ទិដ្ឋភាពការប្រារព្ធពិធីបុណ្យចូលឆ្នាំសកល ២០២៣។ រូប រដ្ឋបាលក្រុងបាត់ដំបង
បាត់ដំបងៈ ខេត្តបាត់ដំបងជាប់ជយលាភីលេខ ១ ខណៈខេត្ត ២ ផ្សេងទៀត រួមមានខេត្តព្រះសីហនុ និងខេត្តសៀមរាបបានជាប់ជយលាភី “ទីក្រុងស្អាតដែលមានពិធីបុណ្យចូលឆ្នាំសកលល្អជាងគេប្រចាំឆ្នាំ២០២២” តាមរយៈការបើកឱ្យមានការបោះឆ្នោតជាសាធារណៈ ខណៈការប្រគល់ពានរង្វាន់ នឹងធ្វើឡើងនៅក្នុងខែកុម្ភៈ ខាងមុខ។
ការបោះឆ្នោតជាសាធារណៈត្រូវបានធ្វើឡើងតាមរយៈ គេហទំព័រផ្លូវការ http://bestcoun-tdowncity.cambodiacleancity.gov.kh/ចាប់ពីថ្ងៃ ទី ៣១ ខែធ្នូ ឆ្នាំ ២០២២ រហូតដល់ថ្ងៃទី ២ ខែមករា ឆ្នាំ ២០២៣។
សេចក្តីប្រកាសរួមរវាងគណៈកម្មាធិការជាតិវាយតម្លៃទីក្រុងស្អាត និងក្រសួងទេសចរណ៍ដែលបានរៀបចំកម្មវិធីប្រកួតប្រជែងនេះចុះថ្ងៃទី ១៥ ខែមករា បានឱ្យដឹងថា ជាលទ្ធផល ទីក្រុងនៃខេត្តចំនួន ៣ បានជាប់ជយលាភី "ទីក្រុងស្អាតដែលមានពិធីបុណ្យចូលឆ្នាំសកលល្អជាងគេប្រចាំឆ្នាំ ២០២២" (Best Countdown City of The Year 2022) ដែលទទួលបានសំឡេងគាំទ្រច្រើនជាងគេបំផុត រួមមានលេខ ១ ខេត្តបាត់ដំបង លេខ ២ ខេត្តព្រះសីហនុ និងលេខ ៣ ខេត្តសៀមរាប។
ជាមួយគ្នានេះ គណៈកម្មាធិការជាតិវាយតម្លៃទីក្រុងស្អាត និងក្រសួងទេសចរណ៍ បានសម្តែងការចូលរួមអបអរសាទរចំពោះជយលាភីទាំង ៣ ខាងលើ ខណៈពិធីប្រគល់ពានរង្វាន់នឹងប្រព្រឹត្តទៅក្នុង “ពិធីអបអរសាទរទិវាជាតិទីក្រុងស្អាត” នៅថ្ងៃទី ២៧ ខែកុម្ភៈ ឆ្នាំ ២០២៣។
អភិបាលខេត្តបាត់ដំបងលោក សុខ លូ បានថ្លែងថា ក្នុងអំឡុងពេលបុណ្យចូលឆ្នាំសកល ក្រុមការងារខេត្តបានរៀបចំតុបតែងលម្អក្រុង ដោយបំពាក់ភ្លើងបំភ្លឺផ្លូវនៅតាមទីសាធារណៈ និងមានការប្រគំតន្ដ្រី ការសម្ដែងសិល្បៈផ្សេងៗជាច្រើន ក៏ដូចជាមានការតាំងពិព័រណ៍ម្ហូបអាហារផងដែរ។
លោកថា៖ «សំខាន់គឺបងប្អូនប្រជាពលរដ្ឋអ្នកបោះឆ្នោតគាំទ្រតាមរយៈស្គែន QR code របស់ក្រសួងទេសចរណ៍ ដែលនេះជាលទ្ធផលនៃកិច្ចខិតខំប្រឹងប្រែងរបស់យើង ហើយយើងនឹងខិតខំរៀបចំឱ្យកាន់តែល្អបន្ថែមទៀតនៅឆ្នាំបន្តបន្ទាប់ ដោយយើងនឹងមានកិច្ចប្រជុំបន្ថែមទៀត»។
ខេត្តបាត់ដំបង មានសក្តានុពលទេសចរណ៍ច្រើន រួមមានរមណីយដ្ឋានប្រវត្តិសាស្ត្រ ទេសចរណ៍ធម្មជាតិ ផ្ទះបុរាណ អគារបុរាណ និងមានម្ហូបអាហារសម្បូរបែប ដែលធ្វើឱ្យភ្ញៀវទេសចរចង់ទៅលេងកម្សាន្ត។
