ភ្នំពេញៈ ឆ្នាំសិក្សាថ្មីនេះ សិស្សានុសិស្សដែលទើបប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប បានស្វះស្វែងរកសាកលវិទ្យាល័យ ដើម្បីបន្តការសិក្សារៀនសូត្រកម្រិតបរិញ្ញាបត្រ។ សាកលវិទ្យាល័យផ្សេងៗក្នុងក្រុងភ្នំពេញ កំពុងមមាញឹកនឹងការទទួលពាក្យយ៉ាងច្រើនកុះករពីសំណាក់សិស្សានុសិស្ស។
ដោយឡែក ជំនាញគ្រប់គ្រងប្រព័ន្ធផ្សព្វផ្សាយនាឆ្នាំនេះ ក៏ចាប់ផ្ដើមឃើញមានការចាប់អារម្មណ៍ និងដាក់ពាក្យចូលរៀនច្រើនផងដែរ។ ជំនាញនេះមានក្នុងដេប៉ាតឺម៉ង់មួយរបស់សាកលវិទ្យាល័យភូមិន្ទភ្នំពេញ ដែលមានឈ្មោះថា ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍(DMC)។
ជំនាញគ្រប់គ្រងប្រព័ន្ធផ្សព្វផ្សាយនៅទីនេះ គឺក្ដោបរួមទាំងជំនាញសរសេរព័ត៌មាន ការផលិតកម្មវិធីទូរទស្សន៍ វិទ្យុ ជាពិធីករ/ពិធីការិនី បង្កើតមាតិកា ផលិតកុន និងជំនាញក្រាហ្វីកឌីហ្សាញជាដើម។ ខុសពីជំនាញផ្សេងៗ ជំនាញប្រព័ន្ធផ្សព្វផ្សាយនេះមិនសូវជាមានអ្នកស្គាល់ច្រើនប៉ុន្មានទេ ជាហេតុធ្វើឱ្យធនធានមនុស្សផ្នែកនេះនៅមានកង្វះខាត។
យុវសិស្សប៊ុន លាភ អាយុ១៦ឆ្នាំ រស់នៅទីក្រុងភ្នំពេញ ដែលបានទៅដាក់ពាក្យសម្រាប់ត្រៀមប្រឡងចូលរៀនជំនាញគ្រប់គ្រងប្រព័ន្ធផ្សព្វផ្សាយនៅថ្ងៃខាងមុខ បានរៀបរាប់ថា ខ្លួនចូលចិត្តជំនាញ ដែលមាននៅក្នុងដេប៉ាតឺម៉ង់ប្រព័ន្ធផ្សព្វផ្សាយ ប៉ុន្តែមិនដែលបានដឹងថា មានសាលារៀនជំនាញនេះនៅកម្ពុជា។
យុវសិស្សប៊ុន លាភ រៀបរាប់ថា៖«ខ្ញុំចូលចិត្តថតវីដេអូ កាត់វីដេអូ និងចង់ក្លាយជាអ្នកផលិតមាតិកាបង្ហោះតាមបណ្ដាញសង្គម ហើយខ្ញុំភ្ញាក់ផ្អើលមែនទែនដែលបានដឹងថា មានសាលាបង្រៀនជំនាញនេះ»។
ប៉ុន្តែដើម្បីបានជាប់រៀនជំនាញនេះ សិស្សានុសិស្ស ដែលបានដាក់ពាក្យ ត្រូវឆ្លងកាត់ដំណាក់កាលប្រឡងជម្រុះចំនួន២ដង គឺវិញ្ញាសាសំណេរ និងការសម្ភាសផ្ទាល់មាត់។ ដោយមិនបានត្រៀមទុកជាមុនច្រើន យុវសិស្សរូបនេះថា ខ្លួនមិនហ៊ានសង្ឃឹមខ្ពស់ ដែលនឹងអាចប្រឡងជាប់នោះទេ ដោយបានត្រឹមតែខិតខំប្រឹងប្រែងឱ្យអស់ពីសមត្ថភាព ដើម្បីអាចចូលរៀនជំនាញប្រព័ន្ធផ្សព្វផ្សាយបាន។
សិស្សម្នាក់ទៀត ដែលបានដាក់ពាក្យចូលសម្រាប់ប្រឡងចូលរៀនជំនាញខាងលើ គឺកញ្ញា ឃីម សុគន្ធី បានឱ្យដឹងថា ខ្លួនស្គាល់ដេប៉ាតឺម៉ង់នេះតាមរយៈគ្រូរបស់ខ្លួននៅឯខេត្តកំពង់ធំ។
យុវតីរូបនេះបានបង្ហាញពីបំណងរបស់ខ្លួនដោយមិនស្ទាក់ស្ទើរថា៖«ខ្ញុំមានក្ដីស្រមៃ ចង់ក្លាយជាអ្នកសារព័ត៌មាន ដែលនេះជាអ្វីដែលខ្ញុំស្រឡាញ់យូរមកហើយ»។
