លោករដ្ឋមន្ត្រីកសិកម្ម ឌិត ទីណា ថ្លែងនៅក្នុងសន្និសីទសារព័ត៌មានស្ដីពី «ទស្សនទានក្នុងវិស័យកសិកម្មនៅកម្ពុជា» កាលពីម្សិលមិញ។ ហុង មិនា
ភ្នំពេញៈ វិស័យកសិកម្ម ត្រូវបានចាត់ទុកថា ជាវិស័យចម្បងមួយក្នុងចំណោមវិស័យចម្បងៗ ជាច្រើនទៀត ដែលអាចជួយស្តារសេដ្ឋកិច្ចកម្ពុជា ស្របពេលដែលក្រសួងនេះ បានបង្ហាញពីប្រព័ន្ធផលិតកម្មថ្មី ដោយផ្តោតលើការជំរុញខ្សែចង្វាក់ផលិតកម្មផលិតផលកសិកម្មគន្លឹះ ដើម្បីពង្រីកការនាំចេញទៅកាន់ទីផ្សារអន្តរជាតិឱ្យកាន់តែខ្លាំង។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងនៅក្នុងសន្និសីទសារព័ត៌មានស្តីពី «ទស្សនទានក្នុងវិស័យកសិកម្មកម្ពុជា» នាព្រឹកថ្ងៃទី ៥ មករា ថា គោលដៅអភិវឌ្ឍន៍វិស័យកសិកម្ម គឺត្រូវបង្កើនការនាំចេញកសិផលប្រកបដោយគុណភាព និងសុវត្ថិភាព តាមរយៈការលើកកម្ពស់ផលិតភាពផលិតកម្ម បង្កើនតម្លៃបន្ថែម និងពង្រីកការប្រកួតប្រជែងទីផ្សារ។
កាលពីមុនការកំណត់លើការពង្រឹងសន្តិសុខស្បៀងកម្ពុជានៅតែជាបច្ចុប្បន្នភាព ប៉ុន្តែលោក ឌិត ទីណាថា លើសពីនេះបច្ចុប្បន្នក្រសួងក៏បានបែងចែកចេញជា ២ គឺខ្សែចង្វាក់ទីផ្សារក្នុងស្រុក និងទី២ ខ្សែចង្វាក់ទីផ្សារនាំចេញទៅក្រៅប្រទេស។ ក្នុងន័យនេះ លោកបញ្ជាក់ថា សម្រាប់ខ្សែចង្វាក់ទីផ្សារក្នុងស្រុក ក្រសួងនឹងផ្តោតលើទស្សនទានថ្មី លើការរក្សាស្ថិរភាពតម្លៃ មិនឱ្យកើនឡើង និងមិនឱ្យធ្លាក់ចុះ ដើម្បីកុំឱ្យប៉ះពាល់ដល់សន្តិសុខស្បៀង ទាំងអ្នកទទួលទាន អ្នកផលិត និងអ្នកចែកចាយ។
ដោយឡែកសម្រាប់ខ្សែចង្វាក់ទី២ គឺខ្សែចង្វាក់ទីផ្សារនាំចេញទៅក្រៅប្រទេសវិញ យុទ្ធសាស្ត្ររបស់ក្រសួងគឺជំរុញការនាំចេញផលិតផលដែលមានគុណភាពខ្ពស់និងលក់បានតម្លៃខ្ពស់ដែលហៅថា ផលិតផលគន្លឹះឬផលិតផលប្រណីត។
