.jpg)
យុវសិស្សដែលជាប់និទ្ទេស A ខាវ ឧត្តម នៅខេត្តបន្ទាយមានជ័យ។ រូបថត សហការី
បន្ទាយមានជ័យៈ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នាសម័យប្រឡង ៥ ធ្នូ ឆ្នាំ ២០២២ កន្លងទៅនេះ មានសិស្សជាប់បាននិទ្ទេស A ទូទាំងប្រទេសចំនួន ១ ០៤៩ នាក់ ក្នុងចំណោមបេក្ខជនប្រឡងជាប់សរុបចំនួន ៩០ ៩៥០ នាក់ ត្រូវជា ៧២,៣៣ ភាគរយ នៃចំនួនបេក្ខជនដែលបានចូលរួមប្រឡង។
អ្វីដែលគួរឱ្យចាប់អារម្មណ៍នោះគឺបេក្ខជនដែលជាប់និទ្ទេស A ឆ្នាំនេះ មួយចំនួនមានជីវភាពក្រីក្រ ហើយអ្នកជាប់និទ្ទេស A ទាំងអស់ ត្រូវបានសប្បុរសជន ក៏ដូចជាអភិបាលខេត្តនីមួយៗលើកទឹកចិត្តតាមរយៈរូបភាពផ្សេងៗគ្នា ដែលទាំងអស់នោះបានបង្ហាញពីការគាំទ្រនិងលើកទឹកចិត្តដល់អ្នកដែលបានខិតខំប្រឹងប្រែងរៀនសូត្រ។
ក្នុងចំណោមសិស្សជាប់និទ្ទេស A ដែលមានជីវភាពមិនខ្វះខាត ក៏មានបេក្ខជន ខាវ ឧត្តម នៅខេត្តបន្ទាយមានជ័យផងដែរ។ យុវសិស្សរូបនេះមានវ័យ ១៩ឆ្នាំ មានលំនៅនៅភូមិពោធិ៍រាំបុណ្យ ឃុំពន្លៃ ស្រុកភ្នំស្រុក ខេត្តបន្ទាយមានជ័យ បច្ចុប្បន្ន រស់នៅក្នុងបន្ទុកម្ដាយជាស្ត្រីមេម៉ាយ។
ឧត្តម មានបងប្អូន២នាក់ ដោយរូបគេគឺជាកូនបង ហើយជីវភាពគ្រួសាររបស់ ឧត្តម មានស្ថានភាពលំបាក ដោយសារតែម្តាយគឺជាស្ត្រីមេម៉ាយដែលមានវ័យចំណាស់។
ផ្ទុយពីសិស្សមួយចំនួនដែលមានជីវភាពធូរធារ មានឪពុកម្ដាយជាអ្នកផ្គត់ផ្គង់ការសិក្សា ឧត្តម ដែលជាកូនអ្នកខ្វះខាត ត្រូវខំរៀនផង និងខិតខំជួយការងារកសិកម្មរបស់ម្ដាយវ័យ ៤៥ឆ្នាំផង។
មិនត្រឹមតែ មិនបានបោះបង់ចោលការសិក្សា យុវសិស្សម្នាក់នេះកាន់តែខិតខំរៀនសូត្រដោយសង្ឃឹម ថាខ្លួននឹងអាចប្រើចំណេះស្វែងរកការងារសមស្របមួយដែលអាចជួយលើកជីវភាពគ្រួសារឡើងវិញ។ បើតាម យុវសិស្សរូបនេះបានឱ្យដឹងថា គេខិតខំរៀនសូត្រតាំងតែពីថ្នាក់ទី៧មកម្ល៉េះ ហើយពេល ចូលដល់វិទ្យាល័យខ្លួនគេកាន់តែខំរៀនទ្វេដង។
ដោយការខិតខំនេះ ឧត្តមតែងតែទទួលបានចំណាត់ថ្នាក់លេខ១ស្ទើរតែរៀងរាល់ខែ តាំងពីថ្នាក់ទី១០ រហូតដល់ថ្នាក់ទី១២ ទោះបីត្រូវធ្វើដំណើរពីផ្ទះទៅសាលាលើចម្ងាយផ្លូវប្រហែល ១២គីឡូម៉ែត្រ លំបាកជារៀងរាល់ថ្ងៃក៏ដោយ។
