លោកនាយក​រដ្ឋមន្ត្រី ហ៊ុន សែន នៅក្នុង​កិច្ចប្រជុំពេញអង្គ​គណៈរដ្ឋមន្ត្រី កាលពី​ថ្ងៃទី ១៣ ខែមករា ឆ្នាំ ២០២៣ បាន​ជំរុញ​ក្រសួង​សេដ្ឋកិច្ច និង​ហិរញ្ញវត្ថុ និង​ក្រសួង​សាធារណការ​និង​ដឹកជញ្ជូន សហការគ្នា ព​ន្លឿ​ន​ការសិក្សា​គម្រោង​សាងសង់​ផ្លូវ​រថភ្លើង​ល្បឿន​លឿន ពី​រាជធានី​ភ្នំពេញ​ទៅ​ខេត្ត​ព្រះសីហនុ និង​ផ្លូវ​រថភ្លើង​ល្បឿន​លឿន​ពី​រាជធានី​ភ្នំពេញ​ទៅ​ក្រុង​ប៉ោយប៉ែត ឱ្យបាន​ឆាប់ ដើម្បី​ជម្រើស​សម្រាប់​ធ្វើដំណើរ និង​ដឹកជញ្ជូន ឱ្យបាន​កាន់តែច្រើន​។

​លោកនាយក​រដ្ឋមន្ត្រី បាន​បញ្ជាក់ថា​៖« ក្រសួង​សេដ្ឋកិច្ច និង​ក្រសួង​សាធារណការ ត្រូវ​ព​ន្លឿ​ន​លើ​ការសិក្សា គម្រោង​ផ្លូវ​រថភ្លើង​ល្បឿន​លឿន ដោយ​អភិវឌ្ឍ​លើផ្លូវ​រថភ្លើង​ដែលមាន​ស្រាប់ ដើម្បី​បម្រើឱ្យ​វិស័យ​ដឹកជញ្ជូន​កាន់តែ​សម្បូរបែប ជំរុញ​កំណើនសេដ្ឋកិច្ច​-​សង្គម​កម្ពុជា​ឱ្យ​កាន់តែ​រីកចម្រើន បង្កើន​ប្រាក់ចំណូល និង​លើកកម្ពស់​ជីវភាព​ប្រជាជន​»​។​

​លោក ស៊ិន ច​ន្ធី ប្រធាន​សមាគម​ភ័ស្តុភារ​កម្ម​កម្ពុជា បានឱ្យដឹងថា ការដឹកជញ្ជូន​តាមផ្លូវ​រថភ្លើង គឺជា​មធ្យោបាយ​មួយ​ដែលមាន​សក្តានុពល​ខ្លាំងណាស់ សម្រាប់​វិស័យ​ដឹកជញ្ជូន មិន​ត្រឹមតែ​សម្រាប់​ដឹក​អ្នកដំណើរ​ប៉ុណ្ណោះ​ទេ តែ​ការដឹកជញ្ជូន​ទំនិញ​ចំណេញ​ច្រើន​។​

​លោក​បានបញ្ជាក់​បន្ថែម​ថា​៖«​គម្រោង​សាងសង់​ផ្លូវ​រថភ្លើង​ល្បឿន​លឿន ពី​រាជធានី​ភ្នំពេញ​ទៅ​ខេត្ត​ព្រះសីហនុ និង​ផ្លូវ​រថភ្លើង​ល្បឿន​លឿន​ពី​រាជធានី​ភ្នំពេញ​ទៅ​ក្រុង​ប៉ោយប៉ែត មាននៅ​ក្នុង​គម្រោង​មេ​របស់​ក្រសួង​ទៅហើយ​។ ការជំរុញឱ្យ​ព​ន្លឿ​ន​លើ​ការសិក្សា​គម្រោង​នេះ​បន្ថែម ពី​រាជរដ្ឋាភិបាល ជា​ដំណឹង​ល្អ​ខ្លាំងណាស់ សម្រាប់​វិស័យ​ឯកជន​»​។​

​លោក​បាន​បន្ថែមថា ការដឹកជញ្ជូន​តាមផ្លូវ​ថ្នល់ មានតម្លៃ​ថ្លៃ និង​ពេលខ្លះ​មានការ​យឺតយ៉ាវ​ខ្លះ​ដែរ ដូច្នេះ នៅពេល​មានការ​អភិវឌ្ឍ​ផ្លូវ​រថភ្លើង​ល្បឿន​លឿន​ឆាប់រហ័ស នឹង​អាចជួយ​កាត់បន្ថយ​ការចំណាយ​ថ្លៃដើម​បាន​ច្រើន ជំរុញ​ការអភិវឌ្ឍ​សេដ្ឋកិច្ចជាតិ​។​

​លោក ជា ចាន់​ដា​រ៉ា ប្រធាន​សមាគម​ពាណិជ្ជកម្ម​ដឹកជញ្ជូន និង​ខ្សែ​ច្រ​វ៉ា​ក់​ផ្គត់ផ្គង់​នៅ​កម្ពុជា បានឱ្យដឹង​ដែរ​ថា គម្រោង​សាងសង់​ផ្លូវ​រថភ្លើង​ល្បឿន​លឿន ពី​រាជធានី​ភ្នំពេញ​ទៅ​ខេត្ត​ព្រះសីហនុ និង​ផ្លូវ​រថភ្លើង​ល្បឿន​លឿន​ពី​រាជធានី​ភ្នំពេញ​ទៅ​ក្រុង​ប៉ោយប៉ែត ជា​គម្រោង​ដ៏​ល្អ ដែល​ជំរុញ​ឱ្យ​ប្រព័ន្ធ​សេដ្ឋកិច្ច​នៃ​ការដឹកជញ្ជូន​កាន់​តែមាន​ភាពល្អប្រសើរ ជាពិសេស​ការតភ្ជាប់​ហេដ្ឋារចនាសម្ព័ន្ធ​នៃ​ការដឹកជញ្ជូន​រវាងផ្លូវ​ដែក និង​ផ្លូវ​សមុទ្រ ដោយ​ជំរុញឱ្យមាន​លំហូរ​សេដ្ឋកិច្ច និង​ការវិនិយោគ​។​

​លោក​បាន​បញ្ជាក់ថា​៖«​យើង​អាច​និយាយបានថា វា​ផ្តល់​ភាពងាយស្រួល​ដល់​វិនិយោគិន​ផ្សេងៗ​ដល់​គាត់ ចង់​មក​វិនិយោគ​នៅ​កម្ពុជា ព្រោះ​ចរន្ត​ផ្លូវដែក​វា​ជួយ​សន្សំសំចៃ​លើ​វិស័យ​ដឹកជញ្ជូន​»៕