ដោយផ្អែកលើទស្សនទាននេះ លោករដ្ឋមន្ត្រីបានបញ្ជាក់ទៀតថា៖ «ក្រសួងនឹងផ្តោតលើផលិតកម្មមួយដែលជាផលិតផលគន្លឹះដោយក្រសួងនឹងយកបទពិសោធន៍ជោគជ័យនៃផលិតផលម្រេចកំពត យកមកពិនិត្យ វាយតម្លៃ និងរៀបចំទៅនឹងស្ថានភាពនៃផលិតផលផ្សេងៗទៀត ដូចជា កៅស៊ូ អង្ករ ស្វាយចន្ទី»។
លោក ឌិត ទីណា បានបន្ថែមថា៖ «ហេតុនេះយើងមិនចាំបាច់ផលិតដោយយកចំនួនបរិមាណច្រើន ដើម្បីយកទៅប្រកួតប្រជែងជាមួយគេនោះទេ យើងស្រមៃឃើញថា យើងត្រូវផលិតក្នុងបរិមាណល្មម តែមានគុណភាព និងលក់ឱ្យបានថ្លៃជាងគេយកផលចំណេញជាគោល។ អ៊ីចឹងទីផ្សារក្នុងស្រុកយើងរក្សាថ្លៃ និងទីផ្សារស្រុកគេយើងលើកតម្លៃ»។
ដើម្បីសម្រេចបាននូវគោលដៅនេះ ក្រសួងកសិកម្ម នឹងធ្វើការជិតស្និទ្ធជាមួយនឹងក្រសួងពាណិជ្ជកម្ម ដើម្បីជំរុញលទ្ធភាពផ្សព្វផ្សាយផលិតផលគន្លឹះ ដើម្បីបើកច្រកទីផ្សារនាំចេញទៅកាន់ទីផ្សារនានា ពិសេសទីផ្សារសេរីផងដែរ។
យ៉ាងណាមិញ លោក ឌិត ទីណា ទាមទារឱ្យមានការចូលរួម និងប្រមូលផ្តុំគ្នាពីស្ថាប័នពាក់ព័ន្ធជារចនាសម្ព័ន្ធមួយ តាំងពីអ្នកផ្គត់ផ្គង់វត្ថុធាតុដើម អ្នកផលិតអ្នកចែកចាយ អ្នកកែច្នៃ និងរហូតអ្នកប្រើប្រាស់ថែមទៀត។
បើតាមក្រសួងកសិកម្ម ក្នុងរយៈពេល ១០ ខែ ពោលគឺចាប់ពីខែមករា ដល់ខែតុលា ឆ្នាំ ២០២២ កម្ពុជាទទួលបានចំណូលពីការនាំចេញកសិផលទៅកាន់ទីផ្សារអន្តរជាតិបានជាង ៣ ពាន់លានដុល្លារ (៣ ០៦៩ ៩៧២ ៣៤៩ ដុល្លារអាមេរិក)។
ក្នុងនោះរួមមានចំណិតដំឡូងមីក្រៀម មានចំនួន ១ ៦៧០ ០៩០ តោន, ម្សៅដំឡូងមី មានចំនួន ៥២ ០៩៣ តោន, កាកសំណល់ដំឡូងមីមានចំនួន ៩ ១៧៩ តោន, គ្រាប់ស្វាយចន្ទីឆៅ មានចំនួន ៤៦៩ ៥១៥ តោន, គ្រាប់ស្វាយចន្ទីកែច្នៃ មានចំនួន ៥៩៩ តោន, គ្រាប់ពោត មានចំនួន ១៥៤ ៩៤៨ តោន, គ្រាប់សណ្ដែកបាយ មានចំនួន ៣៥ ០២៥ តោន ,គ្រាប់សណ្តែកសៀង មានចំនួន ១១៥ ៩៣៥ តោន, ផ្លែចេកស្រស់ មានចំនួន ៣២៥ ៨៥៩ តោន, ផ្លែស្វាយស្រស់ មានចំនួន ១៣៨ ៣៧៧ តោន, ដំណាប់ស្វាយ មានចំនួន ១៥ ៨១៦ តោន, ដូងប្រេង មានចំនួន ៥៤ ៨៧៨ តោន, ម្រេច មានចំនួន ៧ ៧០៤ តោន, ថ្នាំជក់ មានជាង ៥ ៦៩៧ តោន និងបន្លែចម្រុះ មានជាង ៨០ តោន។
