លោកស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។ រូបថត DPM
ភ្នំពេញៈ នៅក្នុងជំនួបពិភាក្សាការងារជាមួយគណៈប្រតិភូ ក្រុមប្រទេសអាស៊ីប៉ាស៊ីហ្វិក អំពីកិច្ចសហប្រតិបត្តិការអន្តរជាតិ (ICRG-JG) កាលថ្ងៃទី ១១ ខែមករា ឆ្នាំ ២០២៣ ថ្នាក់ដឹកនាំរាជរដ្ឋាភិបាលកម្ពុជា បានបង្ហាញការប្តេជ្ញាចិត្ត ចំពោះការប្រយុទ្ធប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ។
ក្នុងជំនួបជាមួយ លោកស្រី ម៉ាលីន វ៉ាន មន្ត្រីជាន់ខ្ពស់ផ្នែកវិភាគគោលនយោបាយ នៃលេខាធិការក្រុមការងារហិរញ្ញវត្ថុ (FATF) ដែលដឹកនាំគណៈប្រតិភូក្រុមប្រទេសអាស៊ីប៉ាស៊ីហ្វិក អំពីកិច្ចសហប្រតិបត្តិការអន្តរជាតិ (ICRG-JG) លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានបង្ហាញនូវការប្ដេជ្ញាចិត្ត និងឆន្ទៈដ៏មោះមុតរបស់កម្ពុជាក្នុងការប្រយុទ្ធប្រឆាំងនឹងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានប្រឆាំងនឹងការរីកសាយភាយអាវុធមហាប្រល័យ។
លោក ស ខេង បានបន្តថា ចាប់តាំងពីឆ្នាំ ២០១៩ រហូតមកដល់ពេលនេះ កម្ពុជាបានសម្រេចបាននូវសមិទ្ធផលសំខាន់ៗមួយចំនួន ទាំងនៅក្នុងក្របខ័ណ្ឌនៃការកសាងច្បាប់ និងលិខិតបទដ្ឋានគតិយុត្តបម្រើការងារទាំងនេះ និងការអនុវត្តកិច្ចការមួយចំនួនដែលតម្រូវដោយខាងស្ថាប័នហិរញ្ញវត្ថុអន្តរជាតិ។
បើតាមលោក ស ខេង ទន្ទឹមនឹងការកសាងលិខិតបទដ្ឋានគតិយុត្តបម្រើឱ្យកិច្ចការប្រឆាំងការសម្អាតប្រាក់នោះ កម្ពុជាក៏បានពិនិត្យ និងកែសម្រួល ព្រមទាំងពង្រឹងយន្តការការងារទាំងនេះយ៉ាងសកម្មផងដែរ ទាំងយន្ដការនៅកម្រិតថ្នាក់ជាតិ កម្រិតនយោបាយ និងទាំងយន្តការកម្រិតបច្ចេកទេស ក្នុងនោះបានរៀបចំជាអនុគណៈកម្មការដែលមានសមត្ថកិច្ចទៅលើកិច្ចការពាក់ព័ន្ធទៅតាមវិស័យនៃការទទួលខុសត្រូវរៀងៗខ្លួនក្នុងដែនសមត្ថកិច្ចដែលពាក់ព័ន្ធទៅលើការងារប្រឆាំងការសម្អាតប្រាក់ ហិរញ្ញប្បទាននៃភេរវកម្ម និងហិរញ្ញវត្ថុទានដល់ការរីកសាយភាយអាវុធមហាប្រល័យ។
លោក ស ខេង បញ្ជាក់ថា៖ «កម្ពុជាក៏កំពុងតែខិតខំធ្វើយ៉ាងណា ដើម្បីពង្រឹងនូវយន្តការទាំងនេះព្រមទាំងពង្រីកវិសាលភាពនៃយន្តការទាំងនេះ ដើម្បីធ្វើយ៉ាងណា ធានាដល់ប្រសិទ្ធភាពការងារ ក៏ដូចជានិរន្តរភាពការងារនេះ»។
