លោកនាយករដ្ឋមន្ត្រី ហ៊ុន សែន និងលោក Cherdkiat Atthakor ឯកអគ្គរាជទូតថ្មីនៃប្រទេសថៃប្រចាំកម្ពុជាបានឯកភាពគ្នាជំរុញការដោះមីនចេញពីព្រំដែន ដើម្បីសុវត្ថិភាពរបស់ប្រជាជននៃប្រទេសទាំង ២។
ភ្នំពេញៈ លោកនាយករដ្ឋមន្ត្រី ហ៊ុន សែន និងលោក Cherdkiat Atthakor ឯកអគ្គរាជទូតថ្មីនៃប្រទេសថៃប្រចាំកម្ពុជាបានឯកភាពគ្នាជំរុញការដោះមីនចេញពីព្រំដែន ដើម្បីសុវត្ថិភាពរបស់ប្រជាជននៃប្រទេសទាំង ២។
ការឯកភាពនេះធ្វើឡើងក្នុងជំនួបរវាងភាគីទាំង២ នាថ្ងៃទី ២០ ខែមករា នៅវិមានសន្តិភាព រាជធានីភ្នំពេញ។
យោងតាមគេហទំព័រលោកនាយករដ្ឋមន្ត្រី បានឱ្យដឹងថា៖ «ក្នុងជំនួបនេះ សម្តេចតេជោ ហ៊ុន សែន និងឯកអគ្គរាជទូតថៃថ្មី បានឯកភាពគ្នាក្នុងការជំរុញឱ្យគណៈកម្មការព្រំដែនរួម ដើម្បីរៀបចំពិនិត្យបង្គោលព្រំដែន និងបោះបង្គោលព្រំដែនឡើងវិញ ព្រមទាំងការដោះមីនចេញពីព្រំដែន ដើម្បីសុវត្ថិភាពរបស់ប្រជាជនទាំងសងខាង ក្នុងការចេញចូលរកស៊ី»។
គេហទំព័រដដែលបន្តថា ភាគីទាំង២ក៏បានឯកភាពគ្នាក្នុងការត្រួតពិនិត្យព្រំដែននៅកន្លែងចាំបាច់ ដើម្បីជំរុញការឆ្លងកាត់របស់ប្រជាពលរដ្ឋ និងការឆ្លងកាត់ទំនិញ ព្រមទាំងបានចាត់ទុកការបើកច្រកព្រំដែនអន្តរជាតិស្ទឹងបត់ ក្នុងខេត្តបន្ទាយមានជ័យគឺត្រូវធ្វើឱ្យលឿន ចំណែកច្រកព្រំដែនផ្សេងៗទៀត ក៏ត្រូវជំរុញបើកដោយពុំរង់ចាំកាលកំណត់នោះទេ។
ប្រភពដដែលបន្តថា លោក ហ៊ុន សែន ក៏បានឯកភាព និងបានឱ្យក្រសួងយុត្ដិធម៌ពិនិត្យពិចារណាលើការបញ្ជូនអ្នកទោសដោយស្ម័គ្រចិត្តត្រឡប់ទៅប្រទេសរបស់ពួកគេវិញដោយមិនចាំបាច់ធ្វើបត្យាប័ននោះទេ គឺថាផ្លាស់ប្ដូរអ្នកទោសទៅវិញទៅមក ដោយយោងទៅលើការស្ម័គ្រចិត្ត៕