លោក ឌិត ទីណា ក្នុងសន្និសីទកាសែតនៅទីស្ដីការគណៈរដ្ឋមន្ត្រី កាលពីថ្ងៃទី ៥ ខែមករា។ រូបថត ហុង មិនា
កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានលើកឡើងពីក្តីរំពឹងថា នៅក្នុងឆ្នាំ ២០២៣ នេះ ផលិតផលក្នុងស្រុកសរុប ឬ GDP សម្រាប់មនុស្សម្នាក់ នឹងឡើងដល់ ជិត ២ ពាន់ដុល្លារ ខណៈកំណើនសេដ្ឋកិច្ចកម្ពុជាត្រូវបានរំពឹងថា នឹងកើនដល់ ៦,៦ ភាគរយ ផងដែរ។
បន្ថែមពីនេះ លោករដ្ឋមន្ត្រីក្រសួងកសិកម្មក៏បានលើកឡើងផងដែរថា នឹងលុបបំបាត់ឈ្មួញកណ្តាលដែលមិនបានការចេញ ព្រោះនេះជាចំណុចសំខាន់ក្នុងការកាត់បន្ថយការចំណាយ និងរៀបចំប្រព័ន្ធខ្សែចង្វាក់ផលិតកម្មឱ្យមានប្រសិទ្ធភាព។
លោកថា ឈ្មួញកណ្តាល គឺសំដៅដល់អ្នកទិញដូរ ប៉ុន្តែចុងក្រោយការប្រើប្រាស់ពាក្យឈ្មួញកណ្តាលនេះ ធ្វើឱ្យមានការទម្លាក់តម្លៃនៃមនុស្ស និងការងារដែលគាត់ធ្វើ ហេតុនេះក្នុងការពិនិត្យរៀបចំទស្សនទានថ្មី មិនហៅថា ឈ្មួញកណ្តាលទេ តែពួកគាត់សុទ្ធតែជាតួអង្គផ្សេងៗ ដែលនៅក្នុងខ្សែចង្វាក់ផលិតកម្មជួយឱ្យខ្សែចង្វាក់នេះដំណើរការទៅបានល្អមិនស្ទះ។
លោកលើកឡើងថា ជំនួសការហៅថា ឈ្មួញកណ្តាលយើងអាចថា អ្នកជំនួញ ឬក៏អ្នកដឹកជញ្ជូន ដែលជាផ្នែកមួយសំខាន់ណាស់សម្រាប់កសិករដើម្បីបញ្ចេញផលិតផលចេញទៅ ប៉ុន្តែអ្វីដែលហៅថា កាត់បន្ថយ ឬកាត់ចេញនូវរបស់ដែលអត់ប្រយោជន៍នេះ គឺពាក់ព័ន្ធទៅនឹងបញ្ហា ២ គឺ ទី១ បញ្ហាព័ត៌មានមួយចំនួន និងទី២ គឺពាក់ព័ន្ធនឹង បញ្ហានៃអាជ្ញាប័ណ្ណ ដែលគ្មានសកម្មភាព។
លោកថ្លែងថា៖ «ទាំង ២ ហ្នឹងវាមានអ្នកខ្លះគាត់រកស៊ីក្រដាស អាហ្នឹងទៅថ្ងៃមុខលែងមានហើយ បើគាត់មានក្រដាសជាលិខិតអនុញ្ញាតជាអាជ្ញាប័ណ្ណជាអីណាមួយគឺពីក្រោយគាត់ត្រូវធ្វើការងារជាក់ស្តែងក្នុងខ្សែចង្វាក់ផលិតកម្មពិតប្រាកដ»។
