្ឋាភិបាលចិន តែងប្រកាន់ខ្ជាប់លើការយកប្រជាជនជាធំ យកជីវិតប្រជាជនជាធំ បានការពារអាយុជីវិតសុវត្ថិភាព និងសុខភាពរបស់ប្រជាជនអស់ពីលទ្ធភាព និងចៀសផុតពីអត្រានៃការស្លាប់រាប់លាននាក់។
លោកក៏បានលើកឡើងដែរថា លោកទទួលដំណឹងថា ការស្ទង់មតិប្រចាំឆ្នាំថ្មីមួយរបស់មូលនិធិអាល្លឺម៉ង់ Konrad Adenauer-Stiftung បានបង្ហាញថា ក្នុងចំណោមប្រជាជនចន្លោះអាយុចាប់ពី ១៨ ដល់ ៦៤ ឆ្នាំ ដែលរស់នៅទូទាំងប្រទេសកម្ពុជាចំនួន ១ ០០០ នាក់ បានទទួលកិច្ចសម្ភាសន៍ ក្នុងនោះចំនួនជិត ៣ ភាគ ៤ យល់ថា ចិនជាដៃគូដ៏ជិតស្និទ្ធបំផុត សម្រាប់កម្ពុជា។
លោក វ៉ាង វិនធាន ថ្លែងថា៖ «កិច្ចសហប្រតិបត្តិការចិន-កម្ពុជាទទួលបានការពេញចិត្តពីប្រជាជន មិនត្រឹមតែបានការពារផលប្រយោជន៍នៃប្រទេស និងប្រជាជនខ្លួនប៉ុណ្ណោះទេ ហើយថែមទាំងបង្កើតបានជាគំរូសម្រាប់កិច្ចសហប្រតិបត្តិការក្នុងការទប់ស្កាត់វីរុសលើឆាកអន្តរជាតិ និងសម្រាប់ទំនាក់ទំនងបណ្តាប្រទេសនានា»។
លោក វិនធាន ក៏បានណែនាំអ្នកចូលរួមទាំងអស់ក្នុងសិក្ខាសាលាឱ្យបានយល់អំពីស្ថានភាពកែសម្រួលគោលនយោបាយបង្ការ និងគ្រប់គ្រងជំងឺរាតត្បាតរបស់ប្រទេសចិនផងដែរ៕
