បន្ទាយមានជ័យៈ មនុស្សចំនួន ២៦ នាក់បានស្លាប់ និង ៥៧ នាក់បានរងរបួសក្នុងគ្រោះអគ្គិភ័យឆាបឆេះអគារកាស៊ីណូ Grand Diamond City និង កាស៊ីណូ Poipet Resort នៅច្រកអន្តរជាតិប៉ោយប៉ែត ខេត្តបន្ទាយមានជ័យ ដែលបានកើតឡើងកាលពីយប់ថ្ងៃទី ២៨ ខែធ្នូ។ នេះបើយោងតាមអាជ្ញាធរ។
អាជ្ញាធរបានបិទបញ្ចប់ប្រតិបត្តិការរុករកសាកសពអ្នកស្លាប់ និងអ្នកជាប់គាំងក្នុងហេតុការណ៍អគ្គិភ័យឆេះកាស៊ីណូនៅច្រកអន្តរជាតិប៉ោយប៉ែតនេះ កាលពីល្ងាចថ្ងៃទី៣០ ខែធ្នូ។
របាយការណ៍ស្នងការដ្ឋាននគរបាលខេត្តបន្ទាយមានជ័យដែលបានបង្ហោះនៅលើហ្វេសប៊ុកនាយប់ថ្ងៃទី៣០ ខែធ្នូ ថា៖ «ក្រោយពីបើកប្រតិបត្តិការរុករក និងសង្គ្រោះអស់រយៈពេល៣៩ម៉ោង នៅល្ងាចថ្ងៃទី៣០ ខែធ្នូ អាជ្ញាធរបានបង្ហាញលទ្ធផលផ្លូវការសោកនាដកម្មនៃអគ្គិភ័យឆាបឆេះអគារកាស៊ីណូ Grand Diamond City និង កាស៊ីណូ Poipet Resort មានមនុស្សស្លាប់២៦នាក់ ស្រី១៣នាក់ មិនដឹងភេទ១នាក់ (ព្រោះសពឆេះសល់តែឆ្អឹង) របួសធ្ងន់ស្រាល៥៧នាក់»។
ប្រភពដដែលបន្តថា លោក ខេង សុមេធ អគ្គស្នងការរងនគរបាលជាតិ លោក អ៊ុ រាត្រី អភិបាលខេត្តបន្ទាយមានជ័យ គណៈកម្មាធិការជាតិគ្រប់គ្រងគ្រោះមហន្តរាយ និងជំនាញពាក់ព័ន្ធបានប្រកាសលទ្ធផលផ្លូវការនៃប្រតិបត្តិការអន្តរាគមន៍ពន្លត់ និងរុករកអ្នកស្លាប់ អ្នករបួស អ្នកជាប់គាំង ក្នុងហេតុការណ៍គ្រោះអគ្គិភ័យឆេះកាស៊ីណូទ្រង់ទ្រាយធំនេះ។
ប្រភពដដែលបញ្ជាក់ទៀតថា អាជ្ញាធរបានប្រើប្រាស់កម្លាំងសង្គ្រោះទាំងថ្នាក់ជាតិ និងថ្នាក់ក្រោមជាតិ ជំនាញពាក់ព័ន្ធសរុបចំនួន ១ ០០៩នាក់ មកពី១៤អង្គភាព ក្រុមមូលនិធិសង្គ្រោះនិងសមត្ថកិច្ចថៃ២២២នាក់ រថយន្តសង្គ្រោះនិងរថអគ្គិភ័យ៥៨គ្រឿង។ ក្នុងចំណោមអគារចំនួន៤ មាន៣អគារបានខូចខាតទាំងស្រុង ខណៈទំហំនៃការខូចខាតមិនទាន់វាយតម្លៃសរុបជាទឹកប្រាក់បាននៅឡើយ។
របាយការណ៍បញ្ជាក់ថា អគ្គិភ័យនេះបានកើតឡើងកាលពីវេលាម៉ោង ១១:៤៥នាទីយប់ថ្ងៃទី២៨ ខែធ្នូ ដែលត្រូវបានគេរាយការណ៍ជំហានដំបូងថា ឆ្លងចរន្ដអគ្គិសនី ហើយបានរីករាលដាលតែម្ដង។ ទីតាំងដែលឆេះនេះមាន២អគារ ដោយក្នុងនោះឆេះផ្ដើមដំបូងចេញពីអគារ Grand Diamond City និងរីករាលដាលទៅកាន់អគារ Poipet Resort។
ប្រភពដដែលបន្តថា ប្រតិបត្តិការនៅកន្លែងកើតហេតុ ធ្វើឡើងដោយកម្លាំងរបស់គណៈកម្មាធិការជាតិគ្រប់គ្រងគ្រោះមហន្តរាយ សហការជាមួយកងប្រតិបត្តិការរុករក និងសង្គ្រោះ ៧១១ នៃកងពលតូចលេខ៧០ កម្លាំងអាជ្ញាធរខេត្តបន្ទាយមានជ័យដែលមានកម្លាំងនគរបាល អាវុធហត្ថ និងយោធា ព្រមទាំងមានការចូលរួមពីកងកម្លាំងសមត្ថកិច្ចរបស់ថៃផងដែរ៕
