ក្រុមអភិរក្សកំពុងពិនិត្យកូនខ្ទីងដែលរងរបួសហើយក្រោយមកបានងាប់។ រូបថត Wildlife Alliance
តាកែវៈសត្វទន្សោងឈ្មោលមួយក្បាល ដែលធ្លាប់រងរបួសដាច់ជើងឆ្វេងផ្នែកខាងមុខ ដោយសារជាប់អន្ទាក់ជនល្មើសកាលពីឆ្នាំមុន នៅពេលនេះ ត្រូវបានចាប់ចេញពីព្រៃសហគមន៍យកមកធ្វើការព្យាបាលជាថ្មីទៀត ដោយក្រុមគ្រូពេទ្យជំនាញនៃឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ បន្ទាប់ពីវាបានបង្ហាញខ្លួនជាថ្មី កាលពីថ្ងៃទី ១០ ខែមករា ឆ្នាំ ២០២៣ ជាមួយនឹងមុខរបួសហូរឈាម និងជំងឺដុំពកដ៏ធំមួយនៅក្រោមពោះរបស់វា។
លោក ទ្រី ស៊ីថេង ប្រធានបុគ្គលិក ថែរក្សា និងសង្គ្រោះសត្វព្រៃភ្នំតាម៉ៅ បានប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែមករា ឆ្នាំ ២០២៣ ថា សត្វទន្សោងឈ្មោលដ៏គួរឱ្យអាណិតនោះ ត្រូវបានក្រុមការងាររបស់លោក បញ្ជូនមកដល់ មជ្ឈមណ្ឌលថែរក្សា និងសង្គ្រោះសត្វព្រៃភ្នំតាម៉ៅ កាលពីវេលាម៉ោង ៧:៣០ នាទីល្ងាចថ្ងៃទី ១០ ខែមករា ឆ្នាំ ២០២៣ បន្ទាប់ពីសមត្ថកិច្ចរដ្ឋបាលព្រៃឈើថ្ពង និងប្រជាសហគមន៍ ៨ មុំ បានប្រទះឃើញវាក្នុងអាការៈហូរឈាមតាមស្នាមរបួសចាស់នាព្រឹកនោះ ហើយសុំឱ្យកម្លាំងជំនួយពីក្រុមមន្ត្រីជំនាញរបស់លោក ជួយអន្តរាគមន៍ចុះចាប់វាយកមកព្យាបាល។
លោកបានបញ្ជាក់ថា៖ «ក្រុមការងារយើងបានចំណាយពេលជាច្រើនម៉ោង ដើម្បីកៀងចាប់វាជាមួយនឹងការប្រើថ្នាំសណ្ដំបាញ់ទៅលើវា»។
ក្រោមអាកាសធាតុអាប់អ៊ួរ មានភ្លៀងធ្លាក់ពេញ១ថ្ងៃ ការដឹកជញ្ជូនសត្វទន្សោងពិការនោះចេញពីក្នុងព្រៃសហគមន៍មកកាន់មជ្ឈមណ្ឌលថែរក្សា និងសង្គ្រោះសត្វព្រៃភ្នំតាម៉ៅ ក៏ត្រូវចំណាយពេលយូរផងដែរ។
លោក ស៊ីថេង បានបន្តថា៖«នៅពេលនេះ វាកំពុងត្រូវបានក្រុមគ្រូពេទ្យជំនាញរបស់យើង ធ្វើការព្យាបាលរបួសជើង និងបូមឈាមពិនិត្យមើលដុំពកដ៏ធំក្រោមពោះរបស់វា»។
បើតាមលោក ស៊ីថែង វានឹងត្រូវជាសះស្បើយក្នុងពេលឆាប់ៗនេះ ប្រសិនបើស្នាមរបួសចាស់របស់វាមិនមានមេរោគអ្វីជ្រាបចូលធ្ងន់ធ្ងរ ហើយដុំពកនៅក្រោមពោះរបស់វា ជាដុំពកធម្មតា។ វាក៏ត្រូវបានគេរំពឹងថា នឹងក្លាយជាបាមួយដ៏ល្អផងដែរ ព្រោះវ័យរបស់វានៅក្មេងនិងអាចបន្តពូជបាន។
