កណ្តាលៈ សំរាមប្លាស្ទិកត្រូវបានគេដឹងថា ជាសំរាមដែលបង្កផលប៉ះពាល់ខ្លាំងទៅដល់បរិស្ថាន ប៉ុន្តែដោយសារតម្រូវការចាំបាច់ក្នុងការប្រើប្រាស់ប្លាស្ទិកនៅតែមាន ដូច្នេះកាកសំណល់ប្រភេទនេះ នៅកន្លែងខ្លះត្រូវបានគេបោះចោលពាសវាលពាសកាល។ ដោយសារតែមើលឃើញពីផលប៉ះពាល់នៃសំណល់ប្លាស្ទិក បុរសម្នាក់បានកែច្នៃប្លាស្ទិកឱ្យទៅជាឥដ្ឋ។
ដោយហេតុថា ប្លាស្ទិកផ្ដល់ហានិភ័យដ៏ធ្ងន់ធ្ងរ សកម្មភាពជាច្រើនបានកើតឡើងជាបន្តបន្ទាប់ ក្នុងរយៈពេលចុងក្រោយនេះ។ សកម្មភាពទាំងនោះ រួមមាន ការបង្កើតយុទ្ធនាការរើសសំរាម ការយកប្លាស្ទិកទៅកែច្នៃ ការផ្សព្វផ្សាយពីផលប៉ះពាល់នៃប្លាស្ទិក និងការបង្កើតផលិតផលផ្សេង ដើម្បីប្រើប្រាស់ជំនួសប្លាស្ទិកជាដើម។
បុរសម្នាក់ រស់នៅខេត្តកណ្ដាល បានបង្កើតសិប្បកម្មមួយ ដែលលោកឱ្យឈ្មោះថា ឥដ្ឋអេកូ(Eco-brick) ដែលមុននឹងបង្កើតនូវអាជីវកម្មនេះ លោកបានទៅសិក្សាទ្រឹស្តីពីប្រទេសថៃ ម៉ាឡេស៊ី ហ្វីលីពីន ចិន ឥណ្ឌា។ ក្រៅពីនោះ លោកធ្វើស្វ័យសិក្សា ដោយការស្រាវជ្រាវតាមយូធូប និងតាមអ៊ីនធឺណិត។
លោកសុខ ធី ជាអ្នកកែច្នៃកាកសំណល់ប្លាស្ទិកផលិតជាឥដ្ឋអេកូនៅខេត្តកណ្ដាល ដែលសិប្បកម្មរបស់លោកត្រូវបានបង្កើតឡើងកាលពីឆ្នាំ២០២០។ បើតាមលោកសុខ ធី មូលហេតុដែលជំរុញឱ្យលោកចង់ធ្វើអាជីវកម្មនេះ ដោយសារតែ លោកបានមើលឃើញពីផលប៉ះពាល់នៃប្លាស្ទិក។ ម្យ៉ាងទៀត ដោយសារការមើលឃើញពីការប្រឈមគ្រោះថ្នាក់របស់កម្មករផលិតឥដ្ឋ ដោយកន្លងមក មានគ្រោះថ្នាក់ដោយសារម៉ាស៊ីនផលិតឥដ្ឋ។
លោកសុខ ធី និយាយថា៖«ប្លាស្ទិក មាននៅគ្រប់ទីកន្លែង ហើយការយកវាទៅច្នៃ ក៏នៅមានកម្រិតនៅឡើយ។ ដូច្នេះបើសិនខ្ញុំអាចបង្កើតសិប្បកម្មមួយ ខ្ញុំគិតថា អាចជួយបរិស្ថានបានច្រើន»។
សម្រាប់វត្ថុធាតុដើមក្នុងការផលិត គឺប្លាស្ទិក លោកបានយកវាចេញពីសាលារៀន អង្គការ ក្រុមហ៊ុនឯកជនផ្សេងៗ និងជាពិសេស គឺការបង្កើតកម្មវិធីយកប្លាស្ទិកទៅដោះដូរជាឥដ្ឋបរិស្ថាន ដែលសិប្បកម្មលោកបានបង្កើតជាដើម។
លោកបន្តថា៖«កន្លងមកមានបងប្អូនយកកាកសំណល់ប្លាស្ទិកដែលស្ងួតល្អ មកដោះដូរ ដោយយើងគិតឱ្យពួកគាត់ជាឥដ្ឋ១ដុំ ដូរនឹងប្លាស្ទិក២គីឡូក្រាម»។
ដោយឡែក សម្រាប់ប្លាស្ទិកដែលជាវត្ថុធាតុដើមក្នុងការផលិតឥដ្ឋ លោកសុខ ធី អះអាងថា មានមិនខ្វះទេ ស្ទើរតែពេលខ្លះផលិតមិនទាន់ ប្លាស្ទិក គរជាគំនរក៏មាន។
អ្នកកែច្នៃប្លាស្ទិករូបនេះ បានឱ្យដឹងពីដំណើរការនៃការផលិតឥដ្ឋពីប្លាស្ទិកថា៖«ដំបូងត្រូវកិនប្លាស្ទិក ដែលគេយកមកឱ្យ ដោយយើងមានលាយវត្ថុធាតុដើមសំខាន់ៗ ហើយយើងដាក់ចូលទៅក្នុងពុម្ពដើម្បីសង្កត់»។
លោកបន្តថា៖«ដំណើរការផលិតឥដ្ឋ មិនចំណាយពេលយូរទេ ឱ្យតែយើងមានវត្ថុធាតុដើម យើងដាក់លាយចូល យើងសង្កត់តែមួយភ្លែត ត្រឹមតែ១នាទី ចេញបាន៦ដុំ។ បន្ទាប់មកយើងត្រូវរក្សាទុកនៅក្នុងរោង១យប់សិន ទើបយើងយកចេញ ហើយក្រោយមកអាចយកចេញទៅដាក់ហាលថ្ងៃ១ព្រឹក ឬ១ថ្ងៃ គឺយើងអាចយកទៅប្រើប្រាស់បានហើយ»។
សម្រាប់ផលិតកម្មនៃសិប្បកម្មរបស់លោក គឺ១ថ្ងៃ អាចមានលទ្ធភាពផលិតបានពី ១ ០០០-១ ២០០ដុំ ហើយដែលឥដ្ឋទាំងនោះនឹងត្រូវលក់ទៅកាន់ទីផ្សារខុសៗគ្នាតាមបណ្ដាខេត្តនានា។ លោកក៏បានបញ្ជាក់ដែរថា អតិថិជនភាគច្រើនជាវផលិតផលរបស់លោកទៅសាងសង់ផ្ទះ ធ្វើរបង តុបតែងហាង ឬភោជនីយដ្ឋានជាដើម។
សម្រាប់តម្លៃ លោកបានចែកជា២ ទី១ គឺប្រភេទឥដ្ឋលាតធម្មតា(ឥដ្ឋមានផ្ទៃរលោងស្មើ)១ម៉ែត្រការ៉េ មាន៤០ដុំ លក់ក្នុងតម្លៃ៩ដុល្លារកន្លះ។ ទី២ គឺឥដ្ឋប្រភេទម៉ូដក្បាច់ ដែលមានតម្លៃ ១ការ៉េ ១០ដុល្លារកន្លះ។
បើតាមម្ចាស់សិប្បកម្មរូបនេះ កន្លងមក លោកក៏បានជួបប្រទះបញ្ហាមួយចំនួនផងដែរ គឺបញ្ហាទីតាំងសិប្បកម្មប្រឈមនឹងការលិចទឹក កង្វះបច្ចេកទេសក្នុងការផលិត និងកង្វះដើមទុន។ ប៉ុន្តែដោយមានគំនិតចង់ប្រកបអាជីវកម្មនេះ លោកបានរកទុនតាមរយៈការខ្ចីពីបងប្អូន អ្នកស្គាល់គ្នា និងព្យាយាមរកតាមរយៈការចូលរួមប្រកួតក្នុងកម្មវិធីនានា។
លោក សុខ ធី បានបញ្ជាក់ដែរថា កន្លងមកលោកបានចូលប្រឡងជាមួយក្រុមហ៊ុនជាច្រើនផ្សេងទៀត ដើម្បីស្គាល់ឱ្យកាន់តែច្បាស់ពីសមត្ថភាពខ្លួនឯង ក៏ដូចជារកទុនសម្រាប់បើកសិប្បកម្ម។ ជាលទ្ធផល លោកទទួលបានជយលាភីលេខ១ជាច្រើនប្រកួត ព្រមទាំងមានការទទួលស្គាល់ពីសំណាក់អតិថិជន ក៏ដូចជាក្រុមសហគ្រិនផងដែរ។
សម្រាប់គម្រោងទៅថ្ងៃមុខ លោកសុខ ធី បានឱ្យដឹងថា លោកចង់ពង្រីកសាខាឱ្យបានគ្រប់ខេត្ត-រាជធានី ខណៈដែលបច្ចុប្បន្ន លោកមានសាខានៅបណ្ដាខេត្តមួយចំនួន ដូចជា ខេត្តតាកែវ កំពង់ស្ពឺ ពោធិ៍សាត់ ក្រុងប៉ៃលិន សៀមរាប ត្បូងឃ្មុំ និងខេត្តក្រចេះ។
អ្នកកែច្នៃប្លាស្ទិករូបនេះ បានអំពាវនាវឱ្យបងប្អូនប្រជាជនកម្ពុជា ចូលរួមកាត់បន្ថយការប្រើប្រាស់ប្លាស្ទិកទាំងអស់គ្នា ឱ្យបានច្រើនបំផុត តាមដែលអាចធ្វើទៅបាន៕