លោកបានគូសបញ្ជាក់ថា ការទទួលបានអាជ្ញាប័ណ្ណហើយទៅជួលបន្ត ឬធ្វើអ្វីផ្សេង នោះមានន័យថា អាជ្ញាបណ្ណនោះបង្កើតនូវបន្ទុកបន្ថែមក្នុងការចំណាយ ដែលប្រភេទនេះ ក្រសួងកសិកម្ម មិនឱ្យកើតមានក្នុងខ្សែចង្វាក់ផលិតកម្មបន្តទៀតនោះទេ។
ក្រសួងកសិកម្មគ្រោងរៀបចំប្រព័ន្ធព័ត៌មានវិទ្យាមួយ ដែលអាចភ្ជាប់អ្នកផលិត និងអ្នកទិញជាមួយគ្នា ហើយអាចបង្កើតជា App មួយដោយសហការជាមួយក្រសួងសេដ្ឋកិច្ចនិងហិរញ្ញវត្ថុ។ App ថ្មីនេះ នឹងប្រមូលបាននូវព័ត៌មានមួយចំនួនធំសម្រាប់បណ្តាញទាំងមូល។
មានន័យថា នៅមុនពេលប្រជាពលរដ្ឋរៀបចំដាំដុះដំណាំកសិកម្មណាមួយនោះ គាត់អាចធ្វើការផ្សាយជាមុន ហើយនៅពេលដំណាំលូតលាស់ជាបន្តបន្ទាប់ប្រជាកសិករក៏អាចថតបង្ហាញពីទីតាំង ប្រាប់ពីចំនួនទិន្នផល ដែលប៉ាន់ប្រមាណទុក និងពេលវេលាប្រមូលផល នោះអ្នកទិញផលិតផលកសិកម្ម នឹងទៅសួរនាំជាមុនមិនខាន។
លោក ហ៊ុន សែន បានបង្ហាញការរំពឹងថា វិស័យសំខាន់ៗចំនួន ៣ រួមមាន វិស័យឧស្សាហកម្ម,វិស័យសេវាកម្ម និងវិស័យកសិកម្ម នឹងជួយគាំទ្រ ហើយរុញច្រានដល់កំណើនសេដ្ឋកិច្ចកម្ពុជា ឆ្នាំ ២០២៣។ រដ្ឋាភិបាលក៏បានរំពឹងដែរថា វិស័យកសិកម្មកម្ពុជា នឹងនៅបន្តនិន្នាការកើនឡើង ក្នុងអត្រា ១,១ ភាគរយ ក្នុងឆ្នាំ ២០២៣ ធៀបនឹង ០,៧ ភាគរយ ក្នុងឆ្នាំ ២០២២ ដោយសារការរំពឹងទុកលើការបន្តរក្សាកំណើនល្អប្រសើរនៃអនុវិស័យដំណាំ និងចិញ្ចឹមសត្វ ស្របពេលដែលអនុវិស័យនេសាទត្រូវបានរំពឹងថា នឹងងើបឡើងវិញ។
ជុំវិញការជំរុញផលិតកម្មលើផលិតផលគន្លឹះ ដើម្បីពង្រីកទីផ្សារនាំចេញផលិតផលកសិកម្ម និងជំរុញ កំណើនសេដ្ឋកិច្ចកម្ពុជា ត្រូវបានអ្នកជំនាញសេដ្ឋកិច្ចមួយចំនួនបានជំរុញឱ្យរាជរដ្ឋាភិបាល ពិសេសក្រសួងកសិកម្ម ត្រូវតែផ្តោតលើការបណ្តុះបណ្តាលពីបច្ចេកទេសដាំដុះតាមបែបទំនើបថ្មីដល់ប្រជាពលរដ្ឋ និងពង្រឹងគុណភាពលើផ្នែកសេវាកម្មបន្ថែមទៀត ព្រោះទំហំនៃការផលិតលើផលិតកសិកម្ម ឬសិប្បកម្មរបស់កម្ពុជានៅមានទំហំតូចនៅឡើយ៕
វីដេអូ៖