សម្រាប់កញ្ញា ឃីម សុគន្ធី ឱ្យដឹងថា ខ្លួនមានសង្ឃឹមខ្ពស់ទៅលើការប្រឡងចូល ដោយខ្លួនបានត្រៀមលក្ខណៈរួចរាល់សម្រាប់ដំណាក់កាលទាំង២។ ម្យ៉ាងទៀតយុវតីរូបនេះតែងតែតាមដាននូវរាល់ស្ថានការណ៍សង្គម និងបង្កើននូវចំណេះដឹងទូទៅរបស់ខ្លួនដើម្បីត្រៀមចូលរៀន។
កញ្ញាបញ្ជាក់ថា ការចូលរៀនជំនាញនេះ គឺជាក្ដីស្រមៃរបស់ខ្លួន ដោយមិនបានទទួលគំនាបពីនរណាម្នាក់ឡើយ ហើយខ្លួនមានការសប្បាយចិត្តក្នុងការដើរតាមក្ដីស្រមៃនេះ។
លោកអ៊ុង ប៊ុនអុី ដែលជាប្រធានដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ បានរៀបរាប់អំពីការចូលរៀនជំនាញនេះថា៖«ជាទូទៅសិស្សត្រូវមានចំណង់ចំណូលចិត្ដរបស់គាត់ចូលចិត្ដខាងហ្នឹង។ គ្រាន់តែកន្លងមកសិស្សគាត់អត់សូវស្គាល់ អត់សូវដឹងថា តើកន្លែងយើងមានរៀនជំនាញអ្វីខ្លះ...? ដូច្នេះបើសិនជាគាត់គិតថា គាត់ចូលចិត្ដខាងសរសេរ ខាងតែងនិពន្ធ ខាងថតរូប ផលិតវីដេអូ ខាងអីហ្នឹង ឬក៏ខាងទំនាក់ទំនងគាត់អាចរៀនជំនាញនេះបាន»។
លោកបន្តថា៖«បើនិយាយពីកត្ដាប្រឈមវិញ គឺដូចជាអត់មានទេ និស្សិតដែលចប់ពីយើងទៅ ទីផ្សារការងារមានច្រើន ប៉ុន្ដែធនធានយើងផលិតបានតិច។ដូច្នេះទីផ្សារត្រូវការអ្នកជំនាញផ្នែកប្រព័ន្ធផ្សព្វផ្សាយ និងសារគមនាគមន៍នេះច្រើនក្នុងពេលបច្ចុប្បន្ន ហើយបើយើងនិយាយទៅ វាគឺជាគុណសម្បត្ដិវិញទេ ព្រោះជំនាញមួយដែលគេមិនសូវស្គាល់ បែបនេះពេលសិស្សរៀនចប់ហើយតម្រូវការទីផ្សារធំ»។
កម្មវិធីសិក្សា មានដូចជា ឆ្នាំទី១ ផ្ដោតសំខាន់ទៅលើមូលដ្ធានគ្រឹះ ដូច្នេះសិស្សត្រូវរៀនមុខវិជ្ជាទូទៅច្រើនជាងឆ្នាំទី២។ រីឯឆ្នាំទី៣ ផ្ដោតសំខាន់ទៅលើប្រព័ន្ធផ្សព្វផ្សាយ សរសេរព័ត៌មានសម្រាប់វិទ្យុ ទូរទស្សន៍ ការផលិតកម្មវិធីវិទ្យុ ទូរទស្សន៍ ការផលិតវីដេអូឯកសារ និងមានទំនាក់ទំនងសាធារណៈ និងស្រាវជ្រាវ។ សម្រាប់ឆ្នាំចុងក្រោយ គឺផ្ដោតសំខាន់ទៅលើ ខាងគ្រប់គ្រងច្រើនជាង ដូចជា គ្រប់គ្រងបន្ទប់ព័ត៌មាន គ្រប់គ្រងគម្រោង និងប្រព័ន្ធផ្សព្វផ្សាយ និងមានគ្រប់គ្រងយុទ្ធនាការផ្សេងៗ(Campaign)ពាក់ព័ន្ធផ្នែកសារគមនាគមន៍។
គួរបញ្ជាក់ថា នៅកម្ពុជា មានសាកលវិទ្យាល័យចំនួន៣ ដែលមានជំនាញប្រព័ន្ធផ្សព្វផ្សាយ។ សាកលវិទ្យាល័យទាំងនោះ រួមមាន សាកលវិទ្យាល័យភូមិន្ទភ្នំពេញ សាកលវិទ្យាល័យបញ្ញាសាស្ត្រ និងសាកលវិទ្យាល័យកម្ពុជា៕