ជាមួយគ្នានេះ លោកក៏បានសម្ដែងការសោកស្ដាយចំពោះកូនសត្វខ្ទីងមួយក្បាល ដែលទើបត្រូវបានជួយសង្គ្រោះពីអន្ទាក់របស់ជនល្មើសក្នុងភូមិសាស្ត្រស្រុកភ្នំឱរ៉ាល់ ខេត្តកំពង់ស្ពឺ កាលពីថ្ងៃទី ៧ ខែមករា ឆ្នាំ ២០២៣ នោះ បានងាប់បាត់ទៅហើយ កាលពីថ្ងៃទី៨ ខែមករា ឆ្នាំ ២០២៣។
ក្រុមអភិរក្សកំពុងសែងកូនទន្សោងដែលរងរបួសនៅក្នុងព្រៃ។ រូបថត Wildlife Alliance
ប្រជាពលរដ្ឋក្នុងសហគមន៍ ៨ មុំ លោក លីវ សារ៉ុម បានប្រាប់ ភ្នំពេញ ប៉ុស្តិ៍ថា កាលពីឆ្នាំមុន ខណៈកំពុងចុះល្បាតការពារព្រៃឈើនិងសត្វព្រៃក្នុងភូមិសាស្ត្រព្រៃសហគមន៍ ៨ មុំ លោកនិងប្រជាសហគមន៍ រួមទាំងមន្ត្រីជំនាញនៃសង្កាត់រដ្ឋបាលព្រៃឈើថ្ពង បានប្រទះឃើញសត្វទន្សោងដ៏គួរឱ្យអាណិតនោះ ដើរស៊ីស្មៅនៅភាគខាងជើងនៃព្រំប្រទល់រវាងព្រៃសហគមន៍ ៨ មុំ និងចម្ការអំពៅរបស់ក្រុមហ៊ុនឯកជនមួយដោយជើងឆ្វេងខាងមុខរបស់វា មានជាប់ខ្សែអន្ទាក់ និងមានស្នាមរបួសមួយកន្លែងទៀត នៅផ្នែកខាងក្រោមពោះរបស់វា ។
លោកថ្លែងថា៖ «បន្ទាប់មកអ្នកភូមិបានប្រទះឃើញវាជាថ្មីម្ដងទៀត នៅចម្ងាយប្រមាណជាង ៣០០ ម៉ែត្រពីភូមិឋានរបស់ប្រជាសហគមន៍ព្រៃឈើ ៨ មុំ និងក្នុងស្ថានភាពពិការជើងមុខខាងឆ្វេងត្រឹមស្មងជើងហើយស្នាមរបួសក្រោមពោះរបស់វា បានលេចចេញជាដុំពកដ៏ធំមួយ»។
នៅពេលនោះ ប្រជាសហគមន៍និងសមត្ថកិច្ចជំនាញសង្កាត់រដ្ឋបាលព្រៃឈើថ្ពង បានរាយការប្រាប់ទៅមន្ត្រីជំនាញនៅភ្នំតាម៉ៅ រួមទាំងអង្គការការពារសត្វព្រៃ Wildlife Alliance ឱ្យចុះចាប់វាយកទៅព្យាបាលដែរ ប៉ុន្តែវាបានគេចខ្លួនចូលទៅក្នុងព្រៃវិញ នៅពេលក្រុមមន្ត្រីនាញ ពីភ្នំតាម៉ៅមកដល់។ ចាប់ពីពេលនោះមក វាមិនបានបង្ហាញខ្លួននៅក្នុងព្រៃក្បែរភូមិទៀតទេ។
លោកបានបញ្ជាក់ថា៖«កាលពីថ្ងៃទី ៨ ខែមករា ឆ្នាំ ២០២៣ វាបានបង្ហាញខ្លួនជាថ្មីម្ដងទៀតនៅក្បែរភូមិរបស់សហគមន៍ខ្ញុំ។ ពួកយើងបានរាយការណ៍ទៅមន្ត្រីជំនាញនិងអង្គការពាក់ព័ន្ធជាដៃគូឱ្យមកចាប់វាម្ដងទៀត ព្រោះឃើញវាហូរឈាមតាមស្នាមរបួសជើងដែលពិការនោះ ហើយខាងមន្ត្រីជំនាញពីភ្នំតាម៉ៅបានមកចាប់វាយកទៅព្យាបាលបានសម្រេច»។
ជាមួយគ្នានេះ លោកបានអំពាវនាវ សូមឱ្យបុគ្គលគ្រប់រូប បញ្ឈប់ការបរបាញ់ ដាក់អន្ទាក់សត្វព្រៃ និងឈប់បរិភោគសាច់សត្វព្រៃ ហើយរួមគ្នាការពារ និងអភិរក្សសត្វព្រៃ ជាពិសេសប្រភេទសត្វកម្រនិងជិតផុតពូជ នៅកម្ពុជាឱ្យគង់វង្សនិងសំបូរឡើងវិញ៕
