.jpg)
ស្ថានភាពអ្នកទោសនៅក្នុងពន្ធនាគារព្រៃស កាលពីឆ្នាំ២០១៩ ។ ហេង ជីវ័ន
ភ្នំពេញៈ សង្គមស៊ីវិលដែលធ្វើការពាក់ព័ន្ធសិទ្ធិនិងការអភិវឌ្ឍសង្គមសម្តែងការគាំទ្រនិងជំរុញដល់ស្ថាប័នពាក់ព័ន្ធពន្លឿននីតិវិធីក្នុងការដាក់ឱ្យអនុវត្តទោសសហគមន៍ ចំពោះជនល្មើសកម្រិតស្រាលដើម្បីកាត់បន្ថយភាពចង្អៀតណែនក្នុងពន្ធនាគារ និងកាត់បន្ថយការចំណាយរបស់រដ្ឋ។
ការលើកឡើងនេះ ធ្វើឡើងបន្ទាប់ពីរដ្ឋមន្ដ្រីក្រសួងមហាផ្ទៃលោក ស ខេង បានថ្លែងកាលពីថ្ងៃទី២០ ខែមករាថា ក្រសួងមហាផ្ទៃនិងក្រសួងយុត្តិធម៌កំពុងសិក្សាគម្រោងអនុវត្តទោសសហគមន៍ដោយមានចែងក្នុងច្បាប់ព្រហ្មទណ្ឌដើម្បីធ្វើយ៉ាងណាកាត់បន្ថយភាពចង្អៀតណែនក្នុងពន្ធនាគារ។លោកបានពន្យល់ថា ក្រោយតុលាការកាត់ទោសរួច ត្រូវបញ្ជូនជនល្មើសទៅផ្ទះសំបែងពួកគាត់វិញ ប៉ុន្ដែជនល្មើសត្រូវបំពេញកាតព្វកិច្ចជាអ្នកទោស ដោយអនុវត្តតាមផ្លូវច្បាប់។
លោកថា៖«ឧទាហរណ៍ថា ទោសសហគមន៍នេះគឺឱ្យអ្នកទោសទៅបោសសំរាមនិងធ្វើអនាម័យនៅមូលដ្ឋានរបស់ខ្លួន ដោយគ្មានប្រាក់កម្រៃឡើយ។ការអនុវត្តទោសសហគមន៍បែបនេះ គឺសម្រាប់តែអ្នកមានទោសស្រាលៗប៉ុណ្ណោះដើម្បីធ្វើយ៉ាងណាដោះស្រាយភាពចង្អៀតណែនក្នុងពន្ធនាគារ»។
ពាក់ព័ន្ធការលើកឡើងនេះនាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូលោក អំ សំអាត បានថ្លែងថា វាល្មមដល់ពេលដែលរាជរដ្ឋាភិបាលគួរតែប្រញាប់បញ្ចប់ការសិក្សាហើយងាកទៅរកការអនុវត្តទោសសហគមន៍ជាពិសេសគឺតុលាការដែលគួរតែចាប់ផ្តើមអនុវត្តទោសក្នុងសហគមន៍នៅពេលការអនុត្តបែបនេះមានចែងក្នុងច្បាប់រួចទៅហើយ។
លោកថា៖ «កន្លងមករាជរដ្ឋាភិបាលក៏បានសិក្សាដែរទៅលើការងារទោសសហគមន៍ដោយលើកហេតុថាប្រជាពលរដ្ឋអត់ទាន់យល់ដឹងហើយអត់ទាន់មាននីតិវិធីក្នុងការអនុវត្តជាដើម អ៊ីចឹងបើសិនជារាជរដ្ឋាភិបាល លោកមានឆន្ទៈក្នុងការអនុវត្តសម្រាប់ទោសសហគមន៍នេះគឺអាចធ្វើទៅបានពីព្រោះការសិក្សាយូរមកហើយដែរ»។
លោកបន្ថែមថា ជាការពិតការអនុវត្តទោសសហគមន៍នេះក៏កាត់បន្ថយភាពចង្អៀតណែននៃពន្ធនាគារនិងកាត់បន្ថយបន្ទុកការចំណាយរបស់ពន្ធនាគារសម្រាប់អ្នកដែលត្រូវអនុវត្តទោស ប៉ុន្តែលោកស្នើថា ការអនុវត្តនោះត្រូវមាននីតិវិធីក្នុងការតាមដាននិងត្រួតពិនិត្យឬគ្រប់គ្រងចំពោះអ្នកដែលត្រូវដាក់ឱ្យអនុវត្តទោសសហគមន៍ឱ្យបានត្រឹមត្រូវ។
លោកថា៖«បើសិនយើងអនុវត្តត្រូវឱ្យមានតម្លាភាពនិងយុត្តិធម៌គឺដាក់ឱ្យត្រូវលក្ខខណ្ឌបានន័យថា លក្ខខណ្ឌណាដែលអាចឱ្យធ្វើការងារសហគមន៍ដោយមិនត្រូវឱ្យមានការរើសអើងត្រូវអនុវត្តតាមគោលការណ៍នៃច្បាប់ តម្លាភាពចៀសវាងអំពើពុករលួយ បក្ខពួក»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្ដិភាពលោក យង់ គិមអេង បានថ្លែងថា ការដាក់អនុវត្តទោសសហគមន៍គឺជាការមួយប្រសើរនិងជួយដល់ការអភិវឌ្ឍនៅមូលដ្ឋាន។
លោកថា៖«ព្រោះការប្រើប្រាស់ទោសសហគមន៍វាជួយអភិវឌ្ឍសហគមន៍បានទៅមុខលឿនហើយនឹងអាចកាត់បន្ថយភាពកកស្ទះនៅក្នុងពន្ធនាគារកុំឱ្យថា ទោសបន្តិចបន្តួចដាក់ពន្ធនាគារដល់អ៊ីចឹងទៅធ្វើឱ្យភាពកកស្ទះនៅពន្ធនាគារវាខ្លាំង ដែលប៉ះពាល់ដល់សុខភាពអ្នកទោសជាដើម»។
លោកបន្តថា ការអនុវត្តទោសសហគមន៍នេះជួយច្រើន ហើយក៏ជាការរៀនសូត្រមួយធ្វើឱ្យជនល្មើសមានការកែលម្អការងារទៅថ្ងៃអនាគតសម្រាប់ជីវិតរស់នៅ កសាងជីវភាពត្រឹមត្រូវឡើងវិញ ។
លោក ស ខេង បានបញ្ជាក់ថា ក្រសួងមហាផ្ទៃនិងក្រសួងយុត្តិធម៌នឹងសិក្សាចំពោះទោសសហគមន៍នេះ ឱ្យបានហ្មត់ចត់បំផុតមុននឹងអនុវត្តគម្រោងទាំងនេះឱ្យមានប្រសិទ្ធភាព។
លោកបានថ្លែងថា៖ «នាពេលខាងមុខនេះយើងក៏កំពុងជំរុញជាពិសេសក្រសួងមហាផ្ទៃ និង ក្រសួងយុត្តិធម៌ ទាក់ទងទៅនឹងគម្រោងអនុវត្តទោសសហគមន៍ដែលមានចែងក្នុងច្បាប់ព្រហ្មទណ្ឌរបស់យើងដើម្បីចៀសវាងនិងដោះស្រាយភាពចង្អៀតណែនក្នុងពន្ធនាគារ អ៊ីចឹងទោសកម្រិតស្រាល អាហ្នឹងយើងនឹងខិតខំអនុវត្តនូវគម្រោងទោសសហគមន៍»៕
