ពិធីចុះ MoU រវាងអាជ្ញាធរមីននិង NPA លើគម្រោងសកម្មភាពមីននាថ្ងៃទី ១២ មករា។រូប CMAA
ភ្នំពេញៈ អាជ្ញាធរមីន និងអង្គការជំនួយនៃប្រជាពលរដ្ឋន័រវែស (NPA) ចុះអនុស្សរណៈយោគយល់គ្នា (MoU) លើគម្រោងអភិវឌ្ឍន៍សមត្ថភាព ក្នុងសកម្មភាពមីន ដែលមានថវិកាសរុបចំនួន ១៧២ ៧៩១ ដុល្លារអាមេរិក ដែលការចុះអនុស្សរណៈនេះត្រូវបានធ្វើឡើង នាព្រឹកថ្ងៃទី ១២ ខែមករា ឆ្នាំ ២០២៣ នៅទីស្នាក់ការអាជ្ញាធរមីន។
ពិធីចុះហត្ថលេខានេះធ្វើឡើង ដោយលោកលី បញ្ញារិទ្ធិ៍ អគ្គលេខាធិការអាជ្ញាធរមីន និងលោក Rune Dale-Andresen នាយកអង្គការ NPA ប្រចាំកម្ពុជា លើគម្រោងអភិវឌ្ឍន៍សមត្ថភាពក្នុងសកម្មភាពមីន ដែលបានគ្របដណ្តប់លើការអនុវត្តសកម្មភាពធំៗចំនួន ៣ រួមមាន សមត្ថភាពរបស់អង្គភាពទិន្នន័យ សមត្ថភាពរបស់ក្រុមត្រួតពិនិត្យគុណភាព និង សមត្ថភាពលើការរៀបចំផែនការយុទ្ធសាស្ត្រ ក្រោមអធិបតីភាពលោកទេសរដ្ឋមន្ត្រីលី ធុជ អនុប្រធានទី ១ អាជ្ញាធរមីន។
ក្នុងឱកាសនោះ លោកលី ធុជ បានកោតសរសើរយ៉ាងខ្លាំងចំពោះ ការប្តេជ្ញាចិត្តរបស់អង្គការ NPA ក្នុងការបន្តខិតខំធ្វើឱ្យប្រទេសកម្ពុជាគ្មានមីននៅឆ្នាំ ២០២៥ និងកាត់បន្ថយផលប៉ះពាល់នៃគ្រាប់បែកចង្កោម និងសំណល់ជាតិផ្ទុះផ្សេងទៀតនៃសង្គ្រាម។ ការប្តេជ្ញាចិត្តនេះស្របតាមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា សម្រាប់ការកម្ចាត់មីននៅកម្ពុជាឆ្នាំ ២០២៥ ដូចដែលបានបញ្ជាក់ជាថ្មី ដោយនាយករដ្ឋមន្ត្រីរបស់កម្ពុជានាពេលថ្មីៗនេះ។
លោកលី ធុជ ថ្លែងថា៖ «ថ្ងៃនេះ យើងបានចុះហត្ថលេខាលើ MoU រវាងអាជ្ញាធរមីន និងអង្គការ NPA ដើម្បីធ្វើជាសាក្សីពីការគាំទ្រផ្នែកហិរញ្ញវត្ថុ និងបច្ចេកទេសរបស់ NPA ដល់អាជ្ញាធរមីន និងការប្តេជ្ញាចិត្តរបស់អាជ្ញាធរមីន ក្នុងការប្រើប្រាស់ជំនួយហិរញ្ញវត្ថុយ៉ាងត្រឹមត្រូវជាមួយនឹងការទទួលខុសត្រូវពេញលេញ»។
លោកបន្តថា៖ «ខ្ញុំជឿជាក់យ៉ាង មុតមាំថា យើងនឹងអាចប្រើប្រាស់ មូលនិធិនេះ ដើម្បីដោះស្រាយតម្រូវការបច្ចុប្បន្នរបស់យើងប្រកបដោយប្រសិទ្ធភាព ហើយជាពិសេស ពង្រឹងសមត្ថភាពសំខាន់របស់យើងក្នុងការគ្រប់គ្រងគុណភាព និងការគ្រប់គ្រងព័ត៌មាន»។
