មន្ត្រីជំនាញនៅពេលចុះពិនិត្យគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្នុងក្រុងសៀមរាប។ រូបថត ក្រសួងសាធារណការ
សៀមរាបៈ លោក រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណ:ប្រតិភូក្រសួង មន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ ប្រធានមន្ទីរសាធារណការ និងដឹកជញ្ជូនខេត្តសៀមរាប និងក្រុមការងារគម្រោង ចុះពិនិត្យសកម្មភាពអនុវត្តគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្នុងក្រុងសៀមរាប ខណៈគិតមកដល់ត្រឹមពាក់កណ្តាលខែធ្នូ ឆ្នាំ ២០២២ នេះ វឌ្ឍនភាពការងារសរុបនៃគម្រោងសម្រេចបានប្រមាណ ១៧,៥% ហើយ។
យោងតាមផេកហ្វេសប៊ុកក្រសួងសាធារណការនិងដឹកជញ្ជូន ក្រោយពីបានស្តាប់របាយការណ៍ផ្ទាល់នៅនឹងទីតាំងគម្រោងស្ថានីយប្រព្រឹត្តិកម្មទឹកកខ្វក់ (WWTP) កាលពីថ្ងៃទី ២០ ខែធ្នូ ពីតំណាងក្រុមហ៊ុនសាងសង់ WiVASEEN និងទីប្រឹក្សាគម្រោង CTI Engineering លោករស់ វណ្ណា បានបន្តដំណើរចុះពិនិត្យទីតាំងសាងសង់ប្រព័ន្ធលូ នៅតាមបណ្តាទីតាំងអនុវត្តគម្រោងមួយចំនួនទៀត ដូចជាទីតាំងឃ្លាំងស្តុកទុកដាក់បរិក្ខារលូ ទីតាំងចាក់ពុម្ពអណ្តូងលូ គម្របលូ និងស្ថានីយបូមថ្មីមួយកន្លែង។
បន្ទាប់ពីបានចុះពិនិត្យរួចរាល់ លោករដ្ឋលេខាធិការ បានណែនាំឱ្យក្រុមការងារទទួលបន្ទុកគ្រប់ផ្នែកពាក់ព័ន្ធ ត្រៀមរៀបចំបំពេញភារកិច្ចរបស់ខ្លួននីមួយៗឱ្យបានច្បាស់លាស់ និងសហការគ្នាឱ្យបានជិតស្និទ្ធជាមួយគ្រប់ភាគីពាក់ព័ន្ធទាំងអស់ ដើម្បីធ្វើឱ្យដំណើរការការងារអាចប្រព្រឹត្តទៅបានដោយរលូន ប្រកបដោយសុវត្ថិភាព និងប្រសិទ្ធភាព។
លោករស់ វណ្ណា បានជំរុញលើកទឹកចិត្តឱ្យភាគីពាក់ព័ន្ធទាំងអស់ ខិតខំប្រឹងប្រែងបំពេញការងារឱ្យអស់ពីសមត្ថភាព ប្រកបដោយប្រសិទ្ធភាព និងតម្លាភាព និងរិះរកគ្រប់មធ្យោបាយ និងយុទ្ធសាស្ត្រ ដើម្បីបន្តអនុវត្តវឌ្ឍនភាពគម្រោង ដែលកំពុងមានភាពល្អប្រសើរ និងឯកភាពពីគ្រប់ភាគីពាក់ព័ន្ធ។
បើតាមក្រសួងសាធារណការ ការអនុវត្តគម្រោងនេះ ក៏បានជួបប្រទះនឹងបញ្ហាប្រឈមមួយចំនួនផងដែរ ទាក់ទងនឹងការផ្គត់ផ្គង់សម្ភារដូចជាខ្សែកាប ខ្សែទូរស័ព្ទ ខ្សែភ្លើង ព្រមទាំងបណ្តាញបំពង់លូទឹកស្អាត និងលូទឹកភ្លៀងជាដើម៕
.jpg)