យុវសិស្ស ខាវ ឧត្តម បានរៀបរាប់បន្ថែមទៀតថា ៖ «ចូលដល់ថ្នាក់ទី១២ ខ្ញុំបានខិតខំប្រឹងប្រែងរៀនជាងមុន គិតទាំងរៀនគួរ និងរៀនរដ្ឋ បូករួមទាំងការរៀនបន្ថែមខ្លួនឯងនៅផ្ទះ ក្នុង១ថ្ងៃខ្ញុំរៀនប្រហែល ១៣ ទៅ ១៥ ម៉ោង»។
ម្យ៉ាងទៀត ឧត្តម ក៏យកពេលទៅស្រាវជ្រាវមើលឯកសារផ្សេងៗពីអ៊ីនធឺណិត និងមានការបែងចែក ពេលវេលាច្បាស់លាស់ ក៏ដូចជាការស្វែងយល់ពីការចែករំលែកបទពិសោធន៍នៃសិស្សនិទ្ទេស A ឆ្នាំកន្លងទៅ។
ថ្វីដ្បិតតែគ្រួសារមានជីវភាពក្រីក្រក៏ពិតមែន ប៉ុន្តែយុវសិស្សរូបនេះបានប្រែក្លាយបញ្ហាទៅជាកម្លាំងចិត្តក្នុងការជំរុញឱ្យខ្លួនកាន់តែខិតខំប្រឹងប្រែងរៀនសូត្រ។
យុវសិស្ស ខាវ ឧត្តម បានប្រាប់ថា ៖ «កត្តារួមចំណែកដ៏ធំបំផុតក្នុងការសិក្សារបស់ខ្ញុំគឺគ្រួសារ ដោយសារតែម្ដាយមានវ័យចំណាស់ និងគ្រួសារមានជីវភាពក្រីក្រជាកត្តាដែលធ្វើឱ្យខ្ញុំខិតខំរៀនសូត្រដើម្បីទទួលបានការងារមួយដែលល្អប្រសើរសម្រាប់ជីវិត...កត្តាមួយទៀតគឺគោលដៅជីវិតនាពេលអនាគតជាកត្តាមួយដែលជំរុញឱ្យខ្ញុំរៀនអ្វីដែលត្រូវនឹងជំនាញរបស់ខ្ញុំ»។
លើសពីនេះទៅទៀត ឧត្តម មានបំណងរៀនជំនាញព័ត៌មានវិទ្យា (IT) ដែលយុវសិស្សរូបនេះអះអាង ថា ជាជំនាញដែលខ្លួនស្រឡាញ់តាំងពីក្មេង។ ឧត្តម មានបំណងចង់ចូលរៀនជំនាញនេះនៅសាកលវិទ្យាល័យភូមិន្ទភ្នំពេញ ប៉ុន្តែជាអកុសល ឧត្តម មិនបានទទួលអាហារូបករណ៍សម្រាប់រៀនជំនាញនេះនោះទេ។
ប៉ុន្តែ បើតាមការបញ្ជាក់បន្ថែមរបស់យុវសិស្សរូបនេះ គឺរូបគេនឹងទទួលបានការជួយទំនុកបម្រុងមួយផ្នែក ពីសំណាក់អ៊ំរបស់ខ្លួនសម្រាប់ការរៀនសូត្រនេះ។ ថ្វីបើមានការជួយទំនុកបម្រុងមួយផ្នែក តែឧត្តម ក៏ហាក់នៅមានការព្រួយបារម្ភខ្លាចថា មិនបានបញ្ចប់ការសិក្សាសព្វគ្រប់ដូចបំណង។
រីឯឧបសគ្គធំមួយទៀតដែលយុវសិស្សនេះកំពុងជួបក្រៅពីបញ្ហាជីវភាព គឺបញ្ហាសុខភាពដោយធ្លាប់បានប្រើកម្លាំងធ្ងន់ពេក ដែលបញ្ហាសុខភាព គឺឧត្តម តែងតែឈឺជាប្រចាំ ព្រោះគេធ្លាប់ឆ្លៀតទៅធ្វើការសំណង់ មួយរយៈពេលដែលជំងឺកូវីដផ្ទុះ កាលពីឆ្នាំ២០២០កន្លងទៅ។
សិស្សនិទ្ទេស A ខាវ ឧត្តម បានបញ្ជាក់ថា ៖ «ទាក់ទងនឹងការសិក្សាវិញ បើខ្ញុំមិនទទួលបានអាហារូបករណ៍ ឬជំនួយណាមួយគ្រប់គ្រាន់ទេ ខ្ញុំនឹងដាក់ពាក្យប្រឡងគ្រូមធ្យមសិក្សាបឋមភូមិ ហើយបើមិនជាប់ ខ្ញុំអាចនឹងរកការងារធ្វើបណ្ដោះអាសន្នសិន»៕
