![](https://pppkhmer.sgp1.digitaloceanspaces.com/image/main/field/image/topic_19-_tbong_khmum_education_department_of_youth_and_sport_on_20-10-2022_by_fb.jpg)
មន្ទីរអប់រំ យុវជន និងកីឡាខេត្តត្បូងឃ្មុំ។ រូបថត FB
ត្បូងឃ្មុំៈ រដ្ឋបាលខេត្តត្បូងឃ្មុំកាលពីថ្ងៃទី ៤ ខែមករា បានច្រានចោលការចោទប្រកាន់រឿងអំពើពុករលួយដែលត្រូវបានចោទប្រកាន់ពីការកេងប្រវ័ញ្ចថវិការដ្ឋ និងប្រាក់ខែគ្រូបង្រៀននៅក្នុងក្របខ័ណ្ឌមន្ទីរអប់រំ យុវជន និងកីឡាខេត្តត្បូងឃ្មុំ។
យោងតាមសេចក្ដីបំភ្លឺរបស់រដ្ឋបាលខេត្តត្បូងឃ្មុំ នៅថ្ងៃទី៤ ខែមករា ឆ្នាំ២០២៣ បានឱ្យដឹងថាមានការបង្ហោះព័ត៌មានតាមបណ្ដាញសង្គមដោយបានចោទប្រកាន់ប្រធានមន្ទីរអប់រំខេត្តត្បូងឃ្មុំ ឈ្មោះ អ៊ិន ពៅសម្បត្តិ បានកេងប្រវ័ញ្ចថវិកាពាក់ព័ន្ធនឹងគ្រូបង្រៀន និងសាច់ញាតិនិយមប្រមាណ៧៤ ៩៣៣ដុល្លារសហរដ្ឋអាមេរិក(ជាង២៩៩,៧៣លានរៀល)។
រដ្ឋបាលខេត្តត្បូងឃ្មុំ បានបង្កើតក្រុមការងារថ្នាក់ខេត្ដដើម្បីពិនិត្យ សិក្សា ស្រាវជ្រាវ អង្កេត និងដោះស្រាយ ដោយបានចុះទៅមន្ទីរអប់រំ យុវជន និងកីឡាខេត្ដត្បូងឃ្មុំ ពិនិត្យយ៉ាងយកចិត្ដទុកដាក់ និងហ្មត់ចត់បំផុត ដោយផ្អែកលើករណីបណ្ដឹងពាក់ព័ន្ធនឹងការចោទប្រកាន់ការកេងប្រវ័ញ្ច និងសាច់ញាតិនិយម។ ការស្រាវជ្រាវនេះធ្វើឡើងតាមរយៈការសាកសួរមន្ដ្រី លោកគ្រូ អ្នកគ្រូ និងអ្នកពាក់ព័ន្ធដោយរក្សាការសម្ងាត់ និងស្រាវជ្រាវប្រមូលឯកសារធាតុចូលនៃអង្គហេតុនីមួយៗ និងបានដាក់ឆ្លងកិច្ចប្រជុំគណៈអភិបាលខេត្ដ ដើម្បីពិនិត្យ ពិភាក្សាករណីចោទប្រកាន់នេះដោយឈរលើគោលការណ៍ច្បាប់ និងប្រកបដោយអព្យាក្រឹតភាព។
យោងតាមសេចក្ដីបំភ្លឺរបស់រដ្ឋបាលខេត្តត្បូងឃ្មុំ បានបញ្ជាក់ថា៖ «ជាលទ្ធផល នៅក្នុងកិច្ចប្រជុំគណៈអភិបាលខេត្ដមិនត្រឹមតែរកមិនឃើញនូវកំហុសឆ្គងដូចការចោទប្រកាន់ប៉ុណ្ណោះទេ ប៉ុន្ដែបានរកឃើញអំពីលក្ខណសម្បត្ដិល្អប្រសើរក្នុងការដឹកនាំ គ្រប់គ្រងរបស់លោកប្រធានមន្ទីរទៅវិញ»។
ទោះយ៉ាងណាក៏ដោយ លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ថ្លែងថា រឿងអំពើពុករលួយគ្មានអ្វីចម្លែកនោះទេនៅក្នុងសង្គមបច្ចុប្បន្នកើតមានតាំងពីថ្នក់ក្រោមដល់ថ្នាក់លើ។
លោកស្រី អ៊ុក ឆាយ៉ាវី ថ្លែងថា៖ «ក្នុងនាមខ្ញុំជាប្រធានសមាគមគ្រូបង្រៀនឯករាជ្យ ខ្ញុំគ្រាន់តែផ្ដាំទៅដល់លោកគ្រូ អ្នកគ្រូអ្វីដែលយើងធ្វើ អ្វីដែលយើងតវ៉ា គឺគេមិនឲ្យតម្លៃយើងទេ ទោះបីជាគេឃើញហើយថាមានអំពើពុករលួយ ប៉ុន្តែគេថានូវតែអត់មានអំពើពុករលួយ»។
លោក ឡេង សេងហាន មន្ត្រីឃ្លាំមើលការរំលោភសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុក (ADHOC) ប្រចាំខេត្តត្បូងឃ្មុំ បានថ្លែងថា នៅក្នុងលិខិតឆ្លើយបំភ្លឺ វាបានបង្ហាញតែមួយជ្រុង ដោយមិនបានបង្ហាញឲ្យឃើញនូវភាពសុក្រឹត យុត្តិធម៌ ប៉ុន្តែក៏ត្រូវតែរង់ចាំមើលពីក្រសួងផងដែរ ពីព្រោះកន្លងមកករណីនេះ ក្រសួងអប់រំ ក៏បានបង្កើតគណៈកម្មការ១ ដើម្បីស្រាវជ្រាវដែរ។
លោកថ្លែងថា៖ «ប្រសិនបើម្ចាស់ដើមបណ្ដឹងមិនអាចទទួលយកការឆ្លើយបំភ្លឺនេះបានទេ ដូច្នេះមានន័យថាសេចក្ដីបំភ្លឺរបស់រដ្ឋបាលត្បូងឃ្មុំ មានភាពមិនគ្រប់ជ្រុងជ្រោយឡើយ»។
អ្នកនាំពាក្យក្រសួងអប់រំយុវជន និងកីឡា លោក រស់ សុវាចា នៅថ្ងៃទី៤ ខែមករានេះ មិនអាចទាក់ទងសុំការអធិប្បាយបាននោះទេ។
សូមបញ្ជាក់ថា កន្លងមកលោក អ៊ិន ពៅសម្បត្តិ ត្រូវបានលោកគ្រូ អ្នកគ្រូ រួមនឹងមន្ដ្រីនៅមន្ទីរអប់រំ ប្ដឹងទៅអភិបាលខេត្ដនិងក្រសួងអប់រំផងដែរ ហើយបានទាមទារឲ្យចាត់វិធានការបញ្ចប់មុខតំណែងថ្នាក់ដឹកនាំរូបនេះដោយក្រោមហេតុផលបានប្រព្រឹត្ដអំពើពុករលួយធ្ងន់ធ្ងរជាច្រើនករណី ដោយកិបកេងប្រាក់រដ្ឋ កាត់ប្រាក់ខែគ្រូ គិតតែផលប្រយោជន៍ផ្ទាល់ខ្លួនជាដើម៕