លោកលី ធុជ បញ្ជាក់ថា មូលនិធិនេះ នឹងត្រូវបានប្រើប្រាស់ក្នុងការគាំទ្រការគ្រប់គ្រងចំណេះដឹងអាជ្ញាធរមីន ដើម្បីបង្កើនសមត្ថភាពរបស់អាជ្ញាធរមីន ក្នុងការគ្រប់គ្រងកិច្ចសហប្រតិបត្តិការ ខាងត្បូងខាងត្បូង និងសកម្មភាព ផ្សេងទៀត ដែលទាក់ទងនឹងការរៀន និងការចែករំលែកចំណេះដឹងអំពីសកម្មភាពមីន។
ដោយសហការជាមួយមជ្ឈមណ្ឌលអន្តរជាតិហ្សឺណែវ សម្រាប់ ការដោះមីនមនុស្សធម៌ (GICHD) អង្គការ UNDP និងតួអង្គសំខាន់ៗ ផ្សេងទៀត មូលនិធិនេះក៏នឹងប្រើប្រាស់ ដើម្បីគាំទ្រអាជ្ញាធរមីនលើសមត្ថភាពប្រកបដោយនិរន្តរភាព ក្នុងការដោះស្រាយហានិភ័យសំណល់ រួមទាំងការអភិវឌ្ឍយុទ្ធសាស្ត្រ ការវិភាគលើតម្រូវការជាតិ ដើម្បីដោះស្រាយហានិភ័យសំណល់ និងគាំទ្រដល់អាទិភាពកាត់ផ្តាច់ផ្សេងទៀត ដូចជាការបញ្ជ្រាបយេនឌ័រ និងការគ្រប់គ្រងបរិស្ថាននៅក្នុងសកម្មភាពមីន។
ជាមួយនឹងការខិតខំប្រឹងប្រែងនាពេលបច្ចុប្បន្ន និងក្រោមការដឹកនាំរបស់ប្រមុខរាជរដ្ឋាភិបាល លោកលី ធុជ លើកឡើងពីការប្តេជ្ញាចិត្តថា កម្ពុជាគ្មានមីននៅឆ្នាំ ២០២៥ នឹងក្លាយជាការពិត។ ទន្ទឹមនឹងកិច្ចខិតខំប្រឹងប្រែងទាំងនេះ ការបន្តពង្រឹង និងរក្សាសមត្ថភាពអាជ្ញាធរមីន គឺជាការចាំបាច់។
ឆ្លៀតឱកាសនោះ លោកលី ធុជ ស្នើសុំអង្គការ NPA ពិចារណាពីការប្តេជ្ញាចិត្តរបស់ខ្លួនក្នុងការគាំទ្រសមត្ថភាពអាជ្ញាធរមីន រហូតដល់ឆ្នាំ ២០២៥ និងអាចលើសពីនេះផងដែរ។
លោកបញ្ជាក់ថា៖ «ព្រឹត្តិការណ៍បន្ទាប់របស់អាជ្ញាធរមីន បន្ទាប់ពីកម្ពុជាគ្មានមីននៅឆ្នាំ ២០២៥ គឺការបន្តដោះស្រាយហានិភ័យ ដែលនៅសេសសល់នៃសំណល់ជាតិផ្ទុះនៃសង្គ្រាម (ERW) រួមទាំងការបំពុលសំណល់នៃគ្រាប់បែកចង្កោមដែលកំពុងបន្តជះឥទ្ធិពលដល់ជីវិតរបស់ប្រជាជនយើង និងរារាំងដល់ការអភិវឌ្ឍប្រទេសរបស់យើង»។
សូមបញ្ជាក់ថា អង្គការជំនួយនៃប្រជាពលរដ្ឋន័រវេស (NPA) គឺជាដៃគូយុទ្ធសាស្ត្រ និងយូរអង្វែងគាំទ្រដល់សមត្ថភាពចាំបាច់ របស់អាជ្ញាធរមីនកម្ពុជា ចាប់តាំងពីឆ្នាំ ២០១៤។ ការគាំទ្រនេះ អាចធ្វើទៅបាន តាមរយៈការគាំទ្រផ្នែកហិរញ្ញវត្ថុដ៏សប្បុរសរបស់រដ្ឋាភិបាលចក្រភពអង់គ្លេសបរទេស Commonwealth& Development ការិយាល័យ (FCDO) និងក្រសួងការបរទេសន័រវែស (NMFA) តាមរយៈអង្គការ NPA Cambodia ក្នុងគោលបំណងធានាថា អាជ្ញាធរមីន មានសមត្ថភាព និងរឹងមាំក្នុងការគ្រប់គ្រង និងសម្របសម្រួលសកម្មភាពមីននៅកម្ពុជាប្រកបដោយប្រសិទ្ធភាព៕