រហូតមកដល់ពេលនេះ កម្ពុជាក៏បានចាត់តាំងការផ្សព្វផ្សាយបណ្ដុះបណ្ដាលអំពីការងារពាក់ព័ន្ធទៅនឹងការប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យនេះ ជាបន្តបន្ទាប់សំដៅធ្វើយ៉ាងណាឱ្យផ្សព្វផ្សាយឱ្យមានការយល់ដឹងជ្រួតជ្រាបកាន់តែទូលំទូលាយក៏ដូចជាផ្តល់ការបណ្តុះបណ្តាលដល់ភាគីពាក់ព័ន្ធ ដើម្បីកៀរគរការគាំទ្រ និងការចូលរួមសំដៅធ្វើយ៉ាងណាចូលរួមអនុវត្តតាមច្បាប់ក៏ដូចជាលិខិតបទដ្ឋានគតិយុត្ត ដែលនៅជាធរមានរបស់កម្ពុជា។
ក្នុងជំនួបនោះ លោកស្រី ម៉ាលីន វ៉ាន ក៏បានថ្លែងអំណរគុណចំពោះថ្នាក់ដឹកនាំកម្ពុជា និងក្រុមការងាររបស់គណៈកម្មការសម្របសម្រួលថ្នាក់ជាតិរបស់កម្ពុជា ចំពោះការស្វាគមន៍ និងបដិសណ្ឋារកិច្ចយ៉ាងកក់ក្តៅរាក់ទាក់ ដល់គណៈប្រតិភូដែលអញ្ជើញមកបំពេញទស្សនកិច្ចនៅកម្ពុជា។
ជាមួយគ្នានេះ លោកស្រីក៏បានកោតសរសើរ និងវាយតម្លៃខ្ពស់ចំពោះភាពបើកទូលាយ និងកិច្ចសហប្រតិបត្តិការ ការចូលរួមយ៉ាងល្អប្រសើររបស់កម្ពុជា នៅក្នុងដំណើរការបំពេញការងាររបស់ក្រុមការងារលោកស្រីនៅកម្ពុជា។
លោក ប៉ិច ពិសី ប្រធានអង្គការតម្លាភាពកម្ពុជា បានថ្លែងថា ក្នុងដំណើរទស្សនកិច្ចរបស់គណៈប្រតិភូវិភាគគោលនយោបាយ នៃលេខាធិការក្រុមការងារហិរញ្ញវត្ថុ (FATF) គឺដើម្បីត្រួតពិនិត្យមើលនូវការអនុវត្តអនុសាសន៍ចាស់ដែលបានដាក់កន្លងមក។ តាមរយៈជំនួបថ្មី គេក៏នឹងដាក់នូវអនុសាសន៍ថ្មីសម្រាប់ឱ្យភាគីកម្ពុជាអនុវត្តផងដែរ។
លោក ប៉ិច ពិសី និយាយថា៖«រឿងដែលសំខាន់សម្រាប់កម្ពុជា ប្រសិនយើងមានឆន្ទៈនយោបាយខ្ពស់ ហើយខ្ញុំក៏បានឃើញពីឆន្ទៈខ្ពស់ពីនាយករដ្ឋមន្ត្រី ពីថ្នាក់ដឹកនាំរដ្ឋាភិបាលក្នុងការធ្វើយ៉ាងណាឱ្យកម្ពុជាអាចមានលទ្ធភាពដកខ្លួនចេញពីបញ្ជីប្រផេះ។ នេះជាការតាំងចិត្តដ៏ល្អ ហើយអង្គការសង្គមស៊ីវិលមានការស្វាគមន៍ចំពោះការតាំងចិត្តនោះ។ អ្វីដែលចាំបាច់នោះ គឺការជំរុញការអនុវត្តទៅតាមអនុសាសន៍នីមួយៗដែលផ្តល់ដោយ FATF ឱ្យមានប្រសិទ្ធភាព»។
បើយោងតាមការថ្លែងរបស់លោក អ៊ាង សុផល្លែត ជំនួយការផ្ទាល់លោក ហ៊ុន សែន ក្នុងជំនួបជាមួយលោកនាយករដ្ឋមន្ត្រី ហ៊ុន សែន លោកស្រី ម៉ាលីន បានវាយតម្លៃខ្ពស់ចំពោះការប្ដេជ្ញាចិត្តរបស់កម្ពុជា ហើយបានលើកទឹកចិត្តកម្ពុជា ឱ្យនាំមុខប្រទេសដទៃទៀតលើវិស័យហិរញ្ញប្បទានបៃតង និងការអភិវឌ្ឍបៃតង៕