អភិបាលរងខេត្តព្រះសីហនុលោក ឡុង ឌីម៉ង់ ថ្លែងថា ជយលាភីនេះគឺជាមោទនភាពមួយរបស់ខេត្តព្រះសីហនុ ហើយក្រុមការងារខេត្តនឹងខិតខំបន្ថែមទៀត ដើម្បីរៀបចំក្រុងឱ្យកាន់តែទាក់ទាញ ទាំងផ្នែកសោភណភាព អនាម័យ និងហេដ្ឋារចនាសម្ព័ន្ធ។ លោកថា៖«ទោះបីជាយើងមិនទាន់បានលេខ ១ ប៉ុន្តែយើងស្ថិតក្នុងលេខ ២ ក៏ជាជយលាភី ១ ដែរ ហើយជាមោទនភាពរបស់រដ្ឋបាលខេត្ត និងសេចក្ដីរីករាយរបស់ប្រជាពលរដ្ឋនៅខេត្តនេះផងដែរ»។
លោកថា ជយលាភីនេះ គឺជាសញ្ញាណមួយ ដែលបង្ហាញឱ្យឃើញថា ភ្ញៀវទេសចរនៅក្នុងស្រុកក៏ដូចជាភ្ញៀវទេសចរបរទេសបាននិងកំពុងវិលមកកាន់ខេត្តព្រះសីហនុវិញជាបណ្តើរៗ។
លោកថា៖ «ទោះជយលាភីនេះជាលក្ខណៈក្នុងស្រុកក៏ដោយ ប៉ុន្តែបង្ហាញឱ្យឃើញថា ជាការចាប់អារម្មណ៍របស់ភ្ញៀវទេសចរអ៊ីចឹងជាសញ្ញា ១ ទៀត ដែលយើងត្រូវតែត្រៀមបម្រុងបន្ថែម លើកិច្ចការងារផ្សេងៗមានទាំងការរៀបចំសន្តិសុខសណ្ដាប់ធ្នាប់របៀបរៀបរយ និងយន្តការក្នុងការគ្រប់គ្រងសំណល់រឹង និងសំណល់រាវ»។
លោកបន្ថែមថា កត្តាសំខាន់ៗនៃការទាក់ទាញភ្ញៀវមកកម្សាន្តខេត្តព្រះសីហនុ ជាពិសេសក្នុងឱកាសបុណ្យឆ្លងឆ្នាំសកល ២០២២ ដោយសារមានការអភិវឌ្ឍទីក្រុងល្អប្រសើរ ក្នុងនោះមានហេដ្ឋារចនាសម្ព័ន្ធ ការតុបតែងភ្លើងលម្អទីក្រុង សួនច្បារ អគារសាធារណៈ និងឯកជនការគ្រប់គ្រងបរិស្ថានអនាម័យ សណ្តាប់ធ្នាប់ សន្តិសុខ សុវត្ថិភាពសាធារណៈទីក្រុង និងឆ្នេរបានល្អប្រសើរ។
លោកថា៖ «ការគ្រប់គ្រងការរាលដាលជំងឺកូវីដ ១៩ បានល្អប្រសើរ តាមរយៈយុទ្ធនាការចាក់សាំង និងអនុវត្តវិធានសុខាភិបាល និងវិធានសុវត្ថិភាពទេសចរណ៍ការរៀបចំពិព័រណ៍ ការប្រគំតន្ត្រី មានកោះ ឆ្នេរខ្សាច់ស រមណីយដ្ឋានធម្មជាតិទាក់ទាញជាច្រើន ជាពិសេសមានឆ្នេរសាធារណៈច្រើន មានបន្ទប់ទឹកសា្អតដោយមិនបង់ប្រាក់ និងអាចបោះតង់សម្រាក ទើបភ្ញៀវទេសចរមកលេងកម្សាន្តច្រើន»។
របាយការណ៍ក្រសួងទេសចរណ៍ បានបង្ហាញថា នាពិធីបុណ្យឆ្លងឆ្នាំសកលឆ្នាំ ២០២២ នៅកម្ពុជាមានភ្ញៀវទេសចរជាតិអន្តរជាតិជាង ២ លាននាក់ បានដើរកម្សាន្តនៅតាមតំបន់គោលដៅនានានៅទូទាំងប្រទេស។ ក្នុងនោះខេត្តបាត់ដំបងទទួលបានភ្ញៀវទេសចរចំនួន ១៥៨ ១១០ នាក់ ខេត្តព្រះសីហនុ ទទួលអ្នកទេសចរ ៣៣៨ ៥៥២ នាក់ និងខេត្តសៀមរាប ទទួលបានចំនួន ៣៣៧ ៧៦៩ នាក់៕
