ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យប្រព័ន្ធព័ត៌មាន ធ្វើការផ្សព្វផ្សាយពីព័ត៌មានអប់រំ ឱ្យប្រជាពលរដ្ឋចាក់វ៉ាក់សាំងការពារកូវីដ ១៩ និងអនុវត្តវិធានការរាជរដ្ឋាភិបាល និងក្រសួងសុខាភិបាលឱ្យបានខ្ជាប់ខ្ជួន ខណៈដែលកូវីដ ១៩ មិនទាន់ដល់ទីបញ្ចប់របស់វានៅឡើយ។
លោកបានលើកឡើងដូចនេះ កាលពីល្ងាចថ្ងៃទី ១៤ ខែមករា ក្នុងជំនួបជាមួយនឹងអ្នកសារព័ត៌មានជិត ៥ ០០០នាក់ ដែលជាជំនួបលើកទី ៥ បន្ទាប់ពីអាក់ខាន ដោយសារកូវីដ ១៩ រយៈពេល ២ ឆ្នាំកន្លងមក។
លោក ហ៊ុន សែន មានប្រសាសន៍ថា៖ «ខ្ញុំសុំស្នើឱ្យគ្រប់បណ្តាសារព័ត៌មានបន្តយកចិត្តទុកដាក់បន្ថែមទៀតទៅលើការជួយឱ្យប្រជាពលរដ្ឋអនុវត្តវិធានការសុខាភិបាល ហើយការទទួលយកវ៉ាក់សាំងដែលជាកិច្ចការដែលយើងត្រូវធ្វើបន្ត ដែលពេលនេះអូមីក្រុងបានបំប្លែងទៅជាប្រភេទថ្មី XBB ផងដែរ»។
មិនមែនតែផ្តោតលើមេរោគកូវីដ ១៩ ប៉ុណ្ណោះទេ ប៉ុន្តែនៅពេលដែលមានជំងឺផ្សេងៗកើតឡើង ត្រូវទាមទារឱ្យមានដំណោះស្រាយណាមួយដែលគួរតែត្រូវបានធ្វើ ដោយជួយផ្សព្វផ្សាយឱ្យប្រជាពលរដ្ឋបានដឹង និងចេះការពារខ្លួន។
ទន្ទឹមនឹងនោះដែរ លោកហ៊ុន សែន ក៏បានបង្ហាញនូវមោទនភាពខ្ពស់ចំពោះស្ថាប័នសារព័ត៌មានទាំងអស់ដោយលោកបានផ្តល់តម្លៃខ្ពស់ដែលបានចូលរួមជាមួយនឹងរដ្ឋាភិបាលទៅលើយុទ្ធនាការប្រឆាំងជាមួយនឹងមេរោគកូវីដ ១៩ ដែលអ្នកសារព័ត៌មានបានចូលរួមយ៉ាងសកម្ម ហើយអ្នកសារព័ត៌មានក៏បានទទួលជាអ្នកជួរមុខដែលមានអាទិភាពក្នុងការទទួលបានការចាក់វ៉ាក់សាំងកូវីដ ១៩ ផងដែរ។
លោកថ្លែងថា ៖ «ផលប្រយោជន៍ដែលរាជរដ្ឋាភិបាល និងប្រជាជនកម្ពុជាទទួលបានមកវិញ គឺនៅត្រង់ថា វិធានការសុខាភិបាលក៏ដូចជាការអំពាវនាវរបស់រដ្ឋាភិបាលជូនចំពោះប្រជាពលរដ្ឋក្នុងការប្រយុទ្ធប្រឆាំងជាមួយនឹងមេរោគកូវីដ ១៩ នេះ ត្រូវបានផ្សព្វផ្សាយពេញលេញ ដែលចំណុចនេះ គឺជាចំណុចមួយដែលខ្ញុំសុំផ្តល់កិត្តិយសជូនអ្នកសារព័ត៌មានរបស់យើងដែលបានរួមចំណែកធ្វើកិច្ចការដ៏ល្អមួយនេះ»។
ទាក់ទងនឹងការចាក់វ៉ាក់សាំងកូវីដ ១៩ នេះដែរ លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងនាពេលលោកស្រីចុះពិនិត្យវឌ្ឍនភាពចាក់វ៉ាក់សាំងកូវីដ ១៩ នៅខេត្តកោះកុង កាលពីថ្ងៃទី ១៣ ខែមករា ថា អ្វីដែលក្រសួងនៅតែផ្តោតសំខាន់គឺក្រុមគោលដៅដែលមានក្រុមជួរមុខ ក្រុមវ័យចាស់ និងក្រុមដែលមានជំងឺប្រចាំកាយ ឬអ្នកមានប្រព័ន្ធការពារខ្សោយ ក្រុមអាជីវករតាមទីផ្សារ និងចុងក្រោយក្រុមសិស្ស-និស្សិត។
លោកស្រីបាននៅតែទទូចដល់ប្រជាពលរដ្ឋទាំងអស់មកទទួលយកការចាក់វ៉ាក់សាំងកូវីដ ១៩ ឱ្យបានគ្រប់ៗគ្នា ជាពិសេសដូសជំរុញ ទាំងដូសទី៣ ទី៤ ទី៥ និងទី៦។
លោកស្រី ឱ វណ្ណឌីន មានប្រសាសន៍ថា ៖ «ប្រសិនបើអង់ទីគ័រនៅក្នុងរាងកាយគាត់ធ្លាក់ចុះ នោះសរីរាង្គរបស់គាត់ងាយស្រួលនឹងទទួលយកពេញទំហឹងក្នុងការទទួលយកពីវីរុសកូវីដ ១៩ ជាពិសេសនៅពេលពពួកវីរុសបំប្លែងខ្លួនបន្តទៀត ជាពិសេស XBB និង XBB.1.5 ដែលពិភពលោកក៏កំពុងមានការព្រួយដែល វាក៏កំពុងតែរីករាលដាលច្រើននៅតាមបណ្តាប្រទេសមួយចំនួនផងដែរ»។
បើតាមលោកស្រី ឱ វណ្ណឌីន យុទ្ធនាការចាក់វ៉ាក់សាំងកូវីដ ១៩ មាននៅតាមបណ្តារាជធានី-ខេត្តទាំងអស់ ដែលជាយុទ្ធនាការមួយបង្ការ និងត្រៀមខ្លួនមុនឱ្យរួចជាស្រេចដើម្បីទប់ទល់ជាមួយនឹងពពួក XBB ឬ XBB.1.5។
លោកស្រីថា៖ «ក្នុងពេលដែលយើងរៀនរស់ជាមួយនឹងកូវីដ ១៩ មិនមែនយើងតែបណ្តោយខ្លួនឱ្យឆ្លងនោះទេ ប៉ុន្តែត្រូវតែបន្តការការពារជាប់ជាប្រចាំ ដោយមិនត្រូវមើលស្រាលលើការវាយលុកពីមេរោគកូវីដ ១៩ នោះឡើយ»។
បើតាមក្រសួងសុខាភិបាល គិតត្រឹមថ្ងៃទី ១៤ ខែមករា ឆ្នាំ ២០២៣ លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាន នាក់ មាន ៩៥,៣